Xanen ibujaida Lemuelin unanepa janchakiaki, na janchadan
31
Eska jawen ewan yusian ninkanixun Masá anua xanen ibujaida Lemuelin jatu kenemakubainikiaki.2 Kukaan, Dios en yukakubaina
ea ninkatan Diosun mia ea bimaima
en mia kainiwen taexun
¿jawa ana betsa mia yusinpa?
3 Eska mia yusinun ea ninkaidawe.
Ainbuaibuwen kemukunkaini
xanen ibukin jatun kushipa benumisbuwen taexun
ainbuaibu chutakubainkin
min kushipa benuyamakubainxanwen.
4 Kukaan, mia yuinun ea ninkawe.
Uva vino inun shia paepa ichapa
xanen ibubu inun yununikabun akubainaibudan,
jaska pemaki.
5 Jaskaidan, paenxun nukun yunuti inun
jawen nemati jancha jakimatan
nuitapaibu mekeama jatu ichakawakubaintidubuki.
6 Ja shia paepa inun vino aki mawai inun nuitapaibudan,
jau jabun besti anunbun nemayamaxanwen.
7 Shia inun vino aki
nuitapai inun isin tenebiai
jawa ana shinanma jakimatidubuki.
8 Yununikabube tsuada janchapananbun
tsuanda jatu nemaibu mian jatu medabewakin ja jatu nuitapawaibu
jatu janchaxunkunkainxanwen.
9 Mia xanen ibutanan,
nuitapaibu inun jabu juni pepa
jatu ichakawaibu jatu nemaxunkin
yunuti pepa kushipawen unanti wakin
yunu pewakubainxanwen.
Ainbuaibu pepabukidi jawen juni bake ana yusindianikiaki, na janchadan
10 Ainbu duapa pepa bikatsi
benabaunadan, bikajaidaki.
Jawaida jania min bechitidumaki.
Ja ainbu pepa jaska min bechitidudan,
jamapai dauti kushipa jawendua kadujaida binujaidaki.
11 Jawen benen jawen ainin jancha
jaki chiti ikin ikunwankubainaiwen taea
jawen jamapai dasibi jawen jiweti jayakubainmisbuki.
12 Xaba tibi jawen benimakatsi
jawen bene pe shinanxunkin
medabewaiwen taea jawen jiwea jidabiwen
jawen bene benimakunkainmiski.
13 Chaxuwan dani lana inun
xapu pepa benakin bitanxun
jawen jiwe anu bexun
jawen mekenen dayakin
lana inun xapu tudu akin
yumen wantan timamiski, benimakinan.
14 Chaijaidakea jukin xaxu ewapawen mabu bemisbu keska wakin
chaijaida ainbu kaxun piti betsa betsapa
jawenabu bixuntantanmiski.
15 Penadiama butukain
jawenabu inun jawen tsumabu
bawaxuntan jatu pimamiski.
16 Janu yunuti bai binun ixun uintan peken
benimakin pei bikubainkin ichawashinawen bai bitan
jawen uva bai wamiski.
17 Jaska watan jawen kushipawen dayai
ibubis shinan chankain benimai dayakunkainmiski.
18 Jawen tsumabu badidi pe jatu dayamabai
jadi meshu medan dayakin jawen bin
jawaida nukawaismaki.
19 Januxun jawen mekenen ibubis yumen wantan
tadi wakin timakubainmiski.
20 Ja inun, jawa jayabuma nuitapaibu medabewakin
jaska yukaibu yaushiama jatu inankubainmiski.
21 Jawenabu jatu matsi tadi waxuinmawen taea
matsijaidatian dasibi yabukui peabun
ainbu pepa jatuwen dateismaki.
22 Jawen dayadan, ibubis dakukuti wakin inun
bachi manyunepa jawendua watan sawekubainmiski.
23 Ainbu dayakapawen taexun
jatun mae anuxun jawen bene
dasibibun unankanikiki.
Ja dikabi jatun mai pakea jidabi anuxun
xanen ibubun jawen bene duawakin ninkamisbuki.
24 Ja ainbunan, tima tadi chaipa inun jawen nanexeketi timamisxun
jabu mabu inananainbu anu
jatu inanxun pei bimiski.
25 Bachi pepa sawea keska wakin
kushipa inun shinan pepawen shinain
meshukidi jawada ixanai shinain jawen nuikunkainsmaki.
26 Janchaidan, unanepa janchawen janchakin
jatuwen nuikin jatu yusinkubainmiski.
27 Jabe jiwemisbun jawada akubainaibu jatu shinankin
jawen dayawen piti jatu bixuntan
jatubetan pikubainmiski.
28-29 Jawen bakebu inun jawen benen kenwankin yuikin:
“Ainbu pepa ichapabubiaken
mianan, dasibi min jatu binujaidaki”,
akin yuikubainmisbuki.
30 Ainbu natian chipash jawen yuda jawenduabia
jawen shinan min unanma jawen yudawen mia padantiduki.
Ja inun, jawen yuda jawenduabia jawaida atimapatiduki.
Jakia ainbu betsa Jehováwen datekin duawakin
pe shinankubainai
ja ainbukidi jawenabun kenwankubainxankanikiki.
31 Ainbu pepa dayakapabu mae anu ichaxun
yuda dasibibun jau kenwankubainunbunwen,
jaska jatu axunkubainmis shinankin yuikinan.