17
Besikin piti ichawaxun pibiaisinatai detenameyabi betsabu jiwemisbuki.
Jamen misi natianma bawaima
kushi besti pibiai unanuma jiwekin
jatu binumisbuki.
2 Tsuanda juni bake tatimawen taexun
jawen tsuma unanepa ikunkainkin xanen ibukin
ja bake tatima yunukubainxanikiki.
Janua jawen ibu ma mawaken jawen juni bake betsabubetan
ja jawen tsumapan jawen mabu paxkaxanikiki.
3 Oro mane inun plata mane jas unanun, iwanan,
chiwen kuakin unanmisbuki.
Jaska keska wakin junibun shinan pepa inun chakabu
Jehován unanti wakubainmiski.
4 Juni chakabu chanichakamistun chakabu tibi yuiaibu
chakabu yuimisbundi jatun jancha ninkakin bechipaikin pawamisbuki.
5 Jawa jayama nuitapaibuki kaxekin
Diosun jatun jatu dami wani sinatamamisbuki.
Tsuada nuitapabiai chakabuwai benimakubainmisbudan,
jawen jatu kupixanai jaska waxun binutidubumaki.
6 Anibubun maiti jawendua keskadan,
jawen bababu jayakubainmisbuki.
Jatun epabu pepabuwen taea
jatun bakebu kenkubainmisbuki.
7 Unainsmapatun jawa jancha pepa
yuitidumajaidaki.
Jakia juni tsuada jaki kaxemisbuki
juni pepa betsa jakidi janchakin
jatu padantidubumajaidaki.
8 Jawadawen jatu duawakin taewabainkin
pei kasmai mabu june jatu inankubainkin:
“En jatu jaska wa
ea medabewatidubuki”, iwanan,
shinankubainaiwen taexun
jawada jawen chakabu axuntidubuki,
yushin chakabun kushipa jaya ikunwain keskawenan.
9 Jawen jaibun kanebiashinken
jakidi yuibaunama junexunkin
jawen jaibu bechipaimamiski.
Jakia jawen jaibun kaneshina
junexunama chanikaunkin
jawen jaibu dananmakin putamamiski.
10 Junin jawaida tapinmis pewakin:
“Min ma kaneaki”, akin xanen ibun yuia
ibubis jawaida shinankin pewamiski.
Jakia unainsmapa pewanun, iwanan,
100ki kusha kusha abiabu
jawa tapintidumaki.
11 Xanen ibu kaya kushanun ixun
juni chakabubun jawada chakabuwai benamisbuki.
Jakia jabun chakabuwaibu jau jatu kupitanun
tsuada mentsisipajaida Diosun yunuxanikiki.
12 Jawen bake bianbainabuwen taea
yuinaka oso yuxan pubein sinataiki nukua meseki.
Jakia unainsmapa sinatakin atimapawai
patapakunkainaiki nukuadan,
ja oso yuxan binuaki.
13 Tsuanda juni betsa medabewabiamis
jantsidi manakukin medabewaismadan,
jaskawen taea jawenabu nuitapai jiwekubainxankanikiki,
jawen shinan chakabuwen taeadan.
14 Jene bai mata chakayamakin
juni betsan bai achi keyumisdan, chakabuki.
Jaska keskanun ika tsuada ja iki taeaibudan, chakabuki.
Jau pikuyamanun ja iki taeaibu anua
jawa yuiama jatu jenebainadan, jaska pejaidaki.
15 Tsuabunda chakabuwa xanen ibubun jawa jatu kupiama meketan
jakia tsuabunda jawa chakabuwamabiaken
xanen ibubun jatu kupiaibu
Jehová sinatakin jatu bechipaismajaidaki.
16 Peiwen unanepa jancha binun ika ja unanepa tapintidumabia
¿jaskai unainsmapa peiya juimenkain?
17 Jawen jaibu kayabitun jawa jeneama bechipaimisbuki.
Jawen betsa kayabi keska wakin
janu bika teneaitian medabewakubainmisbuki.
18 Jawen jaibun juni betsa anua pei biyukatsi ikaya
bebunkidi pe shinanma
juni betsabe yubakaxun min inanmakin
min jaska wamaimadan, jaska pemaki.
Jau jaskayamakubainunbunwen.
19 Tsuada ichakanikakatsis ikin bechipaimisdan,
detenameadi bechipaimiski.
“Ean besti ibubis en unanjaidaii”,
ikin shinankubainmisdan,
ibubis jawen kushipa benuxanikiki.
20 Jawen shinan pemabia
padananain jancha chakakunkainmisdan,
jawa pepa jaki nuku taskama ikunkainxanikiki.
Chanichaka besti padananain janchakubainmisbu
dakei bika tenekubainxankanikiki.
21 Juni betsan bake waima
jawen bake betsa unainsmapatunan,
jawen epa nuimakin bika tenemaxanikiki.
Ja bake tatimatun jawen epa jawa benimawamatidumaki.
22 Tsuada juinti benimai pepeidan,
dau pepa xea keskaki.
Jakia tsuada juinti nishmakin jawen benima jeneidan,
jawen yuda babui keyumiski.
23 Jawada pepa betsa wakin chakabuwanun, ixun,
juni chakabubun xanen ibu kushipabu
june jatu pei inankubainmisbuki.
24 Jawaida tapinikatunan,
jawen unanepawen jaska shinankin akatsis imiski.
Jakia unainsmapatun jawa pe shinanma
jaska akatsis ikai mawaida jakidi shinan pewaisbumaki.
25 Bake unainsmapatun jawen epa sinatamakin
jawen ewa juinti nishma wakin dananmamiski.
26 Tsuanda jawa chakabuwamabiaken
jatu kupimakin pakamadan, chakabuki.
Ja inun, juni pepabiaken
jatu kusha kusha amaibudan,
jaska pemajaidaki.
27 Unanepabudan, jaskaida jancha yui
jancha chakayamaisbumaki.
Ja inun, jawaida tapinmisbunan,
jawada uinkin ninkabiatan
pesxun uin bestimisbuki.
28 Unainsmapabia jancha unanjaidai keska inun tapinjaidanika keskakin
jawada tibi uinbiatan jawa yuiama
pesxun tenemisdan,
unanepa keskakin jatu uinmamisbuki.