15
Jancha pewen jatu kemakin pewakinan,sinataibu jatu daewamisbuki.
Jakia jancha kushipawen kunyan akin yuikinan,
ana jatu sinatajaidamamisbuki.
2 Juni unanepa janchakinan,
jawen unanepa jancha kainmamisbuki.
Jakia unainsmapabun jancha yuibiaidan,
jawa jancha pe yuisbumaki.
3 Jehovánan, dasibi mae tibi anuabu jatu uin keyubaunikiki,
jabu pepabu inun jabu chakabubudan.
4 Jancha duapawen jatu unanuma jiwemakubainmisbuki.
Jakia bepadameti janchawen jatun juinti nishma wakubainmisbuki,
jatu punu nuka wakinan.
5 Jatun epan jatu nemakin pewamis jancha
ja unainsmapabun ninkaisbumaki, danankinan.
Jakia unanepatun jatun epan jatu nemakin
pewamis jawen jancha ninkakin
xabakabi jatu uinmakubainmisbuki.
6 Juni pepa ichakanikamatun jiwe anudan,
mabu inun piti ichapa jayakunkainmiski.
Jakia juni chakabubun mabu inun piti ichawabiai
jawen jawada bibiakinan,
jawa ibubis pe medabe bitidubumaki.
7 Unanepabun jawen unanepa jancha yuikinan,
jatun jancha pepa sa aka keska wakin
pawabaunmisbuki.
Jakia unainsmapabun shinain janchamisbudan,
jawen janchawen tsua jatu medabewatidubumaki.
8 Juni chakabubun inabu Dios kuaxunkin inankuiainbu
Jehován jatu danankin uinkatsi ismaki.
Jakia juni pepabun Diosbe janchakin dayuikin yukaibu benimakin
Jehován jatu ninkamiski.
9 Jaska juni chakabubun shinan pewama jiwekubainaibu
Jehován jatu danankin bechipaismaki.
Jakia juni pepabun pepa chibain jiwei pekubainaibu
Jehován jatu bechipaimiski.
10 Pe jiwei taebiakainkin jatun jiwea bai jenekin chakabuwaibu
ana jatu pewakin chintunmaidan, bikajaidaki.
Tsuada jatu yusinkin pewabiabu
jatun jancha ninkama danainan, tenanxankanikiki.
11 Jehován dasibi jatu uinmiswen taea
janu mawaibu inun janu mawa bumisbu unan keyuikiki.
Jakia jaska jatu binuawen taexun
Jehován junibun shinanmis binujaidaki.
12 Patapa ninkaisbuman jatun nemati jancha bechipaisbumaki,
jatun shinan besti bechipaikinan.
Ja dikabi unanepabu danain jatube dasikatsi isbumaki.
13 Jatun juinti benimaidan,
jatun besu benimadiai mapumisbuki.
Jamen jatun juinti punu nukadan,
kaxa tenea mapumisbuki.
14 Juni shinan unanepatunan,
ana tapinjaidanun ixun shinan bena ninkakubainmisbuki.
Jakia unainsmapabun jawa pepa unanma
atimapa besti shinankin yui jiwemisbuki.
15 Tsuada bika betsa betsapa tenei
xaba tibi nuitapakunkaini jiwemisbuki.
Jakia tsuada juinti benima jayadan,
xaba tibi besi jawenduai keskai jiwemisbuki.
16 Mabu midima jayabia jawen datei jiwekubaintidubuki.
Jakia tsuada mabu eskadabesyabiatun
Jehová duawakin jatu binujaidatidubuki.
17 Sinatai dakekenankin awa nami pepa jatumesti pikubainmisbuki.
Jakia bechipainamekin yunu besti jaya pikinan,
ja piti pepa pimisbu jatu binujaidabuki.
18 Jawaida sinatai janchakin jatu pubenmamisbuki.
Jakia tsuabunda pe shinain jawaida sinatama
jawen jancha pewen jatu nemamisbuki.
19 Chikishin jiweadan, jawen jiwea baidan,
muxan kaian bexeaki.
Juni pepabun jiweadan, bai jaxpa
jawa tan akama xunpin anu mapua keskabuki.
20 Bake unanepabun jatun ibubu benimawamisbuki.
Jakia bake unainsmapabun jatun ibubu danankin
jatu dake wamisbuki.
21 Bebunkidi pe shinainsma patapabudan,
patapa bestinun ika benimakubainmisbuki.
Jakia jabun jawaida tapinikabunan,
ibubis jatun jiwea pewakubainmisbuki.
22 Tsuanda jamapai anun ixun
jamebi yubakai jawa yuka ikamadan,
jawen yubaka pe kaintidumaki.
Jakia tsuanda jamapai anun ixun
unanepabu ichapabu jatu medabe yuka
jabun shinan pewen medabewamisbudan,
jawen yubaka pe kainmamisbuki.
23 Jawada bikatsi yuka itan pepawen min manai
jawa bikama mia yuikin pewaxanai jaska peki.
Jakia jaska yuka ikin bikatsi shinain
binumakin jawaida jaki nukumaidan, ja pejaidaki.
24 Diosun bai nai anudan, janu unanepabu butidubuki,
chakabu mawa janu jatu kupixanai anu buama piskuidan.
25 Ibubis kenmisbun jiwe Jehován di akin chakabuwabiakin
ainbu beneyabiani ana bene jayamatun jiwe inun jawen miban shadabu
Jehován mekexunkubainmiski.
26 Juni chakabubu yubakaibu
Jehován jawa bechipaiama jatu dananmiski.
Jakia jabun jancha chakabu yuisbuma
jatun jancha pe bestiwen Jehová benimakunkainmiski.
27 Tsuanda jawenas besti wanun, iwanan, mabuwen kemukin
jawenabu duawama ibubis chakabumisbuki.
Jamen tsuanda jawen chakabuwen taexun
xanen ibu june pei inanpaia danankubainmisdan,
jiwei pekunkainkin
Jehová benimawamiski.
28 Pepabun ja dukun shinan pewatan
ja kachu jancha pepawen jatu kema pewamisbuki.
Jakia juni chakabubun jawa shinan pewama
jawaida jancha chakabu kainmamisbuki.
29 Juni chakabubu Jehovábe janchakin yukabiabu
jawa jatu kemakin ninkaismaki.
Jakia juni pepabu Jehovábe janchakin yukaibu
jatun jancha jatu ninkakubainmiski.
30 Tsuanda besu jawendua sinatama uin benimamisbuki.
Ja inun, tsuanda kakape bana ninkatan
shinan chankain jawen benimai jawen kushipakubainmisbuki.
31 Tsuanda chakabuwai unanepabun jatu nema
jatun jancha ninkai
unanepabu ibuwatan jatube tsauxankanikiki.
32 Tsuanda chakabuwai nemabiabu
jatun nemati jancha ninkama jatumebi dananananmisbuki.
Jakia tsuanda jatun nemati jancha ninkakin tapinkubainidan,
bextekei unanepamisbuki.
33 Jehován nemati jancha tsuada jawen datekinan,
jawen unanepakin tapinkubainmisbuki.
Chipu matu kenwanxanaibudan,
ja dukun ibubis keanma pe jiwekunkaintiki.