18
Tsuanda ibubis jaska bechipaikinakatsis ikai jawenas besti shinain
juni betsan yusinti jancha bechipaiama
bextekin danankubainmisbuki.
2 Juni unainsmapatun shinanan,
ana jawada betsa tapinkatsi ismaki.
Jaska jawen shinan ma jaya unankin
jaska besti jatu yuikatsis imisbuki.
3 Jamapai chakabuwaidan,
ja besti kaka taxniama
dake paeyabi kainmiski.
Kenmisbu beaibun jatuki dakei
jatuki jancha chakabumisbuki.
4 Juni unanepatun janchadan,
jene nuajaida keskaki.
Janua jene bei tueai keskai
jawen unanepa jancha ichapa mata jayaki.
5 Juni chakabubiaken pepabu keska wakin
xanen ibu unanikabun jatu mekekin
ja jabun jawa chakabuwaisbuma jatu ichakawakin
jatu padanmisbu jaska pemajaidaki.
6 Ja unainsmapa jiwe betsa anu kaxun
chakabu jatu tuexunmisbuki,
jau jawen taea ja iki detenamenunbunan.
Jatu jaskamamiswen taexun
ja juni kusha kusha atidubu peki.
7 Unainsmapa jawen kexawen janchaidan,
ibubis chakabui dispiwen tenexekea keskamisbuki,
jawen jiwea chakabuwaidan.
8 Machupan chani yuibaunkinan,
misi batapabu pimisbu keska wakin
jatu ninkamabaunmisbuki,
jatun shinan uke medan jatu mistukin chakabuwakinan.
9 Chikish inun jamapai shadabu chakabuwanikadan,
ja dabe jawen betsa kayabi keskaki.
10 Jehován kushipa kayabi shinantidan,
mishki kushipa jiwe keyatapa wanibu janu iduti keskaki.
Tsuada pepabu jatun mekenika Jehová anu ichai buaibu
jatu mekekubainmiski.
11 Juni mabuyatun jawen mabu ichapakidi shinankin ikunwainan,
mishki kushipawen mae kenebaunkin keyatapa wanibu
jatun mekea keska
tsua jikikain metiduma keska shinanmisbuki.
12 Ja dukun kanei ibubis kenkunkainaiwen taeadan,
chipu ana jawa jayama keyuxanikiki.
Jakia ibubis keinsmadan,
chipu jawen jamapai jawenduawai xabakabixanikiki.
13 Jatu jancha wakin jawen jancha jatu yui keyudiamabiaken
bebunkidi unainsmapatun jawaida jatu kemakin
jatu dakewamisbuki.
14 Isin tenebiai jawen juinti shinan chankantiduki.
Jakia punu nukai keyua dakaken
tsuan shinan chankanwankin benimawatidumaki.
15 Unanepa tapinikabunan,
unanepa jancha shadabu benakin
ana tapinkubainmisbuki.
16 Xanen ibujaida betsabe janchanun ixun
tsuanda jawen daewati pepa bexun
jawen tsuma min inan mia bichitiduki.
17 Ja dukun tsuada padananain janchai taeai ninkakin:
“Jawen jancha chanimaki”, ibiatan
jakia ja kachu betsadi chanikin yui pewai ninkatan
jatun shinan betsa watidubuki.
18 Xuku dabetun shinan dabe wai ja ikaibu
jadatuda pe jatu unanun, iwanan,
jawen jenekin tapinkatsi
juni betsan unanti númeroya udenkin
Jehován jaska bechipaiai jatu yunuai tapintidubuki.
19 Mishki kushipawen mae kenebaunibu
jawa bika teneama tsuanda di atidu bikajaidaki.
Jamen jawen betsa sinatamajaidashina
jawa bika teneama keska daewakin
shinan betsa wamadan,
ja binua bikajaidaki.
Xanen ibun jiwe anu jawen nemakin
mane kushipawen kebenibu anu
tsua jikitidubuma keskai
tsuada ja idabetan paxkakainadan,
ibubis chakabuima ana daeama jabe sinatapaketiduki.
20 Pikin yaniwai keskai
tsuada jatun jancha tibiwen ibubis janchakin ninkai benimamisbuki.
21 Min janchawenan,
min jiwexanai inun min mawaxanai
jadatuda yui min janchaii.
Jaska chakabu yui min jancha chakayamamisdan,
jabiaskadi mei min bika tenepakexanaii.
22 Tsuanda ainbu pepa biadan,
jawen taea pepa besti jayakunkainxanikiki.
Jehován jawen mia duawakatsi
jawen pepa mia uinmakubainikiki.
23 Nuitapaibu jancha pewen ea ibiaibun
jakia juni mabuyabun jatun jancha kushipawen
jatu kunyan akin kemamisbuki.
24 Juni jaibu ichapa jayabia
jabun jawaida ichakawatan jenebaintidubuki.
Jakia jawen jaibu jatidibun
jawen betsa kayabi binumakin duajaidawatidubuki.