Israelin enabun Jehová danankin chiban pewama inibukiaki, na janchadan
2
Betsatian Jehován ana ea jancha wakin yuikin:2 “Jerusalén anu kaxun jadi jiweabu ea jatu jancha waxuntanwen,
jau ninka pe wanunbun
jui kushipawen jatu yuitanwen:
‘Eska Jehován matu yuikiki.
Matun xenipabu anibudiama inun yuxabudiabuman
en jancha chibankin ea dananma inibu en jatu shinaiin.
En jatu ainwankin akawa ea bechipainibuki.
Janu tsua jiwexun mibankin uduisbumanu
en jatu iwea kapukekubidankin
matun xenipabun ea chibankubidanibuki.
3 Israelin enabu ena wakin jatu paxkatan en jatu medibi waniki,
bimi pepa ja dukun tsekaxun adumisbu keska wakinan.
Tsuanda enabu ichakawakin jatu bika tenemaibu
ean jatu kupixundiakin atimapa chakabu en jatu anu yunupauniki.
Ea en Jehován en chanima janchawen en mia mestenwaiin’ ”, ea waniki.
4-5 Betsatian ana jatu yuikin:
Jacobun enabu Israelin bakebu xukuabu tibibuun,
Jehován eska matu jancha waikiki, ninkakanwen.
“Matun xenipabunan, ¿en jawa jatu chakabuwa
ea anua bechitan ea jenebainimabumen?
Ja dios kayabima jamen dami chibainmabudan,
ibubis maetan jatumebi jawa ana kushipa jayabumaki.
6 Matun xenipabu Egipto anua en jatu taxnimabidankin
mai chakabu taxka unpax jayama anu inun,
jamapai mese tibi jaya janu tsua jiweama inun,
janu tsua kapukekainsma anu jatu iwekubidankin
nenu en jatu jiwemabiani
en ana jatu medabewatiduma dabanen ikin ea ana benakin
matun xenipabun ea shinanma inibuki.
7 Janua yunu inun bimi pepa jau pikubainxanunbun
na mai pepa anu min xenipabu iwexun
en jatu ibu wamaniki.
En jatu ibu wamani anu matudi kaintan janua yumetan
en mai chakabuwakin atimapa wakin
man ea dananmakin ea jatsanmaii.
8 Matunabu ebe matu janchaxunikabun ea benabumaki.
Moisin jancha una jayabia jawen ea unanbiakin
yusinanbun ea shinanbumaki.
Matun xanen ibubun en jancha bechipaiama ea danankubainibuki.
En jancha yuixunikabun yushibu Baal janchaxunkubainibuki.
Yushibu dami tibi jawa medabewatidubumajaida jamen kenwankubainibuki”, ikin
Israelin enabu Jehován jatu chitenikiaki, na janchadan
9 “Eskawen taexun ea Jehován eska en matu mestenwaiin:
Matu inun matun bababu en matuki ja iki taeaii.
10-11 Nawabun ea ikunwanbuman yushibu kenwankin jenetan
yushibu betsa kenwain maeakeakekanimenkain,
benabaunkin jau uin pewatanunbun
mae ewapa Quedar anu tsuada yunukanwen.
Jabiaskadiakanimenkainan, yushibu tibi kenwain maeidan.
Jatu uin badi kaikidi natukan betsa betsapa anu butankanwen.
Ja yushibubu dios kayabima maewakin betsa katuisbumaki.
Jakia man enabunan, ea bechipaiama man ma ea jeneabuki,
en matun mekenan kushipa en duapa matun xenipabun ea uinbianibunan.
Jaska wakin damipan jawa jatu medabewatidumabiaken chibankin
enabun ea jenenibuki.
12 Nai anuabuun, jaska en yuixu ninkai mesejaidakubainkanwen,
datei saki saki ikidan.
Ea en Jehován en chanima janchawen en mestenwaiin.
13 Israelin enabu en jatu ibuwabiani
ichapajaidaki chakabui kextunibuki.
En jatun jiwemati chacha unpax keskabiaken
ea jenebainibuki.
Jaskakin jatumebi mishki pukintan unpax aduti keska wabia
ibubis pesetan jani ana unpax matati jayama keskai
yushibubu kushipa jayama dami watan chibankubainibuki.
Israelin enabun Dios jenekubainaibu jatu kupikubainikiaki, na janchadan
14 Israelin enabu tsuan dayadu esclavomaki.
Jatun ibu esclavoma ibianiwen taea
Israelin enabu esclavo kainyama inibuki.
¿Jaskakin nawabun jatu achitan jatuna wamisbumen?
15 ¿Jaskakin inu betsa león pubein tekeden tekeden ikidanai keskakin
minabu jatu mesewakubainmisbumen?
Matun mai pakea chakabuwakin keyubaunkin
matun maewan tibi kuakubaunmisbudan,
janu tsua ana jayabumaki.
16 Egipto anu maewan dabe Menfis inun Tafnes anua bexun
matun buxka matu pusa pusa abaunkin keyuyamabuki.
17 Na eska nawabun matu wakinan,
ea en matun mekenika Jehován en baiwen en matu iyubia ea chibanma
man ea jeneabuwen taexun matu ichakawamisbuki,
en ana jawa matu jatu nemaxunamadan.
18 ¿Jaskai Jene Nilo anu unpax anun ikai keskai
Egipto anu man kamismen,
jau matu medabei benunbun jatu benaidan?
¿Jaskai Jene Éufrates unpax anun ikai keskai
Asiria anu man jamen kamismen,
jau matu medabewai benunbun jatu benaidan?
19 Man jaskamiswen taea matun chakabuwen ibubis man kupiti bikubainaii.
Duawakin man ea ninkaismawen taea ibubis man benuxanaii.
En ea Jehová en matun mekenikabia
man ekidi janchai peama ea jenekubainmisbudan,
mesejaida inun chakabujaida man tenekubainxanaii.
Jaska uinkin mekin shinankubainxankanwen.
En Jehová kushipa dasibi binuawen taea
en jancha en mestenwaiin”, iwanan,
Israelin enabun Dios danankin sinatamanibukiaki, na janchadan
20 “Badi ichapa jiwekubidankin
en jancha ninkakatsi ikama man ea danankubidaniki.
Januxun matun ea yuikin:
‘Jehová en duawakatsi ikamaki’, ibiatan
mati keyatapa tibi inun,
ji ewapa tupanyan naman tibi anu
yushibu dami bebun danti iki
beti ixun man chutamakin akawakubainmiski.
21 Uva nishi pepa katutan en matu banakin akawaniki, jiwemakinan.
Jakia pepa ibiani chakabui man pikukunkainaiwen taea
en matu unanbiani ikis man tsuabuda en ana matu unanmaki.
22 Lejia inun jabón ichapajaidawen man chakabumis daxkijaidabiakin
matun chakabu meshu detsis keska
ea bebunua man tuxkutidumaki.
Ea en Jehován en chanima janchawen en matu mestenwaiin”, iki en jaskaya
23 matu iki: “ ‘Nukudan, nun jawa meshu detsismaki.
Yushibubu chani nun kenwainsmaki’, ikin man yuibiaidan,
paxku napaku anuxun june chakabu jawada man akubainima shinankanwen.
Chakabu dasibi man akubainmis uinkin shinankubainkanwen.
Camella yuxan depesekeuma jamebi nia ishchuakeakemis keskakin
chakabu man chibanmiski.
24 Asna yuxan inama mati matipa anu nia
jimi iki jawen bene benai kaxamis keskakin
chakabu bechipaikin man benakubainmisbuki.
Yuxan jimi ikin jawen benewen kemuai tsuan meketiduma keskakin
chakabuwen man kemukunkainmiski.
Yuxan jimi ikai benen xetekin benabaunkin
jin ikama jawaida jaki nukumis keskakin
chakabun matu achimiski.
25 Israelin enabuun, nawan yushibubu jawaida chibain
matun bichi tae sawediama ibubis kai ichakanikayamakanwen.
Yushibubu kenwain sai sai iki
matun jui menuyamakanwen, jamenan.
Jakia matun ea yuikin:
‘Nun jaska jenetidumaki.
Nawan yushibu betsa bechipaikin en beyawaniwen taea
jatube nia en ikaii’, man imiski”, iwanan,
Israelin enabu atimapa jiweabuwen taexun Jehován jatu kupixanikiaki, na janchadan
26 “Yumetsu bechixun chiteabu dakemis keskai Israelin enabudan,
jaska keskai man dakekunkainxanaii.
Ja maewan anu man jiweabu inun, matun xanen ibujaidabu inun,
matun xanen ibu bexmasbu inun,
matunabu ebe janchaxunikabu inun,
en jancha yuixunikabu man dakekunkainxanaii.
27 Ji senke dami wakin juni wanibu yuikin:
‘Miadan, min en epaki’, akin
mishki dami wakin ainbu wanibu yuikin:
‘Miadan, min en ewaki’, akin jabu jaska wabiakin
jamen eki ikidan, eki pechitan
ea bechankamexun uinmaismabia
janu chakabu matu anu juaitian datekin ea yuikin:
‘Jatu nemakin nuku mekei menan judiwe’,
ikin man ea kenamisbuki.
28 Judán enabuun, ¿jania matun mekenika dami man akubainimadan?
Matun mae tibi anu yushibu midima man jayaki.
Matu ichakawai beaibun
¿matun yushibu damipan matu medabewakin matu paxawai betidubumen?
29 Dasibibu man eki ja imisbuki,
eki sinatai ea danan paepawaidan.
Ea en Jehován en chanima janchawen en matu mestenwaiin.
30 Matun bakebu en jatu yusinbia jawa tapianbumabiaken
jamen en jatu kupimiski.
Matudan, pubenepa man inu betsa león keskabuki.
En jancha yuixunikabu en matu yunua
jatuki sinatakin man jatu tenankubainmisbuki.
31 Ja dikabi man ikis jiweabudan,
pestan Jehován jancha ninkakanwen.
Israelin enabuun, eadan, man ea uianan,
¿en janu tsua jiweabumanu keskamen, jawa jayamadan?
¿Mai anu badi pexeama
en matu anua junea keskamen?
En jaska matu ixuinsmaki.
Enabuun, ¿jaskai jancha chakabukin yuikin:
‘Nukun yununika nun jayamawen taea
mia anu nun ana chintunkatsi ikamaki’,
man ikunkainai?
32 Chipash beneyai kakinan,
¿jawen dauti jawendua saweidan, jakimatidumen?
Jakimatidumajaidaki.
Jamen man enabudan, badi ichapa kakunkainkin man ea jakimakunkainaii.
33 Jawada chakabuwen kemui bechipaikin benabaunkin
beya chakabu tibi man unanjaidakubainaii.
Januxun chakabu tapiainbu anua man jatun yusinanki.
34 Jawada yudabun chakabuwaibuki nukutan jatu chiteamabia
nuitapaibu inun pepabu detekin tenankubaini
matun tadi jimiwen man iduma keskaki.
35 Man jaskabiakunkainmis ibubis yuikin:
‘En jawa jatu chakabuwaismaki.
Eki jawa Dios sinatama ixanikiki’, ikin man junebiakubainmis uinxankanwen.
Eanan, xabakabi en matu unanti waxanaii,
man pemenkain, man chakabumenkainan,
jawen taexun matu kupikatsidan.
36 ¿Jaskai jawaida man medabenanti betsa benamisbumen?
Ja Asiria nawabun matu ana medabewatiduma babushinabun
jaska jau Egipto nawabun matu medabewanunbun
man benaibudan, babudiaxankanikiki.
37 Egipto nawabun matu medabewamawen taea
dakeyabi jabun mai pakea anua man chintunxanaii.
Jatuki chiti iki jatu jaibuwanun ika man ibiaya
en jatu matu dananma man jatube jaibunameama ixanaii”,
akin Jehován jatu yuinikiaki.
***************