Salomónen yusinti jancha kene pewakubainibukiaki, na janchadan
10
Salomónen unanepa jancha ninkakanwen.Jawen bake unanepatun jawen epa benimawamisbuki.
Jakia jawen bake ninkaismatun
jawen ewa kaxamakin punu nuka wamisbuki.
2 Mabu besti ichawakin jatu padantan ichawaidan,
jawen pe jiwetidubumaki.
Jakia jaska Diosun bechipaiai pepa besti chibankubainmisbudan,
mawa kayabi anu kama piskutidubuki.
3 Juni pepabu buniaibu
Jehován medabewakin
jatu piti inankin bunimamamiski.
Jakia juni chakabubu jawada piti pepawen kemuaibu
Jehován jatu yaniwamaismaki, kupikinan.
4 Tsuada eskadabes dayamis
jawa jayama nuitapakubainmisbuki.
Jamen tsuada daya chakayamamisbudan,
dasibi jayakubainmisbuki.
5 Unanepabun mibanxun
badi tibi jushiain tsekaxun
jatun jiwe anu adumisbuki.
Jakia miban biaimaxun
tsuada jaki pechitan biama benushinadan,
chipu nuitapai ea iki dakemisbuki.
6 Juni pepabu jatun pepawen Diosun jatu duawamiski,
jawen pepawen manakukinan.
Jakia juni chakabun bemakis jatu pewabiakin
uke medan chakabu shinain jatube detenamemisbuki.
7 Juni pepa uinkin Diosun duawamis
betsabun jawen pepa shinankin jakimaisbumaki.
Jakia juni chakabukidi jawaida jakimamisbuki.
8 Unanepabunan, yunuti jancha pepa
jawaida ninkamisbuki.
Jakia jabu patapakin jancha chakabu yuimisbudan,
jawaida chakabui benuxankanikiki.
9 Tsuabuda pe jiwekin
jawa chakabu meisbuma
jawaki dateama unanuma jiwekubainmisbuki.
Jakia tsuabunda chakabu mekin junebiamisbu
jatun chakabu xabakabi bechitan jatu dake waxankanikiki.
10 Tsuanda juni betsa padanmakin
beduwen jatu unanmakin
jatukidi xechiku amisdan,
unantan jatu ichakawakin jatu nuitapawamisbuki.
Unainsmapatun pe shinanma
jawaida jatu jancha yuibauni chanikaunmisdan,
jawen chakabuwen taexun
jakidi pe shinanma jatu ichakawaxankanikiki.
11 Juni pepabun yusinti jancha pepawen medabewakin
Diosun jiwea kayabikidi jatu tapinmakubainmisbuki.
Jakia juni chakabun bemakis jatu pewabiakin
uke medan june shinan chakakin
jatu chakabuwamamisbuki.
12 Dananankunkaini sinatanamei detenamemisbuki.
Jakia juni nuikipanan, jawada chakabuwashinabu
jatu daewatan jatun chakabu jakimawatidubuki.
13 Unanepa janchakinan,
jancha unanepa yuimisbuki.
Jakia tapin pewaisbuma
unainsmapatun jawen jancha pe mekeama
chakabu yuiaibuwen taexun
danain jaki sinatakin jatu kakush kakush amisbuki.
14 Unanepabun jawen unanepati jancha mekekin
jawaida yuisbumaki.
Jakia unainsmapabun jatun jancha jawaida yuikin
mese wakin jatu sinatamamisbuki.
15 Juni mabuyabunan, tsuanda jatu chakabuwaibu
jawen peiwen pakakin jatu nematidubuki.
Jakia nuitapaibu tsuanda jatu chakabuwabu
jawaumawen taea jatu nematiduma jawawen paxatidumaki.
16 Juni pepabu dayakubainaibu
manakuti pepa bitan jiwea kayabi jayaxankanikiki.
Jakia juni chakabubu daya peama kanemisbudan,
jatun manakuti bidan, chakabui pikumisbuki.
17 Tsuanda kaneaibu pe jatu yusianbu ninkamisbudan,
pe jiwexankanikiki, jawa benuamadan.
Jakia pepa jatu yusianbu danankin ninkaisbuma
jatun jiwea benuxankanikiki.
18 Chanichakamisbu june mia danain sinatabiai
mia jawa yuiamaki.
Jakia unainsmapabu tadi janchabiaibun jawenamabia
dasibi ikaibukidi jatu yuibaunmisbuki.
19 Tsuanda jawada tibikidi yui jancha chakayamakinan,
kanekubainmisbuki.
Jakia unanepabudan, mawaida janchaisbumaki.
20 Juni pepabun janchadan,
mane plata kadu pepa keskaki.
Jakia juni chakabubun shinanan,
jawa pemajaidaki.
21 Juni pepabun jawen janchawen jatu yusinkin
ichapa jatu tapinmamisbuki.
Jakia juni unainsmapabun
pepa shinankin katutiduma mawamisbuki.
22 Jehován tsuada jatu duawakinan,
mabu pepa ichapa keska jatu inankin benimawamiski,
jawa jatu bika tenemakin isin tenemamadan.
23 Juni unainsmapatun chakabu tibi wakubaini
jawen besti benimakunkainmiski.
Jakia juni unanepa jawen unanepawen benimamiski.
24 Juni chakabubu jawada judiamabiaken
jaki datejaidamisbu jatuki nukuai mexankanikiki.
Jakia jawada juni pepabun jaska bechipaimis uinxankanikiki.
25 Niwe kushipajaida shubi shubi ibidankin
juni chakabubu yamawakin keyuxanikiki.
Jakia juni pepabunan, jawa meama
jawama jiwekubainxankanikiki.
26 Juni chikishbu jawen tsumapan jatu yunubia axuainsmadan,
bimi bunkash piabu jatun xeta maxex wakin
chakabuwamis keska inun,
chi kuinman jawen bedu jatu bechexkin
chexanwanmis keskabuki,
tsuan jatu bechipaiamadan.
27 Jehováki datekin duawakubainaibu jatun jiwea chaipa jayayuxankanikiki.
Jakia juni chakabubu jatixuinda jiweama ixankanikiki.
28 Juni pepabun jatun manakuti pepa juaya bi benimaxankanikiki.
Jakia juni chakabubun jatun manakuti pema juaya
benu bestixankanikiki.
29 Jehován jatu mekekinan,
jabun pepa wakubainaibu jatu mekemiski.
Jakia jabun chakabuwakubainaibudan,
Jehován jatu kupikin yamawamiski.
30 Juni pepabu jatun jiwea
betsa taska kane jayama ixankanikiki.
Jakia juni chakabubu na mai anu jiwei ikibi ikama ixankanikiki.
31 Juni pepan kexa anua jancha unanepa taxnimiski.
Jakia jabun chakabu yuikubainmisbu
kupikin jatun jana mextea keska wakin
jatu nesewaxanikanikiki.
32 Juni pepabun jawada pepa yuikin jabun ninkaibu jatu benimawakubainmisbuki.
Jakia juni chakabubun yuikin
atimapa jancha besti yuikubainmisbuki.