Unanepan jatu tapinmakatsi jatu kenamiskiaki, na janchadan
8
Ja unanepa jancha juni keskatunjawen jancha taxnimakin jatu tapinmakatsi ikin jatu kenamiski.
Ja tapinmanika jancha juni keskatun
jawen jui kainmakin jatu ninkamamiski.
2 Unanepa jancha inun tapinmanika janchan jatu ninkamamisbuki,
manananxun inun bai kapukea anu niti ixun yuikinan.
3 Mae ewapa mishki kenebaunibu
jikiti xui jawen beputi anuxun
jatun jui ninkamakin jatu yuikin:
4 “Junibuun, matu inun matun bakebu anu en matu jancha waii.
5 Man bedunan jawa tapindiabuma inun unainsmapabuun,
jaskai man unanepatidu inun man ninkanikatidu ea tapinkanwen.
6 Jancha pepa putatima jatun en matu medabewatidan,
en eaki. Ninkakanwen.
7 Jaska en matu yuiai chanimaki.
Chani jancha yuiaibu en bechipaismaki.
8 Dasibi en janchadan, yui kayabiki,
jaska en matu yuiai en kanetidumadan.
9 Jabun ichapa xabakabi tapintidubu inun
xabakabi ninkatidubunan,
en janchadi xabakabi pepa ninkakin
jawa en kaneama ninkamisbuki.
10 Ja dukun benakinan,
yusinti kayabi inun tapinti kayabi
benakin tapinkubainkanwen.
Jaska min tapiainan, mane plata inun
mane oro bechipaibiamisbu binujaidaki.
11 Unanepati janchadan,
jawen jiwei pejaidakunkainkin
jamapai mabu nenkati jawendua kushipajaidabiaken binuaki.
Jamapai mabu shadabu jaya man jawen kemubiamis
ja unanepati janchan dasibi binuaki.
12 Ea juni keskai unanepa janchakin yuikin:
Ea unanepadan,
en jaibu tapinjaidanikabe en jabe ketaxameaki.
Jabe medabenain en jawa adiama
nuku dabe yubakakin pe shinantan
pejaida nun yusinmiski.
13 Jehováki datekin duawakubainkinan,
chakabu danain min jaki sinatatiduki.
Eanan, nati chakabu en dananmiski:
ibubis keainbu inun, ja:
En ean besti jamapai unan keyuaii, imisbu inun,
jiwe chakakubainmisbu inun,
chanichakakubainmisbu ean en jatu dananjaidamiski.
14 Chakabu unanti wanika inun
pepa unanti wanika kushipadan, en ea bestiki.
En unan keyuaiwen taexun
bebunkidi jawada en akatsis ikai yubakatan
en akubainmiski.
15 Ewen taea xanen ibui kushipakin
jatunabu xanen ibuxunkin pe jatu yunukubaintidubuki.
16 Ewen taea mai pakea anua
xanen ibubu inun, jatun bakebu inun, xanen ibu bexmasbun
jawada pe inun jawada chakabu
jatunabun akaibu pewen besti jatu yunukin unanti watidubuki.
17 Tsuabunda ea bechipaiaibudan,
eandi en jatu bechipaimiski.
Tsuabunda ea benai eki nukumisbuki.
18 Ea benakin ea shinainbu
pewen jatu manakukin jatun jiweti mabu pepa
inun benimai jiweti en jatu inankin duawamiski.
19 Ea ninkakin tapiainbudan,
pejaidawen en jatu manakukin inankatsis ikaidan,
ja oro mane jas inun plata mane jas binujaidaki.
20 En ea unanepa kaidan,
bai pepa yuxtumawen kakin
jawa jatu kanemama yunuti kushipa
en jatu unanti wamakubainmiski.
21 Tsuabunda ea bechipaiaibudan,
jawena en inaiin, jamapai pepa bitan
jawen jiwe anu adukin jau ichawaxanunbunan.
22 Jehován mai inun nai dasibi
dami wakin taewadiama
ea dukun ea taxnimaniki, en unanepadan.
23 Mai dami wadiama ea dukunjaida ea dami wakin taewaniki,
jawa mai anu betsa taxnidiamajaidatianan.
24 Ianenwan tibi jayadiama inun,
jene tibi inun janua chacha beai unpax tibi jabadiama
ea dukun taxnimatan Jehová ea jayaniki.
25 Mati keyatapa inun mawa tibi dami wadiama
ea dukun taxnimatan Jehová ea jayaniki.
26 Ja mai jidabi anu bai wati tibi inun,
ja mai mishpu bitan mai jidabi ja dami wani adiamabia
ea dukun ea taxnimaniki.
27 Natukan nai naman ianenwan dami wadiamaken
ja bebun ea dukun en jayai taeniki.
28 Nai anu nai kuin dami wadiama inun,
ianenwan janua jene taxniai dami wadiama inun,
29 ianenwan kebenkin jawen kesua kexa tibi pewadiama inun,
mai jaki dakati pewadiama
30 eadan, jabe ketaxamekunkaini
jawa paxkama Jehovábe ea unanepa janu en jabe iniki.
Ewen benimakunkainaya
Jehová bebunua badi tibi jawa paxkama
jabe benimai en beyuskunkainiki.
31 Diosun junibu bawaiwen taea
jabu shinain jatuwen en benima chakayamakunkainiki,
mai jidabi jiwemashinawen taea jaki beyuskunkainidan.
32 Ea unanepa en matun epa keskaki.
Natian ea ninkaidakanwen.
En akubainmis ea chibain
man benimakunkainxanaii.
33 Ea unanepakidi en matu yusiain ninkakin tapinkin
ea dananyamaxankanwen.
34 Eadan, en bepenmanaki.
Tsuabuda ea anu juxun
dasibi en yusian badi tibi ea ninkakubaini chintuanma
en jatu mekea jaya jabun ea ninkai benimakubainxankanikiki.
35 Tsuanda ea benai eki nukutanan,
jatun jiwea kayabi bixankanikiki,
jaska Jehován bechipaimis chibanmiswen taexunan.
36 Jakia tsuanda chakabuwakin
kanetan ea jenebainidan,
jawen jiweadan, ibubis chakabuwaxankanikiki.
Jatun ea danainan,
jawen mawa bechipaikiki.”