Ainbu chakabukidi yusinikiaki, na janchadan
5
Epaan, en unanepa jancha ninkaidawe.Jaska ean en tapini miadi yusinun pesxun ea ninkawe.
2 Na jabiatian jaska tapintan shinan pewai
unanepan jancha unantan min jawen janchaxanaii.
3 Eska mia yuinun ea ninkawe.
Ainbu jawendua beneyabia kemui jawen jancha kemutapatunan,
piti xeni pepa min bechipaimis keskatun binutiduki.
4 Jakia jawen jiwea chakabu eskaki.
Tsuada ja ainbu jaska padanananmis
jawen jancha ana jawenduama
ni pei mukajaida keska inun
nupe kenu dabeya keskawen jatu mexteabu
isinjaidamisbu keskaki.
5 Ja ainbun jatu iyukinan,
jau jabe mawai kanun jatu iyumiski,
jawa jatu niti akama janu mawa maiwamisbu anu jatu iyukinan.
6 Ja jiwea kayabi baiwen kai jawa pe shinanma
jawen jiwea mestenmawen taea
jawen nuitiduma inun jawa unanmaki.
7 Jaskawen taexun epaan, en jancha ea ninkatan
en yusinti jancha jawa jeneyamakubainxanwen.
8 Ja ainbun jiwea anu jadi min kemashinken
9 jaska min jiweawen badi ichapa daya chakayamakunkainkin
min mabu ichawakubainaya
nawa betsa jawa miwen nuiama
miki sinatakin mia mebintiduki.
10 Jaskaken dasibi min daya pei inun jawada min dayaima
jau nawa betsan biyamaxanun
ja ainbu chakabu anu jawa jadi kemayamaxanwen.
11 Jakia en jancha danain ainbu chakabu anu min kakunkainmis
atimas min jiwea keyui
min yuda unanxubida babukunkainkin
12 januxun ibubis shinain: “Ea yusinkin nemabiabu
¿jaskakin jatun yusian en danankubainimamen?
Ewen nuikin ea nemabiabu ¿jaskakin en jatu ninkama ikunkainimamen?
13 Juni yusinanbun ea yusianbu en jatu ninkama ikimaki.
Janua ea unanmabiakubainabu en jatu danainmaki.
14 Enabu dasibibun ea uiainbun
chakabu mei en jawen benui pemajaidashina shinain en dakejaidaii”, iwanan,
“Aitin ichakayamakin min yuikubainxanaii.”
15 Jakia en jancha ninkakubainwen.
Jaskawen taea min ainan, chacha unpax pepa jabai keskaki.
Chutanamekatsi ikin min unpax manuai keskakinan, min ain besti chutakubainxanwen.
16 Unpax pepa bai namaki jukakin chakabuwa keskakin
ainbu betsawen kemukin mekin
min juda chaka wama min ain besti chutakubainxanwen.
17 Min ainan, mina bestiki, betsanamadan.
Jau juni betsan min ain chutanun
min ain yunuama mina besti wakin chutakubainxanwen.
18 Chacha unpax pepawen kemukin nun bechipaimiski.
Min ain bedunantun min biai
Diosun mia inani jabe mia duaya
jabe besti benimakunkainxanwen,
ja chacha unpax min bechipaimis keskaidan.
19 Chaxuwan bake jawendua pishta keska
min ainin yuda jawendua min bechipaiai
mia damanbauna jinin bitan benimakin
ja besti chutakubainxanwen.
20 Epaan, ¿jaskai jawa shinanma
ainbu juni betsanawen min kemukunkainai?
¿Jaskakin ainbu min ainma
ikutan jawen chuchu damankin min mekubainai?
21 Juni tibi mapuxun akubainaibu
jaska akaibu Jehován uinkin
jawa jakimama shinankubainmiski.
22 Juni chakabun ibubis jawada chakabuwamisdan,
jawen yuda chakabun achitan
dispiwen neakin akawamamisbuki.
23 Janua nemati jancha tapianma
dananmisbuwen taea mawa kayabimisbuki,
patapa ninkaismajaida benuidan.