Unanepaidan, jabiawen pepai jiwekubaintidubukiaki, na janchadan
2
Epaan, min en juni bakewen taexunen jancha ninkatan jakimama
en yunuti inun en nemati jancha chibankubainxanwen.
2 Unanepabun mia yusiain ninka pewakin
chanima jancha tapintan jakimama
jaskai jiwekunkainxanwen.
3 Jaskai min unanepatidu inun
min jawada pejaida unanti watidu tapinkatsidan,
min kushipa jidabiwen Dios yukakubainxanwen.
4 Pei inun mabu pepa junea binun, iwanan,
benamisbu keska wakin
unanepati jancha tapinun, iwanan, benajaidakubainxanwen.
5 Min jaska benaiwen taea
jaska Jehová duawai min dayaxuntidu inun
min jakidi tapinkin unanjaidaxanaii.
6 Jehován yusian tsuanda pe tapinkubainkinan,
jaska unanepatidu inun jaska betsa betsapakidi tapinjaidatidu Jehován yusinkin jatu inanxanikiki.
7 Tsuanda jawa kaneama inun jawa chanichakama
pepa besti jiwekunkainaidan,
Jehován medabewakin jatu mekekubainmiski.
8 Tsuanda jatu padainsma inun
Jehován jancha ikunwain chintuinsma
Diosun jabu yaushikin mekekubainmiski.
9 Pepai jiweabu Jehován jatu mekekubainmiswen taexun
miadi jawa chanichakama inun jawa padanananma
dasibi min pe besti jiwekunkainai min tapinxanaii.
10 Unanepa jancha unankin tapintan
min juinti medan min benima chakayamaxanaii.
11 Jawada bika jawaida tapintan jakimama
min bebunkidi pe shinankubainaya
tsuan mia padantiduma ixanikiki.
12 Diosun shinan min tapinjaidaiwen taea
junibu chakabu anua inun
jiwei peabuma anua unanepai min piskukaintiduki.
13-15 Diosun mia mekeaya
tsuada jawen jiwea bai pepa jenebaini kaima
bai atimapa yushtu keska chibankin
daketapai chakabu mei beyuskin
yuda betsa isin tenemai
junibu chakabu nawai besi atimapaibu keska
min jawa jatu chibanma ikunkainxanaii.
16-17 Diosun mia unanepa waya
chipash Diosbe yubakatan beneyabiani
Dioskidi jakimatan jawen bene ma jenebainima
min jakidi jawa unanma
ja ainbu jininipatun jancha jawenduawen
mia jawen kemumakin mia yubakatsi ikaya
pe shinankubaini chakabukatsi ikama
min jawaida putabaintiduki.
18 Ja ainbu jininipatun jiwe anu tsuada kaidan,
ja baiwen yuda mawai bumis keskabuki.
19 Jawen jiwe anu jikitan ana chintunkidantidubumaki,
jawen jiwea bai pepa ana bechitan chibanmadan.
20-21 Jakia tsuabunda jawa kaneama
inun jatuki chanichakama
pe besti jiwekubaini
na mai anu jiweyukubainmisbuwen taea
miadi pe jiwekin bai pepa chibankubainxanwen,
pepabun amisbu keska akubainidan.
22 Jamen jabu padanananmisbu inun
junibu chakabukubainmisbu
miban betsea keska wakin Jehován jatu udenxanikiki,
na mai anu ana jatu jiwemamadan.