Jehován jancha Israelin enabun ninkama ikubidanibukiaki, na janchadan
6
16 Israelin enabu Jehován ana jatu yuikin:“Bai xexa dabe anu kai niti ixun uinkanwen.
Jadatu bai jashu pepa matun xenipabun unanibu jatu yukakanwen.
Ja bai pepa bechitan jawen kai janu matun yushin juindukunxanai anu
man jaki nukuxanaii”, en matu wabia
matun ea kemakin yuikin:
“Jaskamaki. Ja baiwen nun ana kakatsi ikamaki”, man ikaya
17 Jehován jawen uinika matu waxuntan jatu nichintan Israelin enabu yuikin:
“Matuki sinataibu beaibu matu unanmakin
ja uinikatun jawen trompeta chan chan akaya
ninka besti mapuyamakubainxankanwen”, jatu wa
jakia ja junibun kemakin ea yuikin:
“Jawen unanmati nuku jaskawen chaniai nun ana ninkakatsi ikamaki”, ikaibun
18 jaskaibuwen taexun Jehován nawabu yuikin:
“Enabu Israelbudan, jaska en jatu axanai man unanxanunbun
matu yuinun ea ninkakanwen.
19 Mai jidabi anu jiweabuun, ea ninkaidakanwen.
En yunuti jancha inun en nemati jancha danankin
en jancha en jatu yuikubidani
jawa tapinsbumawen taexun
jawada jabun bechipaisbuma
chakabu atimapa jatu anu en yunuxanaii.
Jabu yubakai peama juni chakabu yubakamisbu keskai
atimapanibuwen taexun jatun chakabu jakimakatsis ikama
en jatu ichakawaxanaii.
20 Sabá mai pakea anua xeni ininipa inun
mai pakea betsa chaikea miban jua ininjaida
¿jaskakin man ea bexunmisbumen, ea benimawanun, iwananan?
Ea duawanun, iwanan, en chi tapu anuxun inabu
man ea menuxunmisbu inun jawen xeni man ea kuaxunmisbudan,
ean en ja ana bechipai jawen benimamaki”, iwanan,
21 jaskawen taexun Jehován ana yuikin:
“Juti ikain jau di ikubainxanunbun
mishki keska jawada chakabu jatu bebun en datan
jatun ibubu inun, jatun juni bakebu inun,
jatu dapi jiweabu inun, jatun jaibuaibu di iki
jabiaswen mawaxankanikiki”, iwanan,
Nortekidia detenamenikabu ichapajaida bekin jatu achixankanikiaki, na janchadan
22 Jehován ana yuikin:
“Chaijaida mai pakea betsa nortekidia
nawa xukua betsa kushipa betsajaidabu benun,
iwanan, jatun detenameti pewakanikiki.
23 Pia midimaya inun jatun machatu chaipa kenujaidaya bei,
tsuawen nuisbuma pubenjaidabu, ianenwan buspu tsaubidanai keskai
sai sai ikubidani caballoki katsaumebidanxankanikiki,
Davidin mae Sión detetan achinun ika beidan”, jatu wa
24 Jerusalén anuxun yudan kaianen yuikin:
“Mesejaida beai uatian nun ninkashinaki.
Datei punu nukai nun ana jawa kushipa jayamaki.
Ainbu bake kain isinmis keskai
itimaskai nun isin tenejaidaii.
25 Nukuki sinataibu jatun detenametiya mae tibi anua
mese meseaibuwen taea
¡matun bai anu ana taxnibainyamakanwen!
¡Jamapai bai tibiwen ana mapuyamakanwen!” ikaibun
26 ean jatu yuikin:
“Man en mae en matu bechipaiaidan, man ea peidaxunxankanwan.
Detekin yamawanun ika
nuku anu bei jawaidabidanxanaibuwen taexun
jawen bika teneai uinmati
tadi bexa sawetan chi mapu dapuxeketan
matun juni bake bestichai mawaken
man kaxai bis bis itidu keskai kaxajaidakubainkanwen”,
en jatu waya
27 januxun Jehován ea yuikin: “Enabu min jatu unanti wakubainxanun en mia yunuaii. Jaska en jatu yunua ikaibu jaskada jatun shinanmenkain, uinkin ea jatu unantijaida waxunxanwen”, ea wa
28 ean kemakin yuikin:
“Jehováan, ja dasibi yudabunan, tsuan ninkaisbumaki.
Yuananain atimapai jiweabuki.
Jatun shinan kushijaidabuki,
mane bronce inun due keskabudan.
29 Shunbun jawen detsis bikatsi chi ji akin kukatsa akin kuajaidatan
jawen tane bemakis nunua bewetan udenkin
shunbun jas wamisbu keska wakin
jatu bika tenejaidamakin min jatu pewapanan
jatun chakabu putaisbumaki.
30 Jehováan, min ma jatu putawen taexun
minabu jatu metukin yuikin:
‘Plata detsisya dananmisbu keskabuki’,
akin jatu kenakubainxankanikiki.”