Unanepai jau unanuma jiwekunkainxanun yusinikiaki, na janchadan
3
Epaan, min en juni bakewen taexunen yusinti jancha tapintan jawa jakimayamaxanwen.
En yunuti jancha inun en nemati jancha shinankubaini
2 benima besti min jiwei chaipakunkainxanaii.
3 Dasibibuwen nuikunkaini
chanima jancha jawa jeneyamakubainxanwen.
Teuti sawea keska wa jatuwen nuikin chanima jancha sawewe,
min shinan uke medan netankinan.
4 Min jaska jiwekunkainaya
Dios inun yudabu miwen benimakin mia bechipaikubainxankanikiki.
5 Jaska ibubis min unanepaiwen akama
jakia min juinti jidabiwen Jehová ikunwankin
jaska mia yusiain besti chibankubainwen.
6 Jawada dasibi Jehován bechipaiai shinankin
min akubainaya Jehován mia tapinmakin
jawen bai pepa mia yusinkubainxanikiki.
7 Ibubis kein: “En unanepajaidaki”,
iwanan, shinanyamakubainxanwen.
Jakia Jehováki besti datekin ja besti duawai
chakabu tibi jene keyutan ana meyamakubainxanwen.
8 Jehová besti min duawakubainaidan,
dau pepa min xea keska waya
min yuda kushipakunkainxanikiki.
9 Jawada dasibi mabu min jaya
inun min miban ja dukun bimi taeai tsekaxun
Jehová duawakin ja dukun inankin jawen kenwankubainxanwen.
10 Min jaska wakubainaya
min piti aduti jiwe anu min piti mata wakin
min uva vino aduti mai kenti shumu ewapabuki
mata wakin mia bupakemaxunxanikiki.
11-12 Jawen juni baken kaneaya
jawen epan tapinmakin yusinkubainmis keska wakin
tsuabuda Jehován jatu bechipaiai kaneaibu
jatu nemakin pewakubainmiswen taexun
epaan, min kaneai Jehován mia pewakin bika tenemaya jawa dananyamakubainxanwen.
Jawen kushipawen mia yunukubaina
jawen jancha bikabiaken ninkaxunkubainxanwen.
13-14 Plata mane juxupa inun
oro mane ichawai jawen pepabiaibun
jakia tsuada unanepai ninkanikakin
oro inun plata binumakin
dasibi ninkakin tapin keyutan
jawen benimakin jatu binukubainxankanikiki.
15 Jawen dauti inun
meichikiti inun pau inun
teuti pepajaida kadujaida jayabiabun
tsuada unanepakin
ja mabu jawendua bechipaijaidakin bimisbudan,
pepabia unanepatun jawen jatu binujaidatiduki.
16 Unanepawenan, ainbu duapa keskakin
nekedixun min jiwea chaipa mia inanyan
ukedixun mabu pepa inun yudabun mia duawakubainai
min jaska jiwekunkaintiduki.
17 Unanepa jancha chibainan, benimakunkaini inun
unanepa bai tanabaini unanuma min jiwekunkainxanaii.
18 Tsuanda unanepa jancha tapintan chibain jawen jiwetidubuki,
pe mekei benimakunkainidan.
19 Jawen shinan unanepawen
Jehován mai inun nai dami watan mestenwaniki.
20 Jawen unanepajaidawen shinantan ianenwan paxkatan
nai kuin anua basnun taxnimakin taewaniki.
21 Epaan, min shinan pepa adutan jadatuda pepa inun
jadatuda chakabu unanti tapintan jawa jakimayamakunkainxanwen.
22 Jaskakunkainkin Diosun bechipaiai teuti jawendua teua keska
min jawen pe jiwekunkaintiduki,
23 jaki chiti itan jawa dateama kai ana kane taskamadan.
24 Shinan pepai inun unanepai jiwekunkaini
janu min juindukuaintian jawa dateama inun
janu min uxaitian unanuma min dakatiduki.
25-26 Jehováki min chiti ika
jatun jawen pepawen mia inankubainxanikiki,
babui min jawen dateyamanunan.
Janua jawada mesejaida juaitian mia mekekin nemaxuna
ja mesen mia achiama ixanikiki.
Ja inun, junibu chakabu mibe jiweabu
jatu kupikin yamawaya
min jawa dateama ikunkainxanaii.
27 Tsuada jawa jayamatun medabe mia yukai
min axuntidu jatuki chikishama axunkubainwen.
28 Tsuanda medabe mia yukai
ikis min axuntidu jawa meshukidi manama jawaida axunwen.
29 Mia bechipaikin mikidi pe shinanmisbu mia dapi jiweabuki
jatu chakabuwanun ixun yubakakin shinanyamaxanwen.
30 Tsuada miki sinatakin mia chakabuwamabia
eiskaun jatube detenameti shinain sinatayamakunkainxanwen.
31-32 Junibu chakabu Jehován danankin
juni pepabu bechipaikin
jabu besti jaibuwamiswen taexun
ja junibu chakabu jawada jaya uin jawen kemui ja keska
miadi jayakatsis ikin shinanma
jawen shinan keska chibanyamaxanwen.
33 Jehovánan, junin chakabuwamisbun
enabu yupukin
jakia pepabun enabu
jatu duawakubainmiski.
34 Jabu kaxekenanmisbu
Jehovádi jatuki kaxediamiski.
Jakia jawa keinsbuma
Jehován jatu duawakubainmiski.
35 Unanepabu duawakin
ichapabun jatu kenwanxankanikiki.
Jakia unainsmapabu danankin
tsuan jatu kenwanma ixankanikiki,
jatukidi chakabu besti yui janchaidan.