20
Vino ichapa atan jawen taeapatapai juni betsabuki kaxemisbuki.
Shia paepa atandi detenamei
itimaskai chakabumisbuki.
Ja dabe aki tsuanda jatun shinan benutan
ana unanepatidubumaki.
2 Janu xanen ibujaida sinatai pubenjaidaitianan,
inu betsa león pubein tekeden tekeden imis keskamisbuki.
Tsuanda sinatamaibudan,
jabu tenantidu jatun jiweadan, mesejaidaki.
3 Ja ikeakeaibu ninkabiai
jatube kemanameisbumadan,
juni pepabuki.
Jakia juni unainsmapatunan,
chakabu teneabu jatun jatu tuekin taewaxunmiski.
4 Janu mibainbutian chikishin jawa bai wama ibiaima
janu jatun xekiwan tsekaibutian
jawena binun ika kaxun
jawa bechiama ixanikiki.
5 Junibun shinan juneadan, jene nuajaida keskaki.
Jakia jawaida tapinikabun unanti wakin
jabun shinan junea xabakabi unantidubuki.
6 “Jatube yubakatan
betsa wama en menemiski”, iki
ichapabu janchabiamisbuken
chanima tsuan jaskatan menetidubumaki.
Jaskawen taexun junin jawada akin menemis benakin
tsuan jania bechitidubumaki.
7 Juni chanichakai padananainsma
pe chibain jiwekunkainmis
jawen bakebun jawen jiwea mawabaini benimakubainxankanikiki.
8 Jatu unanti wanun ika
jawen tsauti anu xanen ibujaida tsauxun
chakabu unantan bextenun, iwanan,
jatu beis keyubaunmiski.
9 Tsuanda eska yuitidumajaidaki:
“En shinan pepaswen taea
en juinti medan en jawa chakabu jayamaki”, ikin yuikinan.
10 Xankama unanti chakabu inun tanati pema
ja dabe Jehován bechipaiama
tsuada jawen dayaibu jatu dananmiski.
11 Bedunan jawen akawen
jaska jiwekunkainai uinkin
pepa kasmai chakabu unantidubuki.
12 Jawen ninkati pabinki inun jawen uinti bedu
Jehován dami wakin jatu jayawaniki.
13 Tsuada man nuitapakatsi ikamadan,
uxa bestiyamakanwen.
Jaskaidan, uxama man daya jeneama
piti ichapa texe man jayakunkainxanaii.
14 Juni betsan mabu bikin
jawen kadu maikidi xekamanun, iwanan,
yuikin: “Min mabu pema duakabiki”, tsuada ikaiwen taexun
jawen kadu maikidi xekaxuna
biantan benimabainmisbuki.
15 Oro mane dauti shadabu midima
mai jidabi anu jayabiabun
ja juni unanepatunan,
jawen jancha pepawen janchakin
ja oro mabu kadujaida binuabuki.
16 Juni betsa min unanmatun
min pei biyukatsis ikaya min inanmaken
min jaibun mia inanmaya
januxun mian jawen tadi bianyutan
min mekexunyutiduki,
chipu mia pakaya min inantidudan.
17 Jawen jatu bepadantan jatun piti pinun, iwanan,
yudabun chani buxun jatu yuimisbuki.
Jaskaidan, jatun chani janchawen taeadan,
mashi mukua keskamisbuki.
18 Jatube detenamekin jau jatu binuxanun, iwanan,
jatun unanepabun jatu medabewakin jatu yusianbu ninkatan
jabu detenamenika xanen ibubu
ana pe yubakatidubuki.
19 Machupa yuanantun ikaibu jawaida kaka pawabaunmisbuki,
jawa jatu junexunamadan.
Jaskabubedan, jatube ibunananyamakubainkanwen.
20 Jawen ibu juni kasmai jawen ibu ainbu
jawen baken jatu yupukubaini mawaidan,
meshu ten ikai mesejaida anu buxankanikiki,
jatun jiwea benuidan.
21 Jawa wamabia jawaida mabu bechipaikin bitan
chipu jatsantan ana jawen benimatidumaki.
22 Tsuabunda mia ma chakabuwaken
“Ean en jatu kupiaii”, iwanan,
shinain tsua janchatimajaidaki.
Jehová ikunwankin min manakubainaya
Jehován mia jatu kupixunkin
binumaxanikiki, mia mekekinan.
23 Jawen xankama unanti pemawen tanakin
jatu padainbu ja xankama unanti chakabu jawen dayaibu
Jehován jatu bechipaiama dananjaidamiski.
24 Jaska yudabu mapukubainxanaibu
Jehován jatun bai jatu katuxunmiswen taexun
jaska jiwekubainxanaibu
ibubis tsuan bebunkidi unanmajaidaki.
25 Jawada inankatsi Jehová yubai jaki tanabiatan
jas mestenwanma chipu shinan betsawadan, mesejaidaki.
26 Xanen ibu unanepatun
juni chakabubu ana jatu uinkatsi ikama
jatu katutan jawaida jamapai tadanti xankamawen jatu chushamamiski.
27 Jehován jawen Yushin kushipa junibu inanitun
ja Yushinen junibun jiwea uke medanjaida
jatu unanti wakin bin chaxa keskawen unan keyumiski.
28 Xanen ibujaidatun jawen xanen ibu mestenwain
jiwei pekin jawenabuwen nuikin
jatu pe mekekubainmiswen taexun
tsuan jawen kushipa mebintidumaki.
29 Jatun yuda kushipawen taea
bedunanbu kenkubainmisbuki.
Jakia ana kushipamabia anibukunkaini
jatun bu siun siunpawen taexun
jatu kenwankubainmisbuki.
30 Kusha kusha akin jatu isin tenemakin
juni chakabubu jatu pewatidubuki,
shinan chakamisbu jatu pewakinan.