11
Jawen pisatiwen tana pewamadan,Jehován danankin bechipaismaki.
Jamen jawen pisatiwen tana pewamisdan,
Jehován bechipaimiski.
2 Tsuada ibubis kenbiamis
jawada chakabu ashian taxniaya dakexanikiki.
Jakia jabu ibubis jawa keinsbumadan,
unanepaki.
3 Juni pepabun jatun beya pepa tapintan chibanmisbuki.
Jakia juni chanichakamisbun
ibubis chakabuwakubaini
jawen chani janchawen taea yamamisbuki.
4 Jehován janu unanti wakin jatu kupiaitianan,
tsuada mabu ichapayabia
jawa jatu medabewatidumaki.
Jakia tsuada jawen yunutiwen padanananma ikunkainaidan,
mawa kayabi anua Jehován jatu paxawaxanikiki.
5 Juni pepabun kaneaibun
ja yunuti pepatun jatun shinan
jatu kayatapinmakubainmiski.
Jakia juni chakabubun kanekin
jatun chakabuwen ibubis ana pikumisbuki.
6 Juni pepabun yunuti pepa shinain chakabu anua paxamisbuki.
Jakia padananain juni betsan jawada bianun ika jawen kemumisbudan,
jatun chakabudan, jawen yabukua keskaki.
7 Jamen juni chakabu jiwexun
jamapai tibi ichawanun ixun shinanbiamisbu
mawai jakimai dasibi keyuxanikiki.
8 Juni pepabu tsuanda jatu bika tenemaibu
Diosun jatu paxawakin medabewatan
januxun juni pepatun xantukun juni chakabu
Diosun jatu bika tenemamiski.
9 Juni chakabun jabe jiweabu
jawen jancha bestiwen jatu nuitapawamisbuki.
Jakia tsuabuda jatu ichakawabiabu
unanepa janchawen pepabu
ibubis mekei paxatidubuki.
10 Juni pepabun jatun daya pepawen jamapai ichawaibun
mae anu jiwea dasibibu benimakubainmisbuki.
Jamen chakabubu mawaibun
mae anu dasibi jiweabu benimai besimisbuki.
11 Juni pepabun jatun janchawen jatu medabewakin
jatun mae pewakin ewawakubainmisbuki.
Jakia juni chakabubun jancha chakabuwaiwen taea
jatun mae chakabuwaya
yudabun jenebainmisbuki.
12 Pe shinainsbuman jatun jaibuaibuki jancha chakabumisbuki.
Jakia unanepabudan, jaska shinain janchaisbumaki.
Pes bestikubainmisbuki.
13 Juni chanikepatun jawa juneama
dasibi jatu yuibaunmisbuki.
Jakia juni pepatun jawada june ninkatan
jawa jatu yuiama mekekubainmisbuki.
14 Xanen ibu yununika pepamaken
ja chibain jawenabu babui petidubumaki.
Jamen xanen ibun jatu meke pewakinan,
jawen medabewanika unanepa ichapabun medabewakin
yusin pewabu jatu ninkatan
jawenabu jatu piskumatiduki.
15 Juni betsan jatu pei bianyukatsis ikai inanbumaken
tsuanda yubatan inanmaimadan, jadan, nuitapaxanikiki.
Jakia tsua jaska shinanmakin amaismadan,
unanuma jiwetidubuki.
16 Ainbuaibu duapa pepabu
bechipaikin jatu kenwankubainmisbuki.
Jakia tsuada yudabuki jawa dateama
jawen jancha kushipawen jatu mesewatan
pei ichapa bi bestimisbuki,
tsua jatu kenwanmamadan.
17 Tsuada nuikipakin jatu medabewamiswen taea
ibubis pe jiwekunkaindiamiski.
Jakia tsuada jatuki sinatai jatuwen nuisbumawen taea
ibubis jiwe chakadiakubainmisbuki.
18 Junibu dayachakamisbu manakukinan,
padan bestixankanikiki, jawa pe inanmadan.
Jakia tsuada padanananma pepa wakubainmisbudan,
jawen manakuti pepa inanxankanikiki.
19 Yunuti jancha pepa kushipa chibankubaini
jiwea kayabi anu kaxanikiki.
Jakia chakabu akaibu chibainan,
jawen taea mawa kayabi anu kaxanikiki.
20 Tsuanda chakabu besti wanun, iwanan, shinanmisbu
Jehován jatu bechipaiama dananmiski.
Jakia tsuanda jawa chakabu meisma
pe besti jiwekubainmisbu
Jehován jatu uin benimajaidamiski.
21 Chanima kayabi juni chakabubu
janu jatu kupiaitian jani paxatidubumajaidaki.
Jakia pepabu jawa jatu kupiama
jawama kainbaini paxaxankanikiki.
22 Ainbu jawenduabia jawa tapinkin
pe shinainsmadan, jamenki,
ina yawa jawendua wakatsi
ja mane oro meichikiti kadujaidawen jamen
deuwatidubu keskadan.
23 Juni pepabun jaska bechipaimis akinan,
pepa taxnimakubainmisbuki.
Jakia juni chakabubun jawa shinanma jaska bechipaiai
akin jatu sinatamamisbuki.
24 Tsuabuda jawa yaushiama jawen jawada paxkatan inanananmisbu
jatu inanmisbu binumakin ichapa bikubainmisbuki.
Jakia inanananma yaushimisbu
jawa jayamai nuitapamisbuki.
25 Jawada jaya yaushiama paxkatan
jatu inainwen taea
jatun jawada Diosun jatu inankubainmiski.
Tsuabunda jawen mabu jatu inanmis
betsabun jadi inandiamisbuki.
26 Tsuabunda jawen xekiwan trigo
jawen kadu ana xekexanun, iwanan,
yaushiai keskakin mekekin aduyuken
jakidi jancha chakabu yuimisbuki.
Jakia tsuabunda jawen xekiwan trigo
jawen kadu xekema peiwen jatu inanananmisbu
jatu duawamisbuki.
27 Tsuanda pewen jatu medabewakin duawaya
jaska aki pe jiwea uintan bechipaixankanikiki.
Jakia tsuabunda chakabuwakubainaibu
jabia jawen chakabun jatu achixanikiki.
28 Mabu ichapa jaya ja bestiwen jiwenun ikubainmisbu
ni pei xanatan nidi imis keskabuki, benuidan.
Jakia ji jawen pei nidi iki keyubiatan
ana jukunkidanmis keskai
juni pepabu bika tenebiatan
ana jawa teneama pe besti jiwekubaintidubuki.
29 Jawenabube jiwea medabewakin jatu pe mekeama
paxkakainima jawa jayama ixanikiki.
Janua unainsmapabudan,
unanepabun jatu tsuma wakubainmisbuki.
30 Tsuabunda yunuti pepa kushipa chibain
jiwei petidubuki.
Yuda betsa chakabubiaken
tsuanda ja juni jawen shinan betsa wamakin
Dios chibanmaidan, ja juni unanepaki.
31 Na mai anu jiweabu pepabun
jatun manakuti pepa biaibun
jabun Diosun jancha ninkaisbuma inun
chakabuwamisbu jatu manakukin
jaska bechipaimisbu chakabujaidawen jatu kupixanikiki.