Jaska Jehován jatu medabewaxanai Israelin enabu yuinikiaki, na janchadan
36
16 Ana badi betsatian Jehován ea jancha wakin yuikin: 17 “Israelin enabu jatun mai pakea en medibi jatu inani anu jiwexun chakabuwakubaini atimapakin ea bechipaimama inibuki. Jaskai jiwekubainkin jatun mai pakea atimapa detsis keska waibun jaskaibu en jatu dananjaidaniki. 18 Januxun jatunabu betsabun jawa jatu wabumabia e iskaun jatun mae anuxun jawenabun jatu detekubainaibu inun, yushibu dami kenwain jaki beamaibuwen taexun ea jatuki sinatakawan 19 ja jiwe chakakubainaibuwen taexun mai pakea betsa betsapa anu nawabu jabun unanbuma anu ean jatu ichakawayukin en jatu sa akin keyuniki, jatun chakabuwen jatu kupikinan. 20 Jakia janida nawabun enabu jatu iyukin jatun mae anu jatu bichitan en kena medibi jabukidi yuikin: ‘Nadan, Jehován enabubia jatun mai pakea anua jatu taxnimabidankin nenu jatu iwenibuki’, jatu akubainaibun 21 jatu achitan iyukin mae betsa anu jatu bichiabun Israelin xenipabun chakabuwen taexun nawabun en kena medibibiaken ea jatu yuanmaibu ninkakin uin en bika tenejaidakubainaii.22 Jaskawen taexun Israelin enabu ea jatu yuixuntanwen: Eska Jehován matu yuikiki, akinan. Israelin enabuun, jaska akin en kushipa en taxnimaxanaidan, matu medabewanun, iwanan, en akamaki. Jakia janida nawabu anu buxun ekidi man jatu chakabu janchamakubainai en kena medibi unankin jau jabundi ea unanxanunbun en axanaii. 23 Jatu anuxun man ea chitekin yuanbiaya ja nawabu bebunxun en kena medibi kushipa en jatu uinmaxanaii. En jatu jaska waxuna ea uin ea besti en Jehová jabun ea unankubainxankanikiki. Ea Jehován en jancha chanima en mestenwaiin. 24 Mai pakea betsa betsapa anu nawabu tibi anu matu iyunibu anua matu ana ikin ichawaxun matun mai pakea anu en ana matu chintunmaxanaii, janu man ana jiwei buxanunbunan. 25 Unpax kayabi bexnajaidawen matun beya betsa betsapa detsis keska en matu chukaxanaii, man yushibu dami kenwain man atimapamis tibi matu tede akin keyukinan. 26 Matu jaska watan juinti anu shinan bena inun en yushin kushipa bena en matuki mistuxanaii, ja matun juinti kushi mishki keska tsekatan juinti nuikipa mistukinan. 27 Matu medan en yushin mistuxun en yunuti jancha inun, en nemati jancha inun, en yusinti jancha man jawen jiwekin man ea uinunbun en matu chibanmakubainxanaii. 28 Ja mai pakea betsa matun xenipabu en jatu ibuwamani anu ana man jiwekunkainxanaii, man jadi ana jiwea man enabuwen taea eadi en matun mekenika Dios idiakunkainxanaii. 29 Jadixun matun beya chakabu betsa betsapa en matu putamaxanaii. Matun xekiwan trigo matu jamen axunkin en ana matu buni yunuama ixanaii. 30 Ja dikabi jau yudabu jiwebaunxun matu uinkubainunbun buni paewen man ana dakeyamaxanunbun matun miban ji inun matun bai anu miban tibi bimijaida en matu waxunkubainxanaii. 31 Jiwechakakin man chakabuwakubaini shinain, ea danain man atimapakubainiwen man ibubis dakekubainxanaii. 32 Israelin enabuun, ea Jehován en jancha chanima en mestenwain ea ninkakanwen. Na matu eska wakinan, ean en shinanen, en matu akamaki. Jaska man bechipaiai keska ibubis man chakabumiswen bika tenei itimaskai dakekubainkanwen, ibubis ma kenmiswen taeadan.
33 Ea Jehován en ana matu yuiai ea ninkakanwen. Matun chakabu matu pewakin keyutan matun mae tibi di iki chakabuni ana pewatan ja mae anu man jiwekubainxanunbun en matu yunuxanaii. 34 Mai pakea janu matun ibubu jiwepaunibu anu badi ichapa tsua janu jiweabumabiaken ja janu jiweabuma anuxun man ana bai bena wakubainxanaii. Tsuabuda janu kapukekin man ja mae uduai matu uinxankanikiki. 35 Jabu yuinamekin matukidi yuikin: ‘Na maidan, badi ichapa janu tsua jiweabuma ibiani ikis dasibi jawenduajaidaki, Edén anu Diosun bai jawendua wani keskadan. Jatun mae tibi bedankin chakabuwakin keyutan jenebainibu ikis ana pewatan mishki kenebaunkin keyutan janu ma jiwekanikiki’, akin matu yuixankanikiki. 36 Januxun ja nawabu matu dapi jiweabun ea unanxankanikiki. Ja mae bedankin chakabuwanibu en ana matu bena wamai inun matun yunu bai betsekin chakabuwanibu en ana matu banamai kai jaska bebunkidi en chanini en Jehován en ma matu amai jabun uinkin unanxankanikiki.
37 Ea Jehován en jatukidi yuiaidan, Israelin enabun jabun ea yukai binumakin en jatu pejaida waxunxanaii. Jabudan, chaxuwan xukua pamis keska wakin yuda ichapa en jatu pawakubainxanaii. 38 Janu besiaibutian ea kenwankin jatun chaxuwan xeni ea kuaxunun ika jatun chaxuwan bekin Jerusalén anu ichawakin mata wamisbu keskai mae tibi bedanbianibu anu ana yuda ichapa ichaxankanikiki. Jaskaibun ea en Jehová kushipa jiwea ea unanti wakin shinankubainxankanikiki”, akin Jehován ea yuia en jatu yuixuniki.
***************