19
Unainsmapa inun chani besti yuibauni mapumisbudan,ja nuitapaibu inun ja juni pepabu
jatukidi pe yuimisbun jabun jatu binuaki.
2 Jawa bebunkidi shinan pewama jamen benimakain
daya chakayamabiashina jaskadan,
jawen daya pe kaintidumaki.
Jawada tibi jawaida jin jin ikin akinan,
benukin kanejaidatidubuki.
3 Juni betsa patapakin jawen jiwea ibubis chakabuwa
januxun: “Jehován ea kanemashinaki”, iki
unainsmapabu jaki padanamisbuki.
4 Juni mabu ichapayadan,
midimabun jaibuwai bemisbuki.
Jakia juni nuitapaitunan,
jatun jaibuaibu benu keyumisbuki.
5 Jawada uianma inun uinbiatan chanichakamisbudan,
jabunan, jatun kupiti chakabu binuama bixankanikiki.
Chani chakamisbu jatun chakabuwen taexun
jawa unanuma wakin
jatu mepanmakin pewama ixanikiki.
6 Tsuada shinanyan inun mabu jatu inanmisbudan,
dasibibun bechipaikin jaibuwamisbuki.
7 Tsuada jawa jayamawen taexun jawen betsabun danainbun
chanima jaskawen taexun jawen jaibuaibundi jenebainmisbuki.
8 Tsuanda jawada tapintan ja tapinmawen aki
jiwekainkin ibubis pe shinanbainkin
unanuma jiwekin
jawen jamapai ewawabainxanikiki.
9 Jawada uianma inun uinbiatan chanichakamisbudan,
jabunan, jatun kupiti chakabu binuama bixankanikiki.
Chanichakamisbunan, jatun mawa besti manamisbuki.
10 Unainsmapa jawada pepa jayabia
jawaida putakin keyubauni jawa jawenduatan jiwetidubumaki.
Jaska dayadu esclavobu bexmasjaidabiatun
xanen ibukin xanen ibujaidatun enabu jatu yunui jikitidubumajaidaki.
11 Bebunkidi shinan pewakubainmistun sinatai taebiatan
jawaida ibubis daemisbuki.
Jakidi janchai pemisbuwen taea
jaki ja ibiabu ana shinanma ibubis jatu jakimawai pe bestikunkainmiski.
12 Inu betsa león pubein tekeden imis keskai
xanen ibu sinatakin jawen jancha kushipa jatu ninkamamiski.
Jakia xanen ibun jawenabu jatu medabewakinan,
jatu benimawamiski,
basi anu ui eskadabes ikin cha amis keska jatu wakinan.
13 Tsuanda juni bake jawa unanma unainsmapatun
jawen epa bika tenemakubainmisbuki.
Ainbun jawen bene ja a chakayamakin jiwe chakamamisdan,
jiwe xui anu ui tuis tuis ikunkainmis keskaki.
14 Jiwe pepa inun mabu shadabu
jatun ibubu anua bimisbuki.
Jakia ainbu unanepa Jehován besti
jatuki nukumakubainmiski.
15 Tsuada chikish uxa besti shinain uxa bestikunkainmisdan,
dayamawen taea buni tenekubainxanikiki.
16 Tsuanda Jehován yunuti jancha inun
nemati jancha ninkatan chibankin
jatun jiwea mekemisbuki.
Jakia tsuanda Jehován yusinti jancha danain
jawen kupiti bika tenekubaini mawaxanikiki.
17 Nuitapaibu medabewakin jau jawen dayanun
man jatu pei inanyumisdan,
Jehová man inanyua keskaki.
Nuitapai pewaima keska wakin
Jehován manakukin ana inanxanikiki.
18 Ewadiama jawadakidi min baken mia ninkatidu
yusinkin pewakubainwen.
Ja dukun yusinkin pewawe.
Jakia ana min pewatidumabia
kupikin ja chakabuwaiwen
tenantikidi shinantimaki.
19 Tsuada sinatajaidakunkainkin jawen kupiti bixanikiki.
Jamen jaskama jau kupiyamanunbun
tsuada jawen nuikin min jatu nemaxunbia
ana sinata pikujaidaxanikiki.
20 Mia yusianbu ninkakin nemati jancha tapinkubaini
juni ewai min unanepaxanaii.
21 Juni yubakai ibubis jawen shinanen janchakin
akatsis ibiai atidumaki.
Jakia jawen shinan nemakin
Jehován jaska shinain jawena taxnimaxuntiduki.
22 Juni betsa yubakatan chanima amisdan,
ja dasibibun bechipaimisbuki.
Ja inun, nuitapaibu janchamisbunan,
ja chanichakai janchamisbu jatu binumisbuki.
23 Jehováwen datekin jawen jancha ninkakubainkin
tsuanda jawen jiwea bai chiban pewai unanuma jiwekubainxankanikiki,
jawada chakabu ibiaya jawa dateamadan.
24 Chikish bestidan, kenchakia besti piti mexunkain metan
jakia jawen jaxpa anu jawa sananbidan mukutidumaki.
25 Enjen iki yuda betsabuki kaxemisbu jatu kupiaibun
ja bebunkidi pe shinainsmatun uinkin
jatuwen jawenakidi tapinkubaintidubuki.
Jakia nemakanan bestiaibu ninkakin
unanepabun tapinmisbuki.
26 Jawen epa ichakawakin
jawen jawada yumetsuntan
januxun jawen ewa jawen jiwe anua nichintan
ja juni bake ichakanika jawen atimapawen dakeama jiwea uinmisbuki.
27 Min en bakewen taea epaan,
mia nemaibu min jatu ana tapinkatsi ikama
jatun yusian pepa jenetan
min chakabukunkainxanaii.
28 Juni chakabubun jawada uianma
inun uinbiai chani besti unankin
jabun pewen jatu unanti wabiaibun
ja yunuti kushipaki kaxemisbuki.
Ja inun, juni chakabubun jatun kexawen
jancha chakabu yuikin jatu mesewamisbuki,
jashi kenujaida jatuki puta keska wakinan.
29 Juni chakabu jatun yusian ninkama
jatuki kaxemiswen taea
jawen kushati ji ma jaki tana jayamisbuki.
Juni tatimadan, kushakin
pekushchakayamati peki.