JEREMÍAS
Jeremías Diosun jancha yuixunika taenikiaki, na janchadan
1
Hilquíasin juni bake Jeremíasin yuini inun akubaini matu yuinun ninkakanwen. Benjamínen enabun mai pakea anu mae betsa Anatot anu Jeremías jiweniki. Jawen epa inun jawen xenipabu junibu jawenabu Diosbe janchaxunikabu ipaunibuki. 2 Judán enabun mai pakea anu Jerusalén anu Amónen juni bake Josías xanen ibukunkaini ma 13 año kainaitian Jehová Jeremíasbe janchai taeniki. 3 Ja dikabi Jerusalén anu Josíasin juni bake Joaquim xanen ibukunkainaitian inun Josíasin juni bake betsa maxku Sedequíasdi xanen ibuyama 11 año kainaitian Jehová jabe janchakunkainiki. Janua jabias 11 añotian 5 uxe kaya Jerusalén Babilonia anuabun achitan janu jiweabu Babilonia anu jatu iyuaibun Jehová Jeremíasbe janchakunkainiki.Jehován Jeremías katutan kushipawanikiaki, na janchadan
4 Jehován ea jancha wakin yuikin:
5 “Min ibubun mia bikin nanediama
bebunkidi en mia katuniki.
Minabu xukuabu tibi jiwebaunabu anu
en jancha ea yuixunika min ikunkainxanun
min kaindiama ean mia medibi wakin en mia paxkaniki”, ea wa
6 ean kemakin yuikin:
“¡Min ea peidawawa! Jehováan, en bedunan
en jancha tapinkin en unandiamaki”, akin
7 en jaska wabia Jehován ea yuikin:
“ ‘En bedunanki’, ikin yuiyamawe.
Janu en mia yunuai anu min kakunkainxanaii.
Jaska en mia janchamai janchakin min jatu yuikubainxanaii.
8 Jaska en mia yunuaiwen taeadan, tsuki dateyamakunkainxanwen.
Eanan, mia mekei mibe kakin
en mia medabewaxanaii.
Ea Jehován chanima en jancha en mia inaiin”, iwanan,
9 Jehován mexunkidan en kexa mekin ea yuikin:
10 “Min kexa anu en jancha mistukin en mia inaiin.
Natian mia tsuan binutidumawakin en mia kushipawaii.
Xanen ibu kushipabu inun dasibi nawabu jiwebaunabu
min jatu betsea keska waxanai inun betsabu min jatu bedanxanaii.
Betsabu jatu nuitapawakin min jatu yamawaxanaii.
Betsabu min jatu denekin akawaxanaii.
Ja dikabi betsabu medabewakin min jatu ana benixanaii,
miban ana banakin jatu akawakinan”, iwanan,
11 januxun ea uinmakin Jehován ea yukakin:
“Jeremíasiin, ¿jawa min uiain?” ea wa
ean kemakin yuikin:
“Almendro ji mebi en uiaiin”, en wa
12 Jehován ea ana yuikin:
“Jaska chanima min pe yuiaii.
Jaska en yunua jau chibankin menekubainunbun
eadi uxama en uinkubainxanaii”, ea watan,
13 ana ja kachu Jehován ea yukakin:
“¿Min jawa uiain?” ea wa
ean kemakin:
“Kenti pichanmea kukatsa iki ma nortekidi kexkan
jukukatsis ikai en uiaiin”, en wa
14 Jehován ana ea yuikin:
“Ja mai pakea nortekidi jiweabu
chakabu atimapa bekin jatu na mai pakea achixankanikiki.
15 Ea Jehován chanima en jaska waxanai en mia yuiaii.
Nortekidia xanen ibu betsa betsapa dasibibu
jawen detenamenikabuya
en jatu kenaxanaii.
Mae tibi anu xanen ibubu bea Jerusalén jikiti xui tibi bebun inun
Judán mai pakea mae bekex tibi mishkiwen kenebaunibu kexebaunxun
jatu yunukin jatun xanen ibu tibi tsauti anu tsaubaunxankanikiki.
16 Nawabun jatun yushibu dami watan kenwanmisbu
enabundi ja dami kenwankin
ja bebunxun xeni ininipa kuakubainkin
ea danankin jenenibuwen taexun
ja chakabubu jau jatu kupinunbun
xanen ibu chakabubu jatu anu en yunuxanaii.
17 Miadan, ibubis kushipawe, jawa dateamadan.
Jatu anu kaxun
en jancha dasibi mia yuikin en mia yunuxu
jatu yuikubaintanwen.
Jaska en mia yunuai min betsa waya
jatu bebunxun en mia saki saki imatiduwen taea
jatuwen dateyamaxanwen.
18 Judán enabun mai pakea anu jiweabu
jatun xanen ibujaidabu inun,
jatun xanen ibu yununika bexmasbu inun,
minabu ebe janchaxunikabu inun,
yudabu mae anu jiwebaunabu bebunxun
min jatu nemakubainxanun
mae mishkiwen kenebaunkin keyatapa wanibu keska mia wakin inun,
mane hierro chibu kushipa keska mia wakin
broncewen mae kenebaunibu keska mia watan
ikis ean mia nichinkin en mia yunuaii.
19 Mia mekei en mibe kakunkainxanaiwen taexun
jabun mia ninkama miki sinatabiakin
mia jawa binumama ixankanikiki.
Ea Jehován chanima en jancha en mia inaiin.”