12
Tsuanda nemati bechipaikin chibainan,jabiawendi unanepati jancha bechipaidiaikiki.
Jakia tsuada nemakin yusinbiabu dananmisbudan,
unainsmapa bestiki.
2 Juni duapa pepabuwen taexun
Jehován jatu duawakubainmiski.
Jakia yusinti pe shinanma
padananankin chakabu besti yui dakeisbumadan,
Jehován danankin jatu kupixanikiki.
3 Junibun chakabuwamisbudan,
ja chakabunan, jawen jatu mestenwantidumaki,
jiwe chibu jayama keskadan.
Jakia juni pepabu jatun jiwea mestenwanti
ji tapun uke medanjaida bexea keskabuki,
tsuan jatu betsetidumadan.
4 Ainbu unanepa pepatun jawen bene duawakin
xanen ibujaida keska wa jawen taea kentiduki.
Jakia jawen ain chakabutun jawen bene duawakin medabewama
jawen jiwea chakabuwamakin
nuitapawamiski, ana jatu shinantima wamakinan.
5 Juni pepabun jawada pepa besti akatsi ikin
ja besti shinankubainmisbuki.
Jakia chakabubu padananan bestikatsi shinankubainmisbuki.
6 Juni chakabubun janchadan,
januxun jatu tenanti bidun keskabuki.
Jakia juni pepabudan,
jawen jancha pepawen taea
jamapai chakabu anua piskutidubuki.
7 Juni chakabubun kanekubaini
jawen jiwea bextekei mawamisbuki.
Jakia pepabu jatun jiweadan,
unanuma jiweyukubainmisbuki.
8 Tsuanda pe shinankin jawaida tapinjaidanikadan,
jabudan, jatu kenwankubainmisbuki.
Jakia tsuada tatima unainsmapadan,
jawa jatu kenwanma danankubainmisbuki.
9 Tsuada kenwanma dananbiaibun
jawen tsumapan medabewakin dayaxuna jaskai
pe jiwetidubuki.
Jakia tsuada kenwanbiakubainmisbu
jawen piti ichapa jayamaken pematiduki.
10 Juni pepabun jatun inabuwen nuikin
jatukidi shinankin pe mekekubainmisbuki.
Jakia juni chakabubudan,
jamapai tibiwen jawa nuiama
jakidi shinainsbumaki.
11 Juni dayakapadan, jatun bai anu miban
piti jamen imiski.
Jakia unainsmapatun jawa daya pepa akamadan,
jawa piti ichapa jayatidubumaki.
12 Juni chakabubun jawada chakabu bechipaikin shinanmisbudan,
jisin keskawen nexea jani paxatidubumaki.
Jamen juni pepabudan,
ji tapun chaipa jaya keska
jatun shinan pepawen kushipakin
pepawakubaini mestenepa jiweabuki.
13 Juni chakabubun chanichakamisbuwen taea
ibubis jatun chakabuwen bexekea
jani paxatibubumaki.
Jakia juni pepabu chakabu anua kainbaini paxamisbuki.
14 Jaska juni tibi janchamisbu bixankanikiki,
pe inun chakabu yuimisbu tibiwenan.
Janua jaska akubaini dayakubainmisbu
jaskawen jatu pakadan,
chakabu kasmai pepa bixankanikiki.
15 Yusian ninkaisma unainsmapabudan,
dasibi jawada akubainai:
“En pe jiweaki”, ixun shinankubainmisbuki.
Jakia juni unanepabunan,
juni betsan jatu medabewakin pe yusiainbu ninka pewakubainmisbuki.
16 Juni unainsmapabu jawaida sinatakin
jawa juneama xabakabi jatu uinmamisbuki.
Jakia unanepabu jatu yuain jatuki kaxebiabu
ninkabiakin jatu dabainsbumaki.
17 Juni pepabun jawada ikaibu uin pewatan
chanima jancha besti yuimisbuki.
Jakia juni chakabun jawada uin pewamabia
chanichaka bestikin yuikubainmisbuki.
18 Juni betsa jawa shinanma
jatu jancha chakabu yuikinan,
nupewen jatu chachikin akawamisbuki,
jawa medabewamadan.
Jakia unanepabun jatu yusinkinan,
jatu medabewamisbuki,
dau pepa xeama keska wakinan.
19 Tsuabunda chanima jancha besti yuimisbudan,
jiwei ikibi ixankanikiki.
Jakia tsuabuda chanichakamisbudan,
jawen jiwea jawaida keyuxanikiki.
20 Juni chakabun shinain yubakaidan,
chanichakai padanananmisbuki.
Jakia tsuabuda unanuma jiwexun medabewakin
jatu yusiainbu ninkai benimamisbuki.
21 Juni pepatun jawa chakabuwaismaken
chakabun nuitapa watidumajaidaki.
Jakia juni chakabun dasibi chakabu betsa betsapa amis
betsa wama dasibi jaki dasi wabain Diosun jatu kupia nuitapamisbuki.
22 Jabu chanichakamisbu bechipaiama
Jehován jatu dananmiski.
Jakia tsuabuda jawa chanichama yui pewakubainaibu
jatu uin jatuwen Jehová benimajaidamiski.
23 Tapinjaidanika ibubis kenkin
jawada shinankin unain xabakabi jawaida jatu taxnimaxuinsmaki.
Jamen unainsmapabun jawa shinanma
jawada jancha pema yuibaunmisbuki.
24 Dayakapan daya pe tapintan jatu yunuxanikiki.
Jakia jabu chikishbudan,
juni betsan tsuma waxun jatu dayamamisbuki.
25 Tsuanda jawada bika tenejaidai juinti nishmai punu nukamisbuki.
Jakia tsuanda jancha pepawen bika teneaibu
medabewakin jatu benimawatidubuki.
26 Juni pepabun jabu ja dapi jiweabu
jatu jaibuwakin jatu yusinkin pewakubainmisbuki.
Jakia juni chakabubu jiwe chakai
bai chakabu chibain benumisbuki.
27 Juni chikish piaya kaxunan,
jawa tsakaisbumaki.
Jakia juni dayakapa jiweadan,
jamapai ichapa bitan jayamisbuki.
28 Yunuti pepa kushipa ja baiwen kaidan,
jawen jiweti jayaki.
Jakia unainsmapabu jiwei peisbuma
jatun jiwea benui mawa bestimisbuki.