Unanepa inun unainsmapakidi yusinikiaki, na janchadan
9
Unanepan jawen jiwe wakin7 chibu jawendua nichinkin kushipa watan
2 januxun bedunanbu jatu yusinun, iwanan,
piti jawendua tibi jatu pimakatsi jawen ina detexun
januxun ja nuxuti vino pepa pewatan jakixun piti
tapu jatu pewaxuntan
3 jawen tsumabu mati mapetan
mae ewapa anu jiweabu jatu
sai akin eska jau jatu yuitanun yuikin:
4 “Bedunan tapinsbuma inun unainsmapabuun,
nedi bekanwen.
5 Piti en matu pewaxunxu inun
vino pepa en matu pewaxunxu
pikin nexui bekanwen.
6 Tapinjaidanika jancha ana dananma
tapinjaidatan jiwekubainkanwen,
jaska tapinjaidai jiwemisbu keskai jiweidan, jatu atankanwen”, aka buxun
7 tsuada medabewakatsis ikin jatu pewabiabu
juni chakabubu jawaida sinatamis
jawa jaska tapinkatsi ikama
jaki jancha chakabujaidai
jaki kaxe bestitidubuki.
8 Jabu kaxei jawaida sinatamisbu nemakin
min jatu tapinmapaia
miki sinatakin mia danan bestixankanikiki.
Jakia juni unanepa nemakin min tapinma
shinan pewatan miwen benimatiduki.
9 Jamen juni unanepa min yusian ninkakin tapinjaidai
ana unanepa chakayamaxanikiki.
Juni pepa min yusian mia ninkatan ana ichapa tapinxanikiki.
10 Unanepai taekinan, Jehová ja dukun ninkatan duawakubaintiki.
Dios medibi pepajaida min unainan,
jawaida tapinika min ikunkaintiduki.
11 Tsuada ewen taea unanepaidan,
jawen jiwea badi ichapa jiwexanikiki,
Diosun ana jiwemakubainadan.
12 Mia min unanepadan,
jiwei pekin pepa besti min bikubainaii.
Jakia patapai min ninkaismamisdan,
jadan minaki, chakabudan,
min jawa biama ixanaidan.
13 Tsuada ninkaisma patapadan,
ainbu chakabu unainsmapa
jawa unanma chani besti yuimis keskaki.
14 Mae ewapa mananan anu
jawen jiwe beputi anu xabakan tsauti anu tsauxun
15 junibun jawa shinanma
jatun shinan pepawen bai tanabaini buaibu
ja ninkaisma patapa ainbu keskatun jatu kenakin:
16 “Bedunan tapindiabumaan,
nedi bekanwen”, akin
jabun pe shinanbuma jatu yuikin:
17 “Unpax yumetsutan akadan, pejaidaki.
Misi junexun piadan, nuejaida min unaiin”,
akin jatu yuia
18 ja ainbu keskatun jatu kena bumisbudan,
jabu unainsmapabu jadi pe dabanen mawa kayabi anu buaibu jawa unanbumaki.