2 ea jaxpa watan ja una keneya jatun ea pimakin 3 ea yuikin: “Na una keneya en mia inainan, pikin xeawe, ikisdan. Yaniwakin min jatu mata wawe”, ea wa

ean pikinan, jawen nis buna bata keska en meimaki. 4 Januxun ea ana yuikin: “Kaxun jaska Israelin enabu en jatu jaska yuikatsis ikai ea jatu yuixunkubainwen. 5 Yuda betsabu jatun jancha junea bika min tapintiduma anu en mia yunuamaki. Jakia Israelin enabu anu en mia yunuaii, jatun janchawen min janchai anudan. 6 Yudabu betsa betsapa midimabu anu jatun jancha itimaska inun bika min tapintiduma anu en mia jaskanu yunuamaki. Jabiaskabiaken jabu anu en mia jatu yunua jabun mia ninkatidubu ikeanaii. 7 Jamen mia janu yunuama ja dasibi Israelin enabu juinti kushibu inun besu kushibu jabun ea ninkaisbumawen taexun miadi ninkama ixankanikiki. 8 Jakia jabu keska en mia wadiaii, min besu inun min juinti mia kushi wakinan. 9 Ja nenkati diamante keska wakin en mia kushipa waxanaii, mishki betsa kushipa binua keska wakinan. Ea danan paepa wamisbuwen taexun jawada mia bebunxun yuiaibu jatuwen taea teku iki dateyamakunkainxanwen”, iwanan,

10 ana ea yuikin: “Dasibi en mia yuai pes nixun ninka pejaida wakin min buxka medan netanwen, jakimatimaidan. 11 Minabu Babilonia anu iwenibu jatu uin kadiwe. Mia ninkatidubumenkain, mia ninkabumabiaken: ‘Jehován eska matu yuikiki. Ninkakanwen’, iwanan, ea jatu yuixunxanwen”, ea wa

12 januxun Diosun Yushin kushipatun ea benitan ea duntanbainaya ea kachun Jehován xantu anua jawen kushipa chaxa chaxa iki benikainaya mai pacha sakui keskai unanxubima danka ikainkaini keska en ninkaya 13 ja jui danka ikidan, ja 4 junibun pei nuyabaini xun xun ibainai anu jawen tadanbainti tae jatun yudaki tsamianwen buidan, unanxubima tin ikainkaini mai pacha sakujaidai keskaki. 14 Diosun Yushinen ja en nia anua ea nuyanbainkin ea iyukin Jehován jawen mekenen ea tsuma chakayamaxun ea iyua punu nuka sinatayabi dunukaini kai 15 Jene Quebar kexa anu ea butea Israelin enabu Babilonia anu jatu iwenibu mae betsa Tel Abib anu jiweabu anu jikitan janu 7 xaba ea jatube jiweyuxun en jawa unanmawen taea en jawa watiduma inun en jawa jatu yuitiduma ikaya

16 ja 7 xaba keyuaya Jehován ana ea yunukin yuikin: 17 “Miadan, Israelin enabun chaninika en mia waii. Januxun jaska en jancha bebunkidi en mia yuia jatu unanmakin ea jatu banabimaxunkubainxanwen. 18 Eskakidi en shinain ea ninkawe. Tsuada ja chakabuaikidi en kupitiwen jau mawanunbun en jakidi mia yuia jawen chakabu jenetan jau jiwekunkainxanun nemakin min jawa jatu jancha wama, jawen chakabuwen taea mawaxanikiki, en kupiadan. Jakia mian kanekin tsuada jawen chakabukidi nemakin min medabewama ma mawaken jawen taexun en mia kupixanaii. 19 Jakia tsuada jawen chakabukidi yuikin min nemaya jawen chakabukidi shinan betsa wama jawen chakabu jeneamawen taea mawaxanikiki, en kupiadan. Jakia mianan, min jatu nemakin shinan betsa wamashinawen taea min jiwea min mekexanaii. 20 Jaska inun, betsa en shinainan, tsuanda ea ninkai pepabiakunkaini jatun pepa jenetan ana chakabuwakubainaibun mesekidi en jatu yunua bui juti ikain di ikabu keska nemakin min jawa jatu jancha wama jatun chakabu jeneabumawen taea mawaxankanikiki, en jatu kupiadan. Jatun pepa akubainimabukidi en ana shinanma jatun chakabuwen taea mawaibun jakia mian kanekin min jatu nemama ishianwen taexun en mia kupixanaii. 21 Jakia jau chakabuwayamanun nemakin bebunkidi min xabakabi yuia mia ninkatan ana jawa chakabuwamawen taea jiweyuxanikiki, en ana kupiamadan. Bebunkidi min jatu yuishinawen taea jamen miadan, ibubis mekei min jiweyukunkainxanaii”, itan,

22 ea jaska jancha wakin jawen kushipawen ea mekin Jehován ana ea yuikin: “Nenua benikaini kaidan, napanpakidi kawe, jadia en mibe janchaidan”, ea wa 23 benikaini napanpakidi kaxun Jene Quebar kexa nixun jaska en uinma keska jadixundi Jehován kushipa chaxa chaxa ikai ana uin danti iki main en beti iken 24 januxun Diosun Yushin kushipa ea medan jikitan ea benia en niken Jehován eska ea yuikin: “Kai min jiwetan jikitan min jiwe beputi bexetanwen. 25 Uian. Min jiwe anua min kainkainyamanun dispiwen jabun mia binexxanikiki, kainkaina min ana yudabube niyamanunan. 26 Ja dikabi eanan, min ana janchatiduma wakin min janxakaki min jana en mia tsanpa waii, min juyununan. Jabun en jancha dananbiamisbun jatu ja akin min jatu pewatiduma ixanaii. 27 Jakia jawada en mia yuimakatsi ikaitian en mia ana jancha pesamakubainxanaii. Januxun jatu yuikin: ‘Eska Jehován matu yuikiki’, iwanan, min jatu ea yuixunkubainxanaii. Minabu jawa ninkaisbumawen taexun tsuabunda ninkakatsi ikin ninkakubainxankanikiki. Jakia tsuabunda ninkakatsi ikabuma jau ninkayamakubainxanunbunwen”, akin ea jaska waniki.