5 januxun Jehován ea yuikin: 6 “¿Eanan, man Israelbudan, jaska keska en matu adiatidumamen, ja mapu mabu wanikan ja mapu kenti waxu keska wakinan? Man Israelbudan, man en meken anuki, ja mapu mabu wanikan jawen mapu jawen mekenen tsuma keskadan. Ean matu jaska wakin en betsa watidu ea Jehován en jancha en mestenwaiin. 7 Jamen tsuada xukua betsabu inun jatun xanen ibubu jawaida jaska shinanbumabiaken en kushipawen jatu bedankin en jatu di adiatiduki. Ja inun, jatun mae anua nichinkinan, jatu chakabuwakin en jatu yamawatiduki. 8 Jakia tsuada xukua betsabu inun jatun xanen ibubun shinan betsakin jatun chakabu jenetan pe shinain jiwekubainaibu jaska jatun kupiti en jatuki tanabiashina ja chakabu en jatu anu yunuama ixanaii. 9 Ja inun, xukua betsabu inun jatun xanen ibubu betsabukidi shinankin duawakin ewawakin en jatu kushipa watiduki. 10 Jamen nawa xukuabun chakabuwaibu en jatu nemabia en jancha danankin ninkabumaken jaska en jatu duawakatsi pewabiashina shinan betsa watan en ana jawa jatu inanma ixanaii.

11 Jeremíasiin, Judán mai pakea anu jiwebaunabu inun Jerusalén anu jiweabu na jancha ea jatu yuixuntanwen, Jehován eska matu yuikiki, akinan. ‘Man jiwe chakamiswen taexun matu kupikatsi iki en matukidi yubakaii. Man jiwe chakakunkainai jenetan jaska man amis inun jaska man jiwemis jenei bextekedikanwen, shinan betsa waidan’, akin min ea jatu yuixunbia 12 jabun mia kemakin yuikin: ‘Jamen min jancha chakawayamawe. Jaska nun bechipaiai keska ma nun beyawani nun jiwekatsis ikaii, chakabubiai jawa jeneamadan’, mia waxankanikiki”, akin Jehován ea yuiniki.