21
Jaska xanen ibujaidatun shinankin atidudan,Jehován kushipawen jaska bechipaiai amamiski,
jawen shinan jene bai tapia keska waxunkinan.
2 Junibun jawada watan shinankin;
“Dasibi en pe waxuki”, iwanan, yuibiakubainaibun
jakia jatun shinan uke medan
Jehován uinkin jatu unanti wamiski.
3 Jiwei pekainkin Diosun yunuti kushipa inun
dasibi jaska bechipaiai tibi
tsuanda jawen yunua axuainan,
daewakin inabu kuaxunmisbu binujaidamiski.
4 Jati chakabujaida Jehován dananmiski:
ibubis kenmisbu inun,
jaska dasibi jawen shinanen unan keyuaikidi chanibaunaibu inun,
kanekin chakabu tibi akubaini jiwemisbudan.
5 Jawada akatsi bebunkidi shinan pewakubainkin
yubakatan akaibudan, pekainkunkainmiski.
Jakia jawada akatsi bebunkidi shinan pewadiama
yubakatan anikapai nuitapakubainmisbuki.
6 Padananain chanichakabetanan
mabu inun pei ichapa ichawakubaini jawen jiwemisbudan,
kuin puabaini jawaida yamabainmis keskai
jatun mawa benamisbuki.
7 Jawada yunuti kushipa pepa
chibain jiwei pekatsi ikamawen taexun
juni chakabu mentsisipakin jatun kushipawen
jamapai chakabu betsa betsapa atimapa wai
ibubis yamai keyuxankanikiki.
8 Jaska juni chakabubun shinain jiwemisbudan,
jawa mestenma jawen bai kayatapiamaki.
Jamen jaska juni pepabu jiwekin
jatu uinmamisbudan,
jawa chakabu jakidi janchaisbuma
pepabu bestiki.
9 Jiwe ewapa jawendua anu jiwexun
ainbun jawen bene ja a chakayamakin
jiwe chakamamisdan,
jaska jiwea pemaki.
Jamen ja binumai juni betsan jiwe manaundi
tsuada dexun betsa ewapama anu
ja mesti jaskanu jiwea peki.
10 Tsuanda jatu chakabuwanun, iwanan,
juni chakabubun shinankubainmisbuki,
ja dikabi ja dapi jiweabu jatu uinbiakin
ana jatu duawatikidi shinan pewamadan.
11 Enjen iki yuda betsabuki kaxemisbu jatu kupiaibun
jabun bebunkidi pe shinainsmatun uinkin
jatuwen jawenakidi tapinkubaintidubuki.
Jakia tsuada yusinanain
unanepabun ninka bestitan tapinmisbuki.
12 Dios pepatun juni chakabubu inun jawenabu jatu uinkubainmiski.
Januxun ja juni chakabubu jatu kupikinan,
jatu nuitapawamiski,
ana jawa pepa jayama jatu wakinan.
13 Tsuada nuitapakin jatu ea abiabu
jawa medabewakin jatu uinmaismadan,
chipu jabiaskadiai medabe yuka iki ea idiaya
ja manakukin tsuan jadi jawa inanma ixanikiki.
14 Tsuada sinata chakayamabiaya
ja jaki sinataitun june jawada inankuinkin
ja sinatajaidai daewatiduki.
15 Xanen ibubun yunuti kushipa pepawen yunukubainaibun
juni pepabu benimamisbuki.
Jakia xanen ibubun jancha ninkama junibu atimapakubainkin
jatun mabu benukin keyumisbuki.
16 Bebunkidi shinan pewai jiwebiakunkainima
jaska jenetan ana chibanmadan,
janu mawabu bumisbu anu jadi kaxanikiki.
17 Benimaiwen kemu bestinun ixun
vino jawen paenti inun, xeni ininipa inun,
besiti tibi bechipaikin kemukin beya waidan,
jawauma nuitapai keyuxankanikiki.
18 Juni pepa padananainsbuman jatun xantukun
juni chakabu chanichakamisbu yumankubainxankanikiki.
19 Jawen ain jawaida sinatai
ja ichakayamakunkainmisbe jabe jiweadan, bikaki.
Jaska binuidan, jadi tsua jiweabuma anu
ana bikama jiwekunkaini jaska peki.
20 Juni unanepatun jawen jiwetan
piti inun xeni ininti inun mabu pepa shadabu ichawatan
unanxubida me pewakubaina
jawen mabu jawaida keyutidumaki.
Jakia juni unainsmapatun jawen jiwetan
piti inun mabu pepa ichawabiatan
meke pewama jawaida puta puta amisbuki.
21 Tsuada jiwei pekaini
ana chakabukatsi ikama
pepa bestikin jatu uinmaiwen taea
jakidi jancha peaibu ninkai
jaska jiwea bechipaimis jayaxanikiki.
22 Maewan anu xanen ibu detenamenika kushipabu ichapa jayabiaken
unanepabun jatu maematidubuki,
jatun mae mishki kushipawen kenebaunibu jaki chiti ibiabun
jatu bedankin keyunkinan.
23 Tsuada jadi shinain janchakatsi
bebunkidi shinan pewatan
jawen jancha pe kainmamisdan,
jamapai chakabuwaismawen taea
jakidi shinan chakatidubumaki.
24 Jawen unanepa inun jawen tapinika janchawen kein
betsabuki kaxekin jatu kenamamisbudan,
“Ja juni jamen uinbain yui chitenamei jancha bestimiski”, akin yuimisbuki.
25-26 Chikishbu xaba betsatian
dasibi jawadawen kemui bechipai jayakatsis ibiai
daya shinankin bechipaisbumaki.
Jakia tsuada pepa chikishmatun
juni betsa nuitapaibuwen nuikin
jawen jawada jatu inankubainmiski, yaushiamadan.
27 Juni chakabubun shinan chakabiakin
Jehová daewanun, iwanan,
inabu xeni jatu kuamakin
ja juni chakabubun inanbiabu
Jehován jatu danankin bechipaismaki.
28 Juni chakabubun jawada uianma
inun uinbiai chani besti unainbu
jatun dakewen taea mawaxankanikiki.
Jakia jawada ninka pewatan unainbu
unanti wanikabun jatu yukabu
xabakabi jatu kematidubuki.
29 Juni chakabubu datebiai
bemakis mesten pe itsai mapumisbuki.
Jakia juni pepabu jawa shinan
chakabuwaismawen taea
dateama jiwekubainmisbuki.
30 Unanepa inun, tapinika jancha inun,
yubakai penikan
jabun Jehová yuibiakin binukin maematidubumaki.
31 Jawen detenameti pewakin
junibun jatun caballo bebunkidi tapinmakin unanmamisbuki.
Jakia detenameaibu kushipa wakin
Jehován jatu medabewakin binumamiski.