14
Ainbu unanepatun jawenabu tibijatu pe mekekubainmisbuki.
Jakia ainbu pe shinainsmatun
jawenabu jawa jatu pe mekeama
jiwe chakamakubainmisbuki,
jiwe teke teke aka keska wakinan.
2 Tsuada chanima jiwei pexun
Jehová duawakin benimawamisbuki.
Jakia tsuada jiwei peama kanekubainkinan,
Jehová danankubainmisbuki.
3 Unainsmapatun ibubis kenkin
jawen jancha kushipawen jatu kunyan amisbuki.
Jakia unanepatun jawen jancha pepawen jatu pe mekekubainmisbuki,
tsua sinatamamadan.
4 Ina awa jayamawen taea jatun bai anu
xekiwan trigo jayabumaki.
Jakia ina awa jawen kushipawen jatun bai anu mai xexaimaxun
xekiwan trigo ichapa tsekakubainmisbuki.
5 Tsuanda jawada ikaibu ibubis uintanan, chanichakama yui kayabitidubuki.
Jakia tsuanda uianmabia kaka besti ninkatan chanichaka bestimisbuki.
6 Tsuada yunua ninkaismatun
unanepanun ixun unanepan jancha benabiai jaki nukutidumaki.
Jakia ninkanikabun jancha bena tapinkinan,
jawa bikama jawaida tapinkubainmisbuki.
7 Unainsmapabun jancha ninkakin
min jawa tapintidumawen taea
jatube jaibunameama tadi mapukubainkanwen.
8 Juni pepa unanepatunan, jaska pe jiwetidu
bebunkidi unanepakin unankubainmiski.
Jakia unainsmapa pe jiwetiduma ibubis padanananmisbuki.
9 Unainsmapabudan, kanei kaxekenanmisbuki.
Jakia juni duapabudan,
jatube jaibunamekin jatu medabewakin
jatu benimawakubainmisbuki.
10 Juni tibitun jatun juintinin jawada bika teneai inun
jaskai benimai jamesti xabakabi unantiduki,
tsua jawa unanmamadan.
11 Juni chakabubun enabu chakabuwakin yamawaxankanikiki.
Jamen juni duapa nuikipabun enabu pe jiwei pakubainxankanikiki.
12 Jiwei pea dabanen medabenan bestikunkaini janchai jiwemisbudan,
badi jawen jeneaitian Diosun jawen juinti pema unantan jatu kupixanikiki,
mawa kayabimakinan.
13 Bemakis usanbiai juinti uke medan
bika tenei jawawen jaskatima min isin tenetiduki.
Jaskai bemakis benimabiashina
jawen jenei kaxatidubuki.
14 Jaska unainsmapabu jawen jiwea pemabiaken
jiwekunkaini benimakubainmisbuki.
Jakia juni pepabun jaska pe wakubainmisbuwen
benimai shinan chankankubainmisbuki.
15 Juni betsan bebunkidi tapintan pe shinainsmatunan,
jawada yuiaibu ninkatan jawa shinanma
jawaida ikunwanmisbuki.
Jakia juni betsan bebunkidi pe shinanmisbunan,
dasibi pewatan mapumisbuki.
16 Unanepabu chakabuwen datekin jenekubainmisbuki.
Jakia unainsmapabu chakabuwen dateama
nashui ika mapumisbuki.
17 Tsuabuda shinanma jawaida sinatakin
chakabuwakubainmisbuki.
Jakia tsuabunda bebunkidi pe shinantan
jawaida sinataisbumaki.
18 Juni betsan bebunkidi pe shinainsmadan,
jawen unainsmapawen taea jiwei peismaki.
Jakia juni betsan bebunkidi pe shinanmisdan,
unanepai jiwea dasibibun uintidubuki.
19 Juni chakabubun juni pepabu bebun
danti iki beti itan jatu kenwanxankanikiki.
Juni pepabun jiwe jikiti xui anuxun
juni chakabubun jatu ea axankanikiki.
20 Nuitapaibudan, jatun jaibuaibun dikabi jatu danankubainmisbuki.
Jakia mabu ichapayabudan, jaibu midima jayamisbuki.
21 Jatu dapi jiweabu tsuanda medabewama danankinan,
Diosun yusian chibanma chakabuwaikiki.
Jakia tsuada nuitapaibuwen nuikin medabewai benimakunkainmiski.
22 Tsuanda chakabuwanun ixun benabaunkinan,
bai pepa benumisbuki.
Jakia tsuanda pepa besti anun ixun benamisbudan,
yudabun jatu bechipaikin chibankin
jatu jawa jeneisbumaki.
23 Tsuada daya chakayamakunkainidan,
piti inun mabu jayakubainmisbuki.
Jakia jawa wamabia jancha bestikubainmisbudan,
jawa jayama nuitapakubainmisbuki.
24 Unanepabun jatun shinan pepajaidadan,
maiti jawendua sawea keskabuki.
Jakia jabu unainsmapabun jawen jatu uinmaidan,
maiti atimapa sawea keskabuki.
25 Tsuanda jawada ikaibu ibubis uintanan,
xanen ibu yui pewaxuna jawen jancha ikunwankin
juni betsan jiwea piskumatidubuki.
Jakia tsuanda uianmabia kaka besti
ninkatan chanichakakin xanen ibu tenanmatidubuki.
26 Tsuanda Jehová ikunwankin duawai
jawa dateama jiwekubainmisbuki.
Jaska jawen ibu jiwea uinkubaini
jawen bakebu jawa datetidubumadiki.
27 Jehová duawakin min benimawaidan,
jabia min jiwea kayabiki,
mawa kayabi min ma binushinawen ana dateamadan.
28 Xanen ibu kushipakin yuda ichapa yunukubainaya kenwankubainmisbuki.
Jakia yuda eskadabes yunukubaini
jatun xanen ibu babui ana kushipamaken
ana jawa ninkatidubumaki.
29 Tsuada jawa jin jin ikama unanxubida janchakin
jawen unanepa jatu uinmakubainmisbuki.
Jakia tsuada jin jin iki jawaida janchakin
jawen patapa jatu uinmakubainmisbuki.
30 Tsuanda jawada bika teneai jenetan
ana jawen nuiamaken jawen yudaki isin jikitidumaki.
Jakia juni betsan mabu uin jabias jayadianun ika kemumisbudan,
jatun yudaki isin xauki tekitan chapuai keskabuki.
31 Tsuanda nuitapaibu bika tenemakin ichakawakinan,
jatun damiwani Dios danain jaki sinatamamisbuki.
Jakia tsuada nuitapaibuwen nuikin
jatun damiwani Dios duawakin benimawakubainmisbuki.
32 Juni chakabu jatun chakabuwen chakabuwai di imisbuki.
Jakia juni pepabu duapakubaini
jawen pepawen jawa dateama unanuma mawatidubuki.
33 Tsuabunda bebunkidi pe shinankubainmisbudan,
jatun shinan medan unanepa jancha jayabuki.
Jakia unainsmapabun unanepati jancha jawa tapintidubumaki.
34 Jatun yunuti kushipa pepawen
nawa xukua betsa xanen ibui ibubis kenkubainmisbuki.
Jakia xanen ibun chakabuwakin
kanekubainaiwen jawenabu dakekubainmisbuki.
35 Dayadubu pepa anikabu xanen ibubun jatu bechipaikubainmisbuki.
Jakia dayadubu mawaida anikabumadan,
xanen ibubu jatuki sinatakubainmisbuki.