16
Junibu yubakabiakubainaibunjanuxun Jehován jaska bechipaiai
amakin jatu taxnimaxunmiski,
jaska bechipaiama bextekinan.
2 Junibun shinankin ibubis bemakis aki:
“En pewaii”, iwanan, shinankubainmisbuki.
Jakia Jehován jatun shinan uke medan
padananainbu jatu unan keyumiski.
3 Jamen jaska akatsi ikin bebunkidi jaki chiti ikin
Jehová min yuishina
min yubaka peken jawada pepa
Jehován mia amakubainxanikiki.
4 Jaska bechipaiai chibankin
Jehován dasibi dami betsa betsapa wakin keyuniki,
juni chakabubun ninkaisbumadi janu jatu kupiaitian
jatu kupikubainti wakinan.
5 Ibubis kenkubainmisbu
Jehován bechipaiama jatu kupikinan,
betsabu jawaida kupikin inun
betsabu manakubainkin jatu kupimiski,
jatun chakabu binumamadan.
6 Jamapai chakabu tibi yuda betsabuna jakimaidan,
Jehován nuikipawen chanima atiki.
Jehová duawakinan,
chakabu tibi min jeneakeakekubainaii.
7 Tsuada jiwei pekunkainkin Jehová benimawaibun
januxun jatuki sinataibu Jehován jatu daewaxuntiduki,
jau ana jabe sinatama ja dabe jau jiwei pekubainunbunan.
8 Juni pepama padananankubainkin
pei ichapa bikubaintidubuki.
Jakia juni betsa jawa padanananma
pe dayakunkainkin eskadabes bibiakin
ja juni padanananmisbu jatu binujaidaki.
9 Jawada wakatsi junibu yubakakin shinainbu
Jehován jatu medabewakin
jaska wai buaibu jatu yunukubainmiski.
10 Xanen ibujaidatun yunukinan,
ibubis xanen ibuama Dios janchaxunkin
jatu unanti wakin jatu kupikin
jau kaneyamanunbunwen.
11 Jau jatu padanyamaxanunbun
jawen xankama unanti inun jawen chaipa tanati tibi
Jehován jawen jatu unanti wakatsi jatu dami wamaniki.
Jamapai tanati pepa jatu yunubiani
jawen yumetsukin jatu benukubainmisbu jatu kupixanikiki.
12 Xanen ibujaida chakabutun yunuchakaibu
Diosun jatu dananjaidamiski.
Jakia xanen ibujaida pepatun jawen yunuti kushipawen
jatu pe yunumisdan, jabudan, pepaki.
13 Jancha chanima yuiaibu
xanen ibujaidatun jatu bechipai
jatuwen benimakunkainmiski.
14 Jabun xanen ibujaida sinatamakin yunukin beduabudan,
ma jabianu xanen ibun jatu tenanmatiduki.
Jakia unanepabun xanen ibujaida sinatai daewatidubuki.
15 Xanen ibujaida benimaya pe jiwekubaintidubuki.
Xanen ibun jawen shinan pepawen jatu pe mekeadan,
ui bekin mai metu cha amis keskaki.
16 Mane oro kadujaidabiaken
shinan unanepatun binuaki.
Mane plata kadujaidabiaken
tapinikatun binudiaki.
17 Juni pepabu jiwei pekainkinan,
chakabu tibi ana akama jenekubainmiski.
Jaskakin jatun jiwea mekekin
jatun yuda ibubis pe mekediakubainmisbuki.
18 Ja dukun kanei ibubis kenkunkainaiwen taeadan,
chipu chakabu dasibi jukin bexte keyuxanikiki.
19 Keinsbuma nuitapaibube jaibunamekin
mabuyabu man jatu binujaidatidubuki.
Jakia juni mabuyabudan,
kenikabube jaibunamemisbuki.
20 Yununika pepatun jamapai akin pewaidan,
jawen daya pewakubainkin ewa wamiski.
Tsuanda Jehová ikunwanyan
benimawakin jatu duawamiski.
21 Tsuada unanepakunkainai jakidi shinankinan:
“Jadan, jawaida tapinikaki”,
akin yuikubainmisbuki.
Tsuada jancha duapatun
juni betsa yusinkin jatu shinan betsa wamatidubuki.
22 Tsuabuda unanepa shinan pepa jayadan,
jatun jiwea pedan, chacha jabai keskaki.
Jamen unainsmapabu tsuanda man jatu yusinkubainaidan,
man jatube jabiaskadiki, unainsmapadan.
23 Tsuada unanepa jancha jayatun shinankubainkin
jawada xabakabi jancha jatu yui pewakin binumaya:
“¡Chanimaki!” ikin yuikubaintidubuki.
24 Jancha pepa ninkai ana punu nukama kushipai benimakubainmisbuki,
buna bata aka keskaidan.
25 Jaska jatun jiwea bai pe dabanen chibankubainaibudan,
jabun jiwea jawen jeneaitianan,
jatu kupia mawa bestixankanikiki.
26 Buniama pikubainun ika dayakubainmisbuki,
buniwen taea datei jawa chikishamadan.
27 Juni chakabubun janchadan,
chi jede ji ikai keskakin jawen janchawen
chakabu tibi taxnimamisbuki.
28 Juni atimapa jawen jancha chakabuwen ja imisbuki.
Chani yui yuananankin jatu sinatamamisbuki,
jawen jaibube jatu sinatanamemakinan.
29 Jawaida detenamekatsi imistun
jawen jaibu ja dapi jiweabu padankin
jaska jawen jaibun shinanmabiaken jatu yunu chakakubainmiski.
30 Tsuanda jawen jaibu beduwen kasmai kexawen yunukin
chakabuwamakatsis ikin yunumiski.
Tsuanda ma chakabuwa unankinan,
jawen kexa mukua dakaxun jatu unanmamisbuki.
31 Tsuada jiwei pekaini chakabuismadan,
anibui jawen bu siun siunpaya
maiti jawendua sawea keskaken
kenwanxankanikiki.
32 Jin jin ikama jamapai tenetan manamistunan,
mentsisipabu jatu binujaidaki.
Jawada chakabu binukin
tsuanda matun yuda man mekemisdan,
jabun maewan achikin jatu maemamisbu
man jatu binuaki.
33 Junibun jamapai bikatsi
jawen jamapai unanti xau mexte númeroya udeanbu
jadatukida número kaiain
Jehován katukin jatu unanmamiski.