januxun jawen jui taxniai en ninkaya ea yuikin: “Miadan, min juniki. Beniwe, en mibe janchaidan”, ea waya 2 ja jui kainkin ea jancha waya jabiatiandi jawaida Diosun Yushin kushipa ea medan jikitan ea benia en niken jabias juiwen ea jancha waxu ana en ninkaya 3 ea yuikubainkin: “Min miaki, junidan. En mia yunuai Israelin enabu ea jatu yuixuntanwen, jabun en jancha ninkakin chibainsbuma patapabun ea danain eki sinatamisbu anudan. Jatun xenipabun ea danankin taewaniken na jabiatiandi jabun bababundi ea danandiakubainkanikiki. 4 Jamen jatun bakebudan, juinti kushi inun buxka kushi shinan betsa wakatsi isbuma anu en mia yunuaii. Kaxun jatu yuikin: ‘Jehová Diosun eska matu yuikiki’, 5 min jatu wa mia ninkakanimenkain, mia ninkabumamenkain, ja junibudan, ninkaisma sinatapabuki. Jabu jaska jiwebiaken mia min Diosun jancha yuixunika min jatube jiwea jabun unanxankanikiki. 6 Mia min junidan, jabuki dateyamaxanwen. En jancha min jatu yuibia jabudan, eskabun mia achia min jiwexanaii. Muxan mia yabubauna keska inun nibube min jiwea keskaxanaiwen taea jatuki mesei dateyamaxanwen. Jabudan, ninkatidubuma sinatajaidabuki. Jaskawen taea jabun jawada yuikin mia datetidubuwen e iki dateyamaxanwen. 7 En jancha dananjaidai eki sinatamisbun min jancha mia ninkakanimenkain, mia ninkabumabiaken jabiaskabiaken en jancha jatu yuikubainxanwen. 8 Jawada en mia yuiai ninka pejaida wawe, jatu keska sinatapakin en jancha dananma jawada en mia inain jaxpatan mukukin piwe”, ea waya