13
Jawen bake unanepatun jawen epan nemati jancha ninkaxun chibankubainmiski.Jakia bake jabiaska beyai ninkaismatunan,
jawen epan nemati jancha danankin jawa chibainsbumaki.
2 Jaska janchamisbu tibi jatun manakuti bixankanikiki,
pe inun chakabu yuimisbu tibiwenan.
Jakia juni puben detenamemisbunan,
ana jatu detekin chakabuwanun ixun
chakabu besti benakubainmisbuki.
3 Tsuanda jawen jancha mekemis ibubis meketidubuki.
Jakia tsuanda jamapai yui janchawanmisdan,
jamen jawena besti benuxanikiki.
4 Chikishbun jawada bechipaikin bikatsis ibiai jawa bitidubumaki.
Jakia dayakapabudan, jamapai jayakubainmisbuki.
5 Juni pepabun chani jancha dananmisbuki.
Jakia juni chakabubun jawada atimapa akai
uin jawen dakemisbuki.
6 Juni duapabu jatun pepawen mekemisbuki.
Jakia junin chakabuwakubainmisbu
jatun chakabuwen keyui yamamisbuki.
7 Juni betsabu jawa jayamabia:
“En mabuyaki”, iki kenmisbuki.
Jakia tsuada mabu ichapa jayabia xabakabi yuiama
nuitapai keska jiwemisbuki.
8 Yumetsubun jau jatu tenanyamanunbun
mabu ichapayabun jatun peiwen jatu daewatan
jawen jiwea piskutidubuki.
Jakia nuitapaibudan,
tsua jatuki sinatamawen taea jawa ninkama jiweabuki.
9 Juni pepabu bin chaxajaida keska benimamisbuki.
Jakia juni chakabubu bin nuka keskabuki,
jawa benima jayamadan.
10 Junibu ibubis kenkin jatu chakabuwamakubainmiski,
jatu detenamemakinan.
Jakia juni unanepadan,
keanma yusian pepa ninkamisbuki.
11 Dayai padananantan mabu jawaida ichawamisbudan,
jawaida jawen mabu keyuxankanikiki.
Jakia tsuanda unanxubida dayakin
mabu ichawakubainaidan, ewawaxanikiki.
12 Jawada akatsi shinanbiaya jamapai betsawen taea tea
atiduma unain juinti nishmamisbuki.
Jakia jaska uinkatsis ikin shinankin manakamis
taxniaya benimamisbuki.
13 Yunuti jancha danankin pe shinanma
jawada kanetan aitin ichakayamatiduki.
Jakia yunuti jancha ninka pewatan chibankin
manakuti pepa bixanikiki.
14 Unanepan yusinti jancha ninkaidan,
jawen jiwea jayaxanikiki,
ja mawawen datemis piskuidan.
15 Tsuanda pe shinankin akin pewabainaya
junibun kenwanmisbuki.
Jakia padananain chanichakakubainmisbu
ana jaskatan petidubumaki.
16 Unanepatun bebunkidi pe shinantan jamapai amisbuki.
Jakia unainsmapatun jamapai chakabuwakin
xabakabi jatu uinmakubainmisbuki.
17 Jancha bunika chakabunan,
jatun jancha chani peama jatu chakabu tuexunmiski.
Jakia jancha bunika pepan jatun jancha pepa chanikin
jatu daewakin benimawamisbuki.
18 Jawen medabewati yusinti jancha tsuanda dananmisdan,
yumain dakekubainxankanikiki.
Jakia medabewati yusinti jancha tsuanda ninkamisbu
yudabun jatu kenwanxankanikiki.
19 Jawada jaska bechipaiai akin menetanan,
jawen benimamisbuki.
Jakia unainsmapabunan,
shinan betsa watan jatun chakabu jenekatsi isbumaki.
20 Unanepabube jaibunantanan,
jawen unanepa jancha min tapinkubainxanaii.
Jakia unainsmapabube jaibunankinan,
jatun chakabu tapinkin matun beya pepa man putaxanaii.
21 Jabun chakabu mekubainaibudan,
jatun chakabuwen betsa betsapa tenemisbuki.
Jakia pepabunan, manakuti pepa bi jawen benimamisbuki.
22 Juni pepabu mawakin
jatun yusian pepa inun mabu pepa
jawen bababu jenexunbainmisbuki.
Jakia junin chakabuwamisbun
mabu ichapa ichawashinadan, mawaya
juni pepabun bikin ibuwaxankanikiki.
23 Nuitapaibun bai anu piti jamen ibiaya
tsuan jatu pe mekeama jatu ichakawakin
jatun piti jamen jatu benuntidubuki.
24 Tsuanda jawen bakebu bechipaiamadan,
chakabuwai jatu nemakin pewakatsi isbumaki.
Jamen tsuanda jawen bakebu bechipaikinan,
jatu yusinkin bebunkidi nema pewakubainmisbuki.
25 Juni pepatun pikin yaniwatan
benimai shinan chankankunkainmiski.
Jakia juni chakabun pibiai bunikunkainmiski.