Jaska Jeremíasin jatu yuia bechipaiama tenankeanibukiaki, na janchadan
26
Judán enabu mai pakea anu Josíasin juni bake Joaquim xanen ibui taekainaya Jeremías Jehován yunukin 2 yuikin: “Templo anuxun ea kenwain Judán enabun mai pakea jatun mae tibi anua bemisbu jatu yuinun ika en Templo jemaintin anu ka nixun ja jancha mia yuikin en mia yunushina dasibi jatu yuitanwen, jawa jancha betsa jeneamadan. 3 Jentsan, jaska mia ninkatan jatun chakabu jenexankanimenkainan. Jaskaibun ean jaska en shinanshina jatun chakabuwen taexun jatu kupiama en shinan betsa watiduki. 4 Eska Jehován matukidi yuikiki. Ea ninkakanwen: ‘Man ea ninkabuma inun jaska en matu yusini man akama 5 inun en dayadubu en jancha yuixunikabu en matu anu yunukubaina matu yusinbiabu man jawa ninkama en jancha man dananmisbuwen taexun 6 jaska Siló anuxun en tadi jiwe medibibiaken chakabuwakin en yamawani keska wakin na Templo jiwedi en jabiaskadi waxanaii. Mai jidabi anu nawa betsa betsapa xukuabu tibitun jau ja uinkin shinanpakexanunbun na maewan Jerusaléndi chakabuwakin en atimapa waxanaii. Jaska en jancha ea jatu yuixuntanwen’, ea wa”,7 Templo jemaintin anu kaxun jabias jancha Jeremíasin jatu yuiai jawenabu Diosbe janchaxunikabu inun, Diosun jancha yuixunika chakabubu inun, yudan kaianen ninkaibun 8 jaska Jehován yunuxu Jeremíasin jatu yuikin keyuaya Diosbe jawenabu janchaxunikabu inun, Diosun jancha yuixunika chakabubu inun, yudan kaianen jawen jancha ninkatan jaki sinatakin achixun yuikin: “Ibubis min janchawen taea min mawaii. 9 Siló anua yupukin atimapa wani keska wakin na Templo axanikiki. Ja inun, nukun maewan Jerusalén yamawakin keyuabu nenu yudabu ana jiweama ixankanikiki”, iwanan, dateama, “en Jehová janchaxunaii”, ikin “¿jaskakin ibubis min jaska jancha yuixumen?” akeakeabu Templo jemaintin anuxun dasibibun Jeremías kebaunxun
10 Judán enabu xanen ibu inun xanen ibu bexmasbun ja jaska waibu ninkatan xanen ibujaidatun jiwe anua taxnibidani Templo jemaintin anu jikia jaskaibu unanti wanun ika janu jikiti xui jawen kenadan, “Bena” ja bebun tsauabun 11 Jeremías jatu bebun iwexun ja xanen ibubu inun yudan kaian dasibi ichabu jatu ninkamakin jawenabu Diosbe janchaxunikabu inun Diosun jancha yuixunika chakabubun jatu yuikin: “Na juninan, nukun maewan atimapa waxanaibukidi chanichakaxuwen taexun jatu yunukanwen, jau tenanunbunan, jaskai dasibibun ma nun ninkakanxuwen taexunan”, akaibun
12 xanen ibubu inun yudan kaian Jeremíasin ana jatu yuikin: “Jaska na Templo inun nukun maewankidi en janchai man ninkaxudan, emebi en ikamaki. Jehován jawen kena kushipawen ea yunua jua en chanixuki. 13 Jaska man jiwe chakakunkainai inun jaska man atimapamis matun shinan betsa watan shinandikanwen. Matun mekenika Dios Jehován jancha ninkakin man akubainaya jaska en matu yuixu keska matu anu chakabu yunuama ixanikiaki. 14 Jamen ea akinan, jaska man ea wakatsis ikai ea adikanwen, en yuda en ma matu bexuankidan. 15 Jawen jancha xabakabi dasibi en matu yuinun chanima Jehován ea yunushinaki. Na en matu yuixu jaska shinankatsi ikama en jawamabiaken man ea tenanan, matubu inun nenu jiweabu matumebi man chakabu ikunkainxanaii. Shinaindakanwen”, jatu wa
16 janua xanen ibubu inun yuda kaianen jawenabu Diosbe janchaxunikabu inun Diosun jancha yuixunika chakabubu jatu yuikin: “Nukun mekenan Jehován kena kushipawen nuku jancha waikiki. Ja juni jau tenanunbun jawawen taexun nun jatu yunutidumaki”, ikaibun
17 anibu unanepabu ichabu anua betsa benikaun ja yudan kaian jatu yuikin: 18 “Judán enabu anua Ezequías xanen ibujaidakin jatu yunukubainaitian mae betsa Moreset anua yumeni Diosun jancha yuixunika Miqueasin Judán enabu Jehová janchaxunkin: ‘Eska Jehová kushipajaida dasibi binuatun matu yuikiki. Ninkakanwen:
Mati Sión betsaidan, janu dayati bai besti ixanikiki.
Jerusalén tekei keyui di ika janus jawen mishki mania ikunkainxanikiki.
Templo mati anudan,
chaka besti benei bexexanikiki’, jatu waya
19 ¿Xanen ibujaida Ezequías inun Judán enabun Miqueas tenanibumen? Jaska wamajaida inibuki. Jakia Jehováki datekin jau jatuwen nuinun xanen ibujaida Ezequíasin Jehová ea akimawen taexun jaska jatu yuima keska jatu anu chakabu Jehován yunuama inikiaki. Nukubudi jaskakatsi ikama ibubis chakabujaidakin Jeremías tenanyamanankanwen, ibubis chakabukin Dios sinatamamadan.
20 Jamen betsadan maewan betsa Quiriat-jearim anua yumeni Semaíasin juni bake Diosun jancha yuixunika Urías Jehován kena kushipawen na maewan inun nukun mai pakeakidi chakabu jatu yuiniki, jaska Jeremíasin nuku yuiai keskadan. 21 Jaska Uríasin yuiai xanen ibujaida Joaquim inun, jawen medabewanikabu inun, jawen xanen ibu bexmasbun ninkaibun Joaquimnen Urías jatu tenanmakatsi ikaya ninkakin tapintan datei Egipto anu Urías paxabiaken 22 Acborin juni bake Elnatán inun juni betsabun jau achixuntanunbun xanen ibu Joaquimnen jatu yunua 23 jadi buxun Urías achixuntankin iwexun xanen ibu Joaquim bebun nichianbu Joaquimnen jatu yunua Urías tenantan janu nuitapaibu mawa jatu putamisbu anu kini anu jawen yuda udenibukiaki”, akin
24 Safánen juni bake Ahicam Jeremías janchaxunaiwen taea jau yudan kaianen tenanunbun xanen ibubun Jeremías jatu yunuama inibukiaki.
***************