Jiwea pepa jau chibankubainunbun jatu yusinikiaki, na janchadan
4
Epaan, man en juni bakebuwen taexunen yusian pepa tapinkin
en jancha ea ninkakin matun jiwea pewakubainkanwen,
jawada pepa inun jawada chakabu unanti wakinan.
2 En yusian pepa en matu yusinkin pewaidan,
jawa jakimakin jamakidi shinanyamaxankanwen.
3 Eadan, en jatun bakedi iniki.
En ibu ainbun ea bechipaikin duawakubainaya
4 en ibu junin ea yusinkin yuikin:
“En mia yusiain shinain
en jancha jakimayamaxanwen,
jaska en mia yunuai keska aki
min pe jiwekunkainxanaidan.
5 Unanepai inun shinan pepa bestinun, iwanan,
en yusian jancha jakima taskayamaxanwen.
6 Unanepa kayabi tapinkin bechipaikin jeneyamawe.
Min jaska waya jatun mia mekexun unanmakubainxanikiki.
7 Jamapai betsa min adiama
ja dukun unanepa inun jawada pejaida
min unanti watidu tapintan
ja shinankin chibankubainxanwen.
8 Unanepati mian min bechipaiaya
unanepan mia kenjaida wadiaxanikiki.
9 Maiti jawendua keska mia sawematan
unanepan mia duawakubainxanikiki”, ea wa en ninkadianiki.
10 Epaan, en yusian jancha ninkakin tapintan
ana badi ichapa min jiwekunkainxanaii.
11 Unanepa jancha en mia yusiainwenan,
jawen en mia iyu pewaxanaii,
bai pepa mia chibanmakinan.
12 Jiwea bai pepa min chibain
tsuan mia nematidumaki.
Ja jiwea pepa chibain jin jin ikama inun
jawaidabiakaini kanei min jawa juti ikama ixanaii.
13 En yusinti jancha dananma mestenwantan
jakimakin jeneama chibain min pe jiwekunkainxanaii.
14 Juni chakabu ikaibu jatuki dasitan
jatun chakabu chibankin jatubetan meyamaxanwen.
15-17 Jabu juni chakabubun jawada chakabuwadiama
pe shinain dakatidubumaki.
Yuda betsa jawa kanemadiama shinain uxatidubumadiki.
Jatu detekin itimaska wakin
jabun jatu chakabuwaibu
jatun piti inun jatun nuxutidan,
chakabu besti kainmamisbuki.
Jatu dunkekin jenebaini jatukidi ana jawa shinanma
pe besti ikunkainxanwen.
18 Juni pepabu jawen jiwea jawenduai
penai xabai taeitian
badi kainkidani badi manananbi daka
chaxa chaxa ichakayamai keskai
ana pejaidakubainmisbuki.
19 Jakia junibu chakabu jiwekubaini
meshu medan kai jawa unanma
jawadaki juti imisbu keska
jaska wakin chakabuwakin kaneaibu tsuan unanbumajaidaki.
20 Epaan, min en bakewen taexun
pesxun en yusian ana ninkakin pejaida wawe.
21-22 Min ekidi tapiain min yuda jawa isin teneama
en yusian shinain min jawen jiwekunkaintiduki.
Jawa benuama jakimama shinankin
min juinti uke medan en yusian netan pewakubainwen.
23 Jaskakin jiwea kayabi min bitiduwen taexun
jawada betsa mai anua min bechipaiai
binumakin min shinan pe mekekubainxanwen.
24 Chanichakakin min yuiadan, chakabujaidaki.
Ja jenekin jaska ana shinanyamakubainxanwen.
25 Juni chakabubun betsa betsapa jaikaimas shinanmisbu inun
tsuanda mia uintiduwen taea
jatuki jawa dateama jadidi min kai
chintuanma pe besti shinankubaini jiwekunkainwen.
26 Jaska jiwekainkin janida min kai
bebunkidi shinan pewawe.
Jaskai bai tanai nixun
chakabuwakin min kanetidumaki.
27 Kanekin bai chakabu chibanun, iwanan, shinanma
pepas chibankin jeneyamakubainxanwen.