5-6 Betsabube ana jatube padanananbukuanma, inun matunabuma beaibu ana jawa jatu ichakawama inun, bake ibuuma inun ainbu beneuma ana jatu ichakawama inun, na nenu jiweabu yudabun jawa chakabuwabuma detekin ana tenanma inun, ibubis chakabui atimapakin yushibu dami betsa ana kenwanma inun, matun jiwea man pewakubainai inun, jaska man ikunkainai shinan betsatan man pepaibudan, 7 na mai anu jawa jeneama matun xenipabu en jatu ibuwamani anu man jiweadan, en matu jiwemakubainxanaii.

8 Jamen padan jancha jawamabiaken jatu ikunwankin man ninkakubainmisbuki, 9 eska tibi meidan, yumetsukubainidan, juni betsa tenankinan, ainbu betsa beneya chutakinan, yuda betsaki jamen chanichakaidan, yushibu Baal kenwankin xeni ininipa kuaxunkinan, jaska en matu nemajaidabianiken yushibu betsa betsapabu bechipaikin kenwankinan. 10 Man jaskabiai na en kenwanti jiwe en medibi wani anu ea bebun nixun ea yukanun ika man bebidan bebidanmisbuki, ‘En mekei pea jiweaki’, ikadan. Jakia jaska en bechipaiama chakabu betsa betsapa man akubainai ean en ana tenetidumaki. 11 ¿Na kenwanti jiwe en medibi wabianiken ikis yumetsubun jiwe keska wakin ichakawakin man ea shinanmismen? Dasibi man jaska wakubainaidan, en matu uinkubainaii. Ea en Jehován en chanima janchawen en matu mestenwaiin. 12 Ja dikabi ja mae Siló ena wakin katutan janu dukun eki nukuti tadi jiwe en jatu puntemani anu janu buxun uintankanwen, en jaska wanimenkainan, Israelin enabu ja Siló mae anuxun chakabuwaibuwen taexunan. 13 Man chakabu betsa betsapa wai matu shinan betsawamakin en matu yuibiakubaina man ea ninkakatsi ikama iniki, ea jawa kemamadan. Ea en Jehován en chanima janchawen en matu mestenwaiin. 14 Jaskawen taexun ja en kenwanti jiwe medibi Siló anua en chakabuwani keska wakin matun xenipabu inun matubu na en kenwanti jiwe matu medibi wamatan en kena en netani ja man jaki chiti ikabu jabiaskadi wakin en chakabuwaxanaii. 15 Matu jaska besti wama ea bebunua matu putakin chaijaida en matu nichinxanaii, Efraínen enabun ea ana chibanbuma en jatu nichini keska wadiakinan”, iwanan,

16 “Jeremíasiin, mianan, na yudabukidi ea yukakin ana ea jancha wayamaxanwen. Jatuwen dabanan ikin ea ea ayamawe. Jatuwen nui ekidi jatu janchaxunyamawe. Jatukidi en mia ninkamawen taexun jawenchains yukakin ea bika wayamaxanwen. 17 Judán enabun mae tibi anuxun inun Jerusalén anuxun jaska jabun akaibu ¿min jatu uianmamen? 18 Bake mishtinbun kadu metax ichawakin manchiainbun jatun ibu junibun chi keti waibun ainbuaibun xekiwan trigo dudu misi wakatsi pewakin kamuskin texwaxun misi watan dami yushibu ainbu jawen kena Nai Xanen Ibu jawen dami bebunxun kenwankin ja misi inankubainmisbuki. Jaska wakin ea danankin nawabun yushibubu kenwankin uva vino inain man eki sinatamisbuki. 19 Jakia eki sinatabiai eki sinatama jaskaidan, ibubis jatumebi daketapai ichakanikakubainmisbuki. Ea en Jehován en jancha en mestenwaiin. 20 Jaskamisbuwen taea eadi bedukukaun jatuki en sinata paepai ea uinxankanikiki, na en kenwanti jiwe inun, na mae anu jiweabu inun, jatun inabu inun, jatun miban ji shadabu inun, jatun yunu tsekadiabuma en kupixanaii, bai ewapa ketian ji ikainai tsuan nukawatiduma keska wakinan. Jaska Jehován chanima en matu yuiaii”, ikin

21 Israelin enabu mekenika Dios Jehová kushipajaida dasibi binu keyuatun jawenabu yuikin: “Ea jawen kenwankin ina jidabi menukin keyukubainkin chaxuwan tesenxun jawen bichi dashpexun jawen nami xatexun jati man akatsi ikai ea benimawakin jawen xeni menu keyukin jawen nami pichanxun pikubainxankanwen, en jatu aniki. 22 Jakia Egipto anua matun xenipabu en jatu taxnimabidanaitian Mati Sinaí anuxun inabu jidabi menukin keyutidubu inun chaxuwan xeni kuatan jawen nami juatan pitidubukidi yunukin en jatu yuidiama 23 jau ea dukun ninkakubainxanunbun en jatu yunukin taewaniki. Jaska en jatu yunua akubainaibu enabu jatu watan jatun mekenika Dios en ikunkainxanaii”, iwanan, “en jatu yuiniki, jau jabu ea jiwei pexunkubainxanunbunan. 24 En jatu jaska wabiani en jaska bechipaiai akin ea benimawama en jancha danankin jatun juinti kushi watan ea ninkama jatun chakabu putama jaska besti shinankin akatsi iki jiwekubainibuki. Ea anu ana chintuin bekatsi ikama chakabu jenekatsi ikama eki pechinibuki. 25 Egipto anua matun xenipabu taxnibidanibutian inun na jabiatiandi en jancha yuixunikabu betsa betsapa en matu anu yunuakeakekubidanmiski. 26 Jakia matubun ea ninkakatsi ikama en jaska matu yunuai chibankin ea axuanma juinti kushijaidatan chakabuwakin matun xenipabu man binujaidaii”, iwanan,

27 “Jeremíasiin, mia jawa ninkabumabiaken na en jancha jatu yuikubainxanwen. Mia jawa kemabumabiaken jui kushipawen jatu yuixanwen, 28 eska jatu wakinan: ‘Matun mekenika Dios Jehován matu yunubia ja yudabu man jiweabu matu pewapanan man ea jawa ninkakin chibainsbumaki. Matun jancha chanima matun kexa anu ana jayamajaidakiaki’, akin ea jatu yuixunxanwen”, akin Jehován ea yuimaki.