Juni betsan pei bianyukatsis ikai betsan medabewatimakiaki, na janchadan
6
Epaan, nawa anua min jaibun jawen pei bianyukatsis ikayamedabewakin nawa min yuixuna pei inainmaxun
chipu nawan jawen pei mia yukatiduki,
min jaibun pakamawen taexunan.
2 Mian yunukin min janchawen yubakin
ibubis min kaneimawen taexun mia ma achiaki.
3 Epaan, jaskatun ma mia achia kainkatsidan,
ibubis nawa pakakatsi ikama min jaibu eska wawe.
Jadakidida min jaibun mia jancha chakabuwatidu dateama
jawaida min jaibun jau pakanun
ja bebun ka danti ixun yukakin ea a chakayamawe.
4 Uxadiama inun jawa juindukuanmajaida
5 chaxu piayabuki datei paxamis inun
peiyabu bidunki datei paxai nuyakainmis keska kain
min jawaida pewatiduki.
Chikishbu jaska yusianwen yusintikiaki, na janchadan
6 Chikishbuun, ea ninkakanwen.
Unanen jawen piti adumis buxun uintankanwen.
Jaska wamisbu uinkin shinankin
jabun dayakidi tapinkanwen.
7 Ja unan xanen ibuuma inun jatun yununika jayamabia
ibubis shinain dayachayamisbuki.
8 Badian jatun piti bitan bitankin
jatun kini anu adukin mata wamisbuki,
yudabun jatun yunu tsekaxun adumisbutianan.
9 Chikishbuun, jaskaida ana uxayamakanwen.
Man uxadan, ¿jatian bestentan man beniai?
10 Uxa paen matu achia tinintantani
¿xuikukui petan besti man uxakatsis ikai?
11 Chikishi man jawa dayamawen taea
jawa jayama man nuitapakunkainxanaii,
juni daya jayabuman matun mabu matu bianbaina keskaidan.
Juni chakabubun jatun akadan, eskakiaki, na janchadan
12 Juni chakabubun jatu chakabuwamis pe shinanma
chanichakakin chani besti jatu yuibaunmisbuki.
13 Jatun shinan chakabu jatu unanmakin
jau chakabuwanunbun
beduwen jatu yuikin jatu xechiku akin inun
jatun taewen jatu timakin inun
jatun metutiwen jatu metukin jatu unanmamisbuki.
14 Jatun shinan chakabuwen taea
shinan chakabuwakin jaska shinankubainmisbuki,
jau detenamenunbun jawada juni betsan jakidi chakabu yuixu
jatuki chanikin jatu sinatamaidan.
15 Jaskamisbuwen taexun jabu kupikinan,
chakabujaidawen jatu bika tenemakin
jawaida betsupe ika keska wakin
jatu chakabuwakin yamawakin keyuxanikiki,
jawawen ana kayatima jatu wakinan.
Eska tibi Jehován dananchakayamamiskiaki, na janchadan
16 Chakabu betsa betsapa akin 6 kasmai 7ki amisbudan,
Jehován jatu uin bechipaiama dananchakayamai
jatuki sinatajaidamiski.
Jaskakidi matu yuinun ea ninkakanwen.
17 Ibubis kenmisbu inun,
chanichaka bestimisbu inun,
jawa chakabuwamabiaken
jatun mekenwen jatu tenanmisbu inun,
18 jawen jatu chakabuwanun ika
juni betsaki yubakamisbu inun,
jamapai chakabuwaibu jatu medabewanun ika
kushibainmisbu inun,
19 juni betsan chakabuwaxu jatun jawa uianmabia
chanichakai xanen ibuki chanimisbu inun,
betsabu jau sinatanamenunbun
jatu chaniwen padanmisbu
jabu dasibidan, jatuki sinatakin
Jehován jatu kupixanikiki.
Ainbu min ainma chutakatsi shinantimakiaki, na janchadan
20 Epaan, min en bakewen taexun
min ibu juni inun min ibu ainbun yunuti inun nemati jancha chibankin
nukun yusian dananyamakubainxanwen,
shinankubaini jawa jakimamadan.
21 Teuti teua keska wakin
min juinti anu netantan jakimayamakunkainxanwen.
22 Jatunan, janida min kai mia mekexun iyukin
janu min uxai anu mia mekea inun,
uxa min besteanyan ana mibe janchai keskakin
mia shinanmakubaintiduki.
23 Chanima ja yunuti jancha inun ja yusinti janchadan,
min kai anu bin ewapa dekua chaxa keskaki.
Min kaneai nemakin mia pewaibu inun jawen shinanmati jancha mia yusiainbu
chibain jiwea kayabi min jayaxanaii.
24 Jaska inun, ainbu betsa chakabu
juni tibibe chutanamemisbun jancha jawenduawen mia padantidububia
nukun yusian jancha shinantan min jawen nematiduki.
25 Ja ainbu jawenduatun mia uinkin mia kemumabiaya
jawen yudawen kemukin shinanyamakubainxanwen.
26 Ja inun, ainbu jininipa beneumatunan,
chutanamekin jawen piti besti benai yukamisbuki.
Jakia ainbu beneyatun jawen bene padantan
juni betsa chutamatanan,
min jawada mia keyu biantiduki.
27 Juni betsan chi deken ikuadan,
jawaida jawen tadi menumiski.
28 Ja inun, juni betsa chi dekenki paia
jawaida jawen tae menudiamiski.
29 Jabiaskadiai juni betsan ain beneyabiaken
jabe chutanamemisdan,
chanima jawen kupiti bixanikiki,
chi deken ikua keskaidan.
30 Juni betsa bunijaidakin pinun, iwanan,
piti yumetsutan piken jawa jaki sinatatimaki.
31 Jakia june yumetsuaya bechitan achiabu
ja junin jawada jatuna yumetsuxudan,
jau 7ki jawen mabu jau ana ibu inan keyununwen,
dasibi jawen jiwe anu mabu jawada jaya inan keyukinan.
32 ¡Jamen unainsmapatunan,
ainbu beneya tsuanda chutaidan,
ibubis jawen jiwea chakabujaidawaikiki!
33-35 Jawen benen yaushikin unantan
jaki sinataidan, chi keskaki.
Ma chakabuwakenan,
janchawen inun inankuinti ichapawen
tsuan nemakin daewatidumaki.
Jawen chakabu bene jakimakatsi ikama
dete dete akin dake watan nichinxanikiki.