Ainbu beneyabiatun mia chutamakatsis ikai unanmatikiaki, na janchadan
7
Epaan, en jancha ninkakinen yunuti jancha shinaindakubainxanwen.
2-3 Jaska min bedu yaushikin min pe mekemis keska wakin
en yunuti jancha inun en yusinti jancha
min meken anu dispiwen nea keska wakin
min shinan uke medan netan pewatan
shinankubaini min pe jiwetiduki.
4 Unanepa janchakidi shinankin:
“Unanepa janchawen min jawen janchatidudan, min pui keska wawe.
Jawaida tapintikidi shinanan,
min jaibu ainbu keska wawe.
5 Min jatu jaska wadan, ainbu beneyabun jancha jawenduawen
mia chutamakatsi ibiaibun
unanepati jancha inun jawaida tapinti shinan
min jayawen min paxatiduki.
6 Xaba betsatian en jiwe janu uinti xui bepenxun june en uianyan
7 bedunanbu jawa shinan pepa bidiabuma ea dainbainaibu
jatube bedunan betsa unainsmapajaidadi kai en bechia
8-9 ma badi kai meshuaya ja bedunan bai tanabaini
bai betsa ketanbaini kapukebaini
ainbu padanananikatun jiwekidi kayanbis kaya
10 ja ainbu jawen jiwe anua ja bedunanki nukunun ika
taxnikidani jawen bachi inun jawen besu jawendua
jininipa beneuma keska
11 bebunkidi jawa shinanma jawaida janchai
inun jawen jiwe anu dayaisma
12 mae ewapa anu bai inun plaza bai kexa tibi anu nikunkainkin
ja dukun juni juai achikatsi manakubainmis ja bedunanki nukutan
13 ikuxun jantsu jantsu atan jawa dakeama yuikin:
14 ‘Jaska en yubakashina
ikis en yushin dios daewati ina xeni en jatu kuamakin keyuxuki.
En ma piti jayaki.
15 Jaskawen taea miki nukunun ika en taxnikidanaii.
Jaska bechitanun ika jukidan en ma miki nukuxuki.
16 Egipto anua tadi jawenduawen
en dakati bebekankin pewatan
17 mirra inun áloe inun canela xeni inijaidawen en cha abidanxuki.
18-20 En bene janumaki. Nanta chai kashianki.
Pei ichapa bushianwen taea uxe babekediamaken
chintundiamawen taea
en jiwe anu kananwen, jadia penadiama
meshu jidabi chutanamei bechipainamei
nun benimanunan’, akin
21 jancha jawenduawen yuikubainkin jeneama
ja bedunan jawen shinan betsa wa
22 ana jawa shinanma jabe ja ichun kaimaki.
Ina awa tesenun ixun jawa unanma
dispiwen nexaxun ninibainkin iyumisbu keska inun
chaxu bidun medan jikia
23 pia kuinwen tsakakin pishchakax amisbu keska inun
peiyabu jui jisin chaipa bidunwanbuki jikimisbu keskaidan,
ja bedunantun ainbu jininipa chibain
mawai kaikiki, jawa unanmadan.
24 Jaskaken epaan, ea ninka pewakin
en jancha shinankubainxanwen.
25-27 Ja ainbu jininipan jiwe anu kai
jawen bai tanabaini ichapa mawamisbuki.
Ainbu jininipan jatu iyuxun chakabuwaya
juni ichapa ma debuabuwen taexun
jaska ainbu jininipan jatu amisbu shinankin
miandi kanei jachun kayamaxanwen,
ja baiwen kai mawai benukatsi ikamadan”, anikiaki.