Nukun Dios nai anu jiweakiaki, na nawati janchadan
115
Jehová Diosuun, nuku kenwanmaibubis min pepakidi mimebi kenwen.
Min chanimawen inun min nuikipawen taea mimebi kenkunkainwen.
2 Jaskakin ikunwanbuman nuku yukakin:
“¿Janimen, matun Diosdan?” ikaibun
3 “¡Nukun Diosdan, nai anuki!”
Nukun Diosunan, jaska bechipaiai keska dasibi dami waniki.
4 Jabun Dios ikunwanbumanan, jatun yushin kenwanti dami wakinan,
jatun mekenen oro inun plata amisbuki.
5 Ja damidan, jaxpa jayabia jaska janchatidumaki.
Beduyabia jawa uintidumaki.
6 Pabinkiyabia jawa ninkatidumaki.
Dekin jayabia jawa xetetidumaki.
7 Meken jayabia jawa metidumaki.
Taeyabia jawa nikauntidumaki.
¡Texu xuiyabia jawa jancha betsa taska kaintidumaki!
8 Tsuabunda ja yushin kenwanti dami wamisbudan,
jabia jatun dami keskabuki.
Ja jabun jatun dami ikunwainbu jabiaskadibuki.
9 Israelin enabuun, matunan, ¡Jehová Dioski chiti ikin ikunwankanwen!
Jatunan, nuku medabewakin nuku mekekubainikiki.
10 Diosbe nukunabu janchaxunikabuun, ¡Jehová Dioski chiti ikin ikunwankanwen!
Jatunan, nuku medabewakin nuku mekekubainikiki.
11 Tsuabuda Jehovákidi man pe janchakatsis ikaidan, ¡jaki chiti ikin ikunwankanwen!
Jatunan, nuku medabewakin nuku mekekubainikiki.
12 Jehová nuku jakimama nuku shinankubainikiki.
Nuku duawakin nuku pepawakubainikiki.
Nun Israelin enabu duawakin nuku pepawakubainikiki.
Jabu Diosbe nuku janchaxunikabu duawakin jatu pepawakubainikiki.
13 Tsuabuda xanen ibu inun xanen ibuma
Dioskidi pe janchamisbu Diosun jabu duawakin pepawakubainikiki.
14 ¡Jehován jau matun bababu pawakubainunwen,
matuna inun matun bakebunadan!
15 ¡Jehová Diosun nai dami wani inun mai dami wanitunan,
jau matu duawakin pepawakubainunwen!
16 Naidan, Jehová Diosunaki.
Jamen maidan, yudabu yununiki.
17 Tsuabuda ma mawa maiwabudan, janu besti nishmamiski.
Tsuabuda ma mawatan ana Jehová jabun kenwantidubumaki.
18 Jakia nukubu jiweyuxunan,
natian Jehová nun kenwaiin. Januxun jeneama nun kenwanpakexanaii.
¡Aleluya!