DANIEL
Israelin enabu ja dukun Babilonia anu jatu iyukin taewanibukiaki, na janchadan
1
Judán enabun mai pakea anuxun jatu yunui Joaquim xanen ibujaidakunkaini ma 3 año kaya Babilonia xanen ibujaida Nabucodonosor jawen detenamenikabu ichapabube jikitan Jerusalén kebauni nati ikabu 2 jawenabu jau jatu achinun Nabucodonosor Jehován jenea Nabucodonosor jawen detenamenikabubetan Jerusalén achiabu ja kachu jikikain Judán enabu xanen ibujaida Joaquim achitan januxun Judán enabu mai pakea anuabu jawen tsuma jatu watan januxun jawen kushipawen Templo anua jawen kenwanti mabu medibi Jehována ichapa jau bikin ichawanunbun Nabucodonosorin jawen tsumabu jatu yunua bikin ichawaibun junibu pepabu katuxun jabu inun ja mabu medibi Babilonia anu Nabucodonosorin jatu bumakin Babilonia anu bichiabu jawen yushibu kenwanti jiwe janu mabu meketi dintu anu Dios kenwanti mabu medibi Nabucodonosorin jatu adumanikiaki. 3-4 Ja dikabi Israelin enabu jatu iweshinxun xanen ibubun enabu inun mabuya pepabun enabu anua bedunanbu pepabu jawendua inun, jawen yuda jawa chakabu jayabuma inun, jawaida tapinkin ninkatidubu inun, xanen ibun jiwe jawendua anuxun jawa bika teneama medabewakubaintidubu jatu katuxun Caldea nawabun jancha inun jatun una kene jau jatu yusinkubainxanunbun jawen jiwe jawendua anu jawen dayadubu yununika jawen kena Aspenaz Nabucodonosorin jatu yunua Israelin enabu bedunanbu unanmakubainkin bedunan juni pepabus jatu katubainima 5 januxun 3 año ja bedunanbu jatu yusinkubainkin jabias xanen ibun piti inun nuxuti vino xanen ibujaida inanmisbu xaba tibi jau jatu pimakubainxanunbun Nabucodonosorin jatu yunudianikiaki.Daniel inun jawen jaibuaibun jatun kene tapinibukiaki, na janchadan
6 Judán enabu Daniel inun, Ananías inun, Misael inun, Azarías ja bedunanbube 7 dayadu yununika Aspenazin jatu katuxun jawen janchawen jatu kena betsa wakin Daniel kena bena wakin “Beltsasar” waxun Ananías kena bena wakin “Sadrac” waxun Misael kena bena wakin “Mesac” waxun Azarías kena bena wakin “Abed-negó” waxun jatu pima taewaya 8 xanen ibun piti inun nuxuti vino pepawen chakabui jatun juinti detsiskatsi ikama dayadu yununika Aspenaz Danielin yukakin:
—Uian. Xanen ibujaidatun piti pejaidabia jawen pitiwen yushibubu dami kenwanmisbuwen taexun nukun mekenika Diosun beya chibanma nun sinatamatidubuki, chakabuwakinan. Nun chakabukatsi ikamadan, ¿nuku dabe inun dabebun ja piti piyamakubainxanpa?— aka 9 dayadu yununika Aspenaz Diosun bedunanbuwen nuimaya 10 Aspenazin Daniel yuikin:
—En xanen ibujaida Nabucodonosordiwen taea en dateaii. Jawada man pikubainxanunbun inun man nuxukubainxanunbun en xanen ibun ea yunushinaki. Bedunan betsabu keskama man imanai babuai en xanen ibun uintan matuwen taexun en xanen ibun ea jatu tenanmatiduki— aka
11 jawen jancha ninkatan Daniel inun, Ananías inun, Misael inun, Azarías jau jatu mekekubainun dayadu yununika Aspenaz yunushina Danielin yuikin:
12 —Nun min tsumabuwen taexun min nuku unanti wanun en mia ea akaii. Yusu jua besti nuku pimakin unpax besti nuku nexumakin 10 xaba besti ja piti jau nuku inankubainunbun jatu yunuwe. 13 Ja 10 xaba binuaya xanen ibu pimakin jabias piti bedunan betsabudi pimakubainaibun nukun besu inun jatun besu uinkin jadatuda besu pepa binua min unantiduwen taexun jaska min shinain keska nuku axanwen— aka
14 dayadu yununikatun Daniel janchai jakidi pe shinantan 10 xaba kaya pitiwen jatu unanti wa 15 ja 10 xaba binukainaya xanen ibun piti bedunan betsabun pikubaini Daniel inun jawen jaibuaibun besu xuai kushipakin jatu binuaya 16 jaskaibun xanen ibun piti nami inun vino ja jatu inanma yusu inun yunu betsa betsapa inun unpax besti jau jatu nexumakubainunbun dayadu yununikatun jatu yunua jaska wakin jatu pimakubainaibun
17 ja 4 bedunanbun Babilonia una kene inun jatun beya dasibi unanti jau tapin keyununbun shinan xabakabi wakin dasibi ninkanika Diosun jatu wakubainkin tsuada uxamabia nama keska uin inun uxa namakin uin jaska yuinika wakin Diosun Daniel besti unanepa wadiakubainaya
18 jatixun jatu yunuima jatu yusinkin menetan jau ea uinmai bexanunbun, iwanan, xanen ibujaida Nabucodonosorin jatu yunuima bedunanbu dasibi jatu yusinkubaini ma 3 año keyuaibun dayadu yununika Aspenazin bedunanbu dasibi jatu iyuxun Nabucodonosor bebun jatu nichian 19-20 jabu tibi unanti wakin bestibu tibi Nabucodonosorin jatu yukakubainkin jamapai shadabu Nabucodonosorin jatu unan keyukin Daniel inun, Ananías inun, Misael inun, Azaríasin bedunan betsabu jatu binujaidaibu unantan jamapai shadabukidi jatu ana yukajaidaya jawaida tapinikakin unanepabun xabakabi kemakin Babilonia anu mukayabu inun yushibu yukanikabu dasibi 10 veces jatu binu keyuabuwen taexun Daniel inun, Ananías inun, Misael inun, Azarías jatu katua dayaxunkin taewabainaibun 21 Babilonia anu badi ichapa jiwekunkaini Persia nawabu xanen ibujaida Ciron jatu yunu taewabainaya Daniel dayaxundiakunkainikiaki.