Jatun nukun jiwea medabewai nun manakai jununbadikiaki, na janchadan
23
Chanima Jehován yuikin: “Chaxuwan mekenikabun jaskakin en chaxuwan ea jatu pe mekexunabuma en chaxuwan janida bui besti dasibainmisbu keskai enabu Israelbu janida bui benumisbuki. ¡Ja chaxuwan mekenikabu peidaxankanwan!” iwanan,2 Israelin enabu mekenika Dios Jehován jawen chaxuwan uinxunkin mekenikabu jatu yuikin: “Enabu meke pewama ubisita wakin paxa wakin man jatu nichinmaki. Man jaska wakin jatu chakabuwakubidanimawen taexun en matu kupikin unanmaxanaii. Ea en Jehován en jancha en mestenwaiin. 3 Janida mae betsa anu en jatu jadi nichini bunibu anua jabu enabu texe jiweabu ana jatu ichawatan ean kayabis jatun mai pepa anu en ana jatu chintunwanxanaii, januxun jau ana jatun bake pakubainxanunbunan. 4 Jau ana datei jiweyamakubainunbun jatun mekenika tibi watan en jatu mekemaxanaii, jau jawa nuitapayamanunbunan. Ea en Jehován en jancha en mestenwaiin”, itan
5 chanima Jehován mestenwankin ana yuikin:
“Ja xaba betsatian xanen ibu jununbadikiki,
Davidin baba betsa xanen ibujaida en waxanaii,
jawen mai pakea anua jawen yunuti kushipawen unanepakin
jatu yunukin padanananma pepas wakubainxanikiki.
6 Ja xanen ibu kainkin jatu yunukubainaya
Judán enabu unanuma pe mekeaibun
ja dikabi Israelin enabu unanuma jiwekubainxankanikiki.
Ja xanen ibu kenakinan, ‘Nukun Xanen Ibu Kushipa Maemanikaki’, akubainxankanikiki”, itan
7 chanima Jehován ana yuikin: “Badi betsatian ana ekidi datan aki yubakama ixankanikiki, ‘Jehová jiweatun jawen kenawen Israelin enabu Egipto anua kainmabidaniki’, akin yuiamadan. 8 Ana jadidia shinanma jakia Jehová datan akin yuikin: ‘Nawan mai pakea nortekidia inun nawan mai pakea betsa betsapa anu sa akin en jatu nichini anua Israelin enabu ana iwekin en jatu ichawaniwen taexun Jehová jiweatun kena en datan akaii’, ikin na jatun mai anu jiwexun besti jaska yui yubakakubainxankanikiki”, iniki.
***************