PROVERBIOS
Unanepan jancha kushipakidi Salomónen yusinikiaki, na janchadan
1
Davidin juni bake Israelin enabu xanen ibujaida Salomónen yusinti jancha 2 jawenabun tapintidubuwen taexun yusinkubainikiaki, eska jatu yuikinan.Yusinti inun, unanepati inun, medabewakin tapinmati
jancha ninkai jau pekubainunbun inun,
3 yusinti inun, pe shinanmati inun, chanima
padantima inun, jawa chakabuwatima inun,
unanuma jiweti inun, bebunkidi jin jin ikama
yui pewati jau pejaida tapinkubainunbun inun,
4 jawada bebunkidi unandiabuma tapin
jau unanepaxanunbun,
bedunanbu shinanmati inun ninkaisbuma nemati
jatu tapinmakin jawen yusinti jancha
Salomónen jawenabu jaskawen jiwetidubu
jawen kenenika jatu kenemaxunikiaki.
5 Yudabu unanepa inun
tapinjaidanikatun yusian ninkakin
ana unanepajaidakin
dasibi jaska tapinkubainmis
shinankin ana xabakabi tapintidubuki,
6 unanepabun yusinti jancha inun,
jabun jaska miyuiwen yusinmisbu inun,
jabun junea jancha ninkakin pewakatsis ikinan.
7 Jehová duawakin jaki datekin jawen jancha ninka pewakin
unanepakin tapin taewabaintidubuki.
Jakia tsuada unainsmapabun
unanepati inun yusinti jancha pepa dananmisbuki.
Salomónen jawen bake yusinikiaki, na janchadan
8 Epaan, min en juni bakewen taexun
en yusian mia yusinun ninkakin pewawe.
Min ewan yusiandi danankin ninkasyamaxanwen.
9 Min epan yusinti inun min ewan yusinti min jeneama
jawen min jawenduai mia uintidubuki,
teuti inun maiti jawenduajaida min sawea keskadan.
10 Juni chakabubun mia padankatsis ikaibu
jawa jatu ninkakin chibanyamaxanwen.
11 Tsuanda mia yuikin: “Nukube kawe.
Jawa shinanma jatu padantan tsuada tenanun bukanwen.
Jawa nuku chakabuwamabia juai
dainbainkin detenun bukanwen.
12 Juni mawa maiwabu main xeamis keska jatu wakin
junibu jiweabu jatu tenankin nun jatu yamawaxanaii.
13 Jatu jaska watan jatun mabu yumetsuxun
mabu betsa betsapa pepa bitan
nukun jiwe tibi nun mata watiduki.
14 Jaska wai min nukube ka
jawada bitan mibetan jabiaskas nun paxka pewakubainxanaii”,
akin mia yuiaibu jatun jancha ninkama dananxanwen.
15-16 Min en bakewen taexun epaan, chakabu chibanyamaxanwen.
Tsuada jawaida tenankatsis ikaibube jatun bai chibain jatube kayamaxanwen.
17 Isa peiyabun uiain bedubi bidun wankinan,
jamen amisbuki.
18 Jakia ja juni chakabubun jatu tenankatsi ikin
bidunwan keska wakinan,
ibubis jatun jiwea mese wakin amisbuki.
19 Jabunan, kemukin mabu besti jatu padantan bikubainaibu
ibubis jaska kemui padanananmisbuwen taea
jawen jenei mawa bestixankanikiki.
Unanepatun jatu tapinmakatsi jatu kenamisbukiaki, na janchadan
20 Mae namakis bai tibi jaxpa inun jaxpama anuxun
unanepabun jatun jui jatu ninkamakin
21 mae janu jikikainti xui inun janu ichamisbu anuxundi
jatun yusian jatu yuikubainkin:
22 “Bedunan jawa tapindiabumaan,
jawa unanma besti jiwenun ika jaska bechipai
man jatuki kaxeai inun unanepati jancha man dananmisdan,
¿jatian man jenexanai?
23 En matu yusiain ea ninka pewai bekanwen.
En matu nemaya man ea ninka pewaya en shinan en matu achimaxanaii.
24 Man ea ninkai benunbun en matu kenabia
juxun man ea jawa ninkakatsis ikamaki.
25 Jakia jukatsi ikama
en yusian jancha danankin
en matu pewakatsi ikai ea anua
man jawa tapinkatsi ikamaki.
26 Jakia ma matu anu chakabujaida juaya
eandi en matu usanxanaii.
Datei man mawakatsis ikaya
en matuki kaxexanaii.
27 Mai anua niwe bei shubi shubi ibidankin
dasibi matu datebidankin chakabuwabidankin yamawabidanaya
datei man nuitapaya en matuwen ana jawa nuiama ixanaii.
28 Ja xaba jaskaitian tsuanda ea kenabiaya
en jawa jatu kemama ixanaii.
Jabun ea benabiai jawa eki nukuama ixankanikiki”, iwanan,
jatu ana yuikin:
29 “Unanepati jancha danankin
jabun Jehová jawa duawakatsi ikabumaki.
30 Jatun shinan en jatu pewamakatsi ibia en jancha danankin
en jatu yusian ninkakatsi isbumaki.
31 Jatun jiweawen shinan chakakin chakabu tibi amisbuwen taea
nuitapai bika tenekubainxankanikiki,
jatun chakabu ichapa yaniwa keskaidan.
32 Jawada pepa betsa betsapa tapinkatsi isbumawen taea
jabun jawa unanma mawaxankanikiki.
Jawa yusian pepawen nuisbumawen taea
unainsmapa mawai yamaxankanikiki.
33 Jakia jabun en yusian ninka pewakubainaibu
unanuma jiwekubainxankanikiki,
jawada chakabu mese juaya dateamadan”, anikiaki.