5 Jamen juni pepabu ikidan, eskamisbuki. Padananainsma inun chanichakaisma ikubainmisbuki. 6 Jawenabun beya mati medibi anuxun yushibu dami kenwainbu anuxun jatubetan pi chakabukunkainsma inun, kanekin Israelin enabun mekenika yushibu chani duawai jaki chiti isma inun, jatu dapi jiweabu jatun ain jawa jatu meinsma inun, jawen ain jimi ikai chutaisbumadan, 7 ja dikabi, jawa tsua ichakawaisma inun, junin dibia ma pakaken jawen mabu biainma juni pepabun jawen mabu jatu ana inanmisbuki. Jawa betsa taska jatu yumetsuamadan, januxun nuitapai buniaibu jawen piti jatu pimamisbuki. Ja inun, juni betsa tadiuma uinkin jatun tadi betsa jatu inanmisbuki. 8 Ja dikabi pei inanshinxun jawena wakin ana xekaisbumaki. Jawa tsua bika tenemaisbumaki. Januxun jawadawen taea yuda dabe ja ikaibu kaneama pepawen besti jatu unanti wamisbuki. 9 Ja juni pepadan, en yunuti jancha inun en nemati jancha shinankin en yusinti jancha dasibi chanima chibankin tsua jatu padainsma ja juni pepa kayabibuwen taea pe jiwekubainxankanikiki, en jawa jatu kupiamadan. Ea Jehován chanima en jancha en mestenwaiin.

10-11 Jamen ja juni pepabiaken jawen juni bake betsan jawen epan shinan chibankin akama na jaska tibi mei chakabukunkaini jaska jawen bake en uintiduki. Jawaida sinatai detenamei inun, yuda betsa tenainan, ja inun, mati medibi anuxun jawenabun yushibubu dami kenwainbubetan pikubainmis inun, ja dapi jiweabun ain chutamis inun, 12 nuitapaibu inun jawa jayabuma ichakawakin medabewaisma inun, yuda betsa betsapabun jatun jawada yumetsumis inun, juni betsan dibia ma pakabiaken jawen mabu biainma ja yaushikin ana inainsma inun, mekenika yushibu chani duawakin kenwanmis inun, jawada betsa betsapa en bechipaiama akubainmis inun, 13 pei inanyutan ana jawena wakin binumakin ichapa watan yukamisbudan, jaskabudan, jiwetidubumaki. Jawada dasibi en bechipaiama akubainaiwen taexun xanen ibubun jau kupikin tenanxanunbunwen, tsuan jawa jatu nemamadan. Ibubis ja juni jatun shinan chakabuwen taea mawaxankanikiki, en jatu kupimadan.

14 Jamen juni chakabun bakebia jawen epan chakabu akubainai uinbiakin jawen jiwea chibainsma eskatidubuki. 15 Mati medibi tibi anuxun yushibu dami kenwantan pimisbube ichaisma inun, kanekin Israelin enabun mekenika yushibu chani duawai jaki chiti isma inun, ja dapi jiweabun ain jawa meisma inun, 16 tsua ichakawaisma inun, pei bianyuaya jau pakaxun bixanun, iwanan, jawen mabu betsa biainsma inun, jawada tibi jatu yumetsuismadan, jakia jawen piti paxkatan jawa jayama buniaibu jatu inanmis inun, tadiuma nuitapaibu jawen tadi betsa jatu inanmis inun, 17 jawa tsua ichakawakin chakabuwaisma inun, pei inanyutan ana jawena bikin xekakin yukaismadan, ja junin jaska wakinan, en yunuti jancha inun en nemati jancha shinankubainkin en yusinti jancha chibain jatun ibubun chakabuwen taea jawa mawama ixankanikiki, en jatu jiwemakubainadan.

18 Ja inun, betsadan, jatun epan jawenabu ichakawakin jatu yumetsukin kanekin chakabu betsa betsapa wakubainaya jawen chakabuwen taexun kupikin jau tenanxanunbunwen. 19 Jakia matubu yuka iki: ‘¿Jaskakin jawen juni bake nun kupiamamen, jawen epan chakabuwen taexunan?’ man ikaya eskaki. Matu yuinun ninkakanwen. Jawen juni baken en yunuti jancha inun en nemati jancha shinankin en yusinti jancha chibankubaini jatu padainsma inun chanichakaismawen taea chanima jiwexanikiki, en medabewakubainadan. 20 Jamen betsadan, tsuanda chakabu besti wakubainai jabu besti mawaxankanikiki, en jatu kupiadan. Jatun epan chakabuwen taexun jawen juni bake jawen kupitiwen jatu tenantimaki. Jabiaskadi wakin jawen juni baken chakabuwen taexun jawen ibu kupitimadiki. Tsuanda pepa akin jaska Diosun bechipaimis chibanmisbun manakuti pepa bixankanikiki. Jakia tsuanda chakabu betsa betsapa akubainmisbun kupiti chakabu bixankanikiki”, itan,

21 “Junibun chakabuwabiakubaini jatun chakabu jene keyutan en yunuti jancha inun en nemati jancha shinankubainkin ana kaneama pepas akubaini jiwekubainxankanikiki, en kupitiwen jawa mawamadan. 22 Ja junin jaska chakabu akubaini ean en ana shinanma ja juni pepakin ea uinmaiwen taea ana jawa dateama jiwekunkainxanikiki. 23 Junibu chakabu jatun chakabuwen mawaibu en bechipaiamaki. Jakia shinan betsa wakin jatun chakabu jenetan jiweaibu en kupitiwen jawa dateama jau jiwekubainxanunbun en bechipaimiski. Ea Jehován en jancha chanimawen en mestenwaiin.

24 Jakia tsuada pepai jiwebiakunkainmistun jawen pepa jene keyutan chakabu dasibi inun jawada en bechipaiama en dananmis akubainaibudan, ¿en jatu kupiama jiweyukunkainai dabanen man shinain? Jaskamaki. Jaskai pepa jiwekunkainima en ana shinanma ea ikunwain jenei chintuntan ibubis jawen chakabuwen taea jau mawanun en kupixanaii. 25 Ea en pepa bestiwen en matu mekebia matun shinan chakakin man ea chitemisdan, matu yuinun ninkakanwen. Matun yuikin: ‘Jehován nuku pewakubainamaki’, man ikaii. Jakia man Israelin enabudan, en eamaki, chakabudan. Jakia ea binumakin ea ninkama man chakabuwamisbuki. 26 Juni pepatun jawen pepa jenetan chakabukunkainaidan, ibubis jawen shinan chakabuwen taea mawaxanikiki, en kupiadan. 27 Jakia juni chakabun jawen chakabu jenetan ana padanananma inun chanichakama ikunkaini jawen jiwea paxaxanikiki, en kupiamadan. 28 Jamen betsadan, tsuanda jawen chakabu betsa betsapa unantan jenekin shinan betsa watan chanima jiweyuxanikiki, en kupiamadan.

29 En Jehová man Israelin enabun ekidi yuikin: ‘Jehován pepawen nuku mekeismaki’, man ikaya ¿jaskakin en yunutiwen en matu pe jiwemaismamen? ¿Jakia man matumamen, pepa aki man jiweismadan? 30 Man Israelbudan, ¿matu tibi jaska man jiwemiswen taea ean en matu unanti watidumamen? Ea Jehován en jancha chanima en mestenwaiin. Ibubis man ea sinatamabiamis jawen taexun en matu kupiyamaxanun matun chakabu dasibi jawaida jene keyudikanwen, jamen matun jiwea man benuyamaxanunan. 31-32 Ea sinatamakubainkin matun chakabu jaska man akubainai jenetan shinan pepa shinankin yushin pepa bena bikubainkanwen. Tsua man mawayamanun, iwanan, en bechipaiamawen taea Israelin enabuun, kupia yumain ¿jaskai man mawaxanai? Matun chakabu jene keyutan jiwei pedikubainkanwen, en jawen taexun en matu kupiyamaxanunan. Ana chakabuwama jiwei pe bestikubainkanwen, akin ea Jehován en jancha chanima en mestenwaiin”, ikaya en jatu yuixuniki, Israelin enabudan.