22
Oro mane inun plata mane midima jayabiabunpepai min jiwekunkainai inun
dasibibun kaka pepa mikidi yuibaunaibudan,
ja mane kadu shadabu min jatu binujaidaki.
2 Mabuyabu inun mabuumabu
ja dabe Jehován matu dami wanidan,
betsama man jabiaska dabes jawenabuki.
3 Tsuada bebunkidi shinan pewanikabun
jawada mese uinkin dunkekubainmisbuki.
Jakia tsuada bebunkidi jawa shinainsbuman
mese uinbiai ninkamas nakubaini
jamapai shadabu bika tenekubainmisbuki.
4 Jehováki mesekin jawen jancha ninkai
jawa keinsbuma pe jiweaibuwen taexunan,
Jehován jatu manakukin mabuya wakin
jawenabu jatu kenwanmakin
jatu pe jiwemakubainmiski.
5 Juni chakabubu jiwekubaini mapukinan,
jawen jatu ichakawakin bepadanaibu ichapa uinkubainmisbuki.
Jakia tsuanda ibubis jawen jiwea pe mekekubainkinan,
jawada chakabu tibi dunkebainmisbuki.
6 Na jabiatian matun bakebu tapinmakinan,
yusian pepawen jatu akanwen.
Chipu ewatan jaska min jatu yusini
jawa jene taskama mestebuyabis jawen jiwekubainxankanikiki.
7 Mabuyabu xanen ibukin
jabu nuitapaibu jatu yunukubainmisbuki.
Tsuanda jatu pei bianyumisbun
jabun dibiabu jatu dayamamisbuki,
jawen tsuma keska watanan.
8 Tsuanda chakabuwakubainkin
chakabudi tenekin mekubainaibun
januxun Jehová jatuki sinatakin jatu yamawaxanikiki,
jawen mestenti kushipawen jatu kushakinan.
9 Tsuanda nuitapaibu uinkin jatuwen nuikin
jawen piti jatu paxkaxunkin
jatu inankubainmiswen taexun
Diosun jabudi uinkin jatu duawaxanikiki.
10 Enjen iki yuda betsabuki kaxemisbu
mae anua tsuanda man jatu nichinxuna
ja jabe ja iki yupukunanmisbu mainxankanikiki,
ana janchawen tsua detenameabumadan.
11 Tsuanda jawen shinan chanima uinmakin
duapa janchawen xanen ibu janchakin benimawaibu
xanen ibu pepatun jatu bechipaijaidakin
jatu jaibuwamisbuki.
12 Jehován unanepabu jatu mekekin jatu uinkubainaya
chani chakamisbun jatu yuikin:
“Chanima nun matu yuiaii”,
ibiai chani chakaibu
Jehován jatu xabakabi kayati wamakin
jatu unanti wamamiski.
13 Chikishi jawaki bepadametima
dayakatsi ikamawen taexun
jawenabu padankin yuikin:
“Bai namaki inu betsa león manakananmiski.
Eki nukutan ea pitiduki.
En jawa kamaki”, ikin yuimisbuki.
14 Ainbu jininipatun jawen janchawen mia kemumaidan,
mai kini keyatapajaida keskaki.
Jaskawen taea janu Jehován tsuada ma yupua
tin imisbu anu jatundi janu mia iyutiduki.
15 Bedunanbun shinan pepa unanmadan,
unainsmapatun shinan chibain patapakubainaibu
januxun jatu pewakin jatu kusha kusha akin
ninkamakin jatun patapa jenematidubuki.
16 Juni mabuyabiakainkin
mabu inun pei ana binun, iwanan,
nuitapaibu jatu ichakawakin
mabujaidayabu besti jawen mabu jatu inankubainmisbudan,
chipu jadi nuitapaxanikiki,
ana mabu inun pei jayamaidan.
***************