Diosun dasibi unan keyuikiaki, na nawati janchadan
Davidin kanta kenenikiaki.
139
Jehová Diosuun, min ma ea unanti waimaxun min ma ea unanjaidaii.2 Dasibi en ikunkainai min ma ea unan keyuaii.
Chaijaidabiaxun jaska en shinain xunska min tanaii.
3 Janida en nikaunmis inun en janu juindukunmis min unaiin.
¡Dasibi en akai min unan keyumiski!
4 Jehováan, en jawada janchai kai ja jancha en taxnimadiama
bebunkidi min ma unaiin.
5 En jiwea dasibi en aka tibi min ea kebenbaunaki.
Min ea tsumaxun jawa jeneismaki.
6 En jaska jayatidumabiaken min unanepa pejaidawen
min ea “¡Jabaa!” imakubainaii,
nenumajaida en jadi shinankin tapintidumawenan.
7 ¿Min Yushin jenebaini en jani katidumen?
¿Min uin keyuaya en jani kai paxai junei katidumen?
8 Nai kubudu keyatapajaida anu en inabiakainkenan,
min jabianuki.
Mai kini keyatapajaida medan en jadi butubiakenan,
min jabiadidiki.
9 Badi juaikidi beni nuyakaini kasmai
badi jikiaikidi ianenwan kesuaudi en jiwebiaken
10 jabiadia min ea mekekubainxanaii.
Min meken yusiudiwen ea tsumaxun min ea jeneama ixanaii.
11 Ean shinankin meshuten ikai medan en mia juntantidu dabanen
ja xaba chaxapan ea kexebauna betsa wakin meshu wanun ika en ibiaya
12 ja meshun ea medabewakin mia anua ea junematidumaki.
Ja meshudan, xaba keskai chaxajaidamiski.
Ja meshu inun xabadan, minadan, jabiaska dabeski.
13 ¿Tsuan ea animen, en yuda dami wakinan? Jabia mian min ea aniki.
En ewan bake nanti medan nanekinan, jabia mian min ea aniki.
14 Jaskawen taea e itan en mia kenwaiin,
min ea pejaida waniwen taexunan.
Na yuda en jayadan, min ea pejaida wani chanima en ikunwaiin.
15 En yuda yumeidan, jawa mia anua juneama iniki.
En junejaida nanetan ewabiai inun
mai kini keyatapajaida keska medanua en ewakunkainai
min ea uiniki.
16 En yuda ewaidan, mianan, min beduwen min uin keyuniki.
Min ea jaska wani dasibikidi min una medan min ekidi keneni jayaki.
En dama nanei pabuyadiama inun kaintan jati xaba en jiwepakexanai
ea tanatan bebunkidi min unan keyuniki.
17 Jehová Diosuun, min shinan unanepa uke medan tapian bikajaidaki.
Jaska min shinain ichapa tsuan mikidi tanatidumaki.
18 En mikidi shinankin tana taewabia mashiti keskaken
jaska waxun en tana keyutidumaki.
Jakia min shinan tana keyukatsidan,
mia putama mibe ikunkainkin en mia jenetidumaki.
19 Jehová Diosuun, ¡jabun jatu chakabuwaibu jatu tenanwen!
¡Tsuada eki sinatakauan ea tenantidubu jatu chai nichinwen!
20 Tsuabuda mikidi jancha chakabumisbu inun
min kena mia jamen yui yubakamisbudan,
jatu chai nichindiawe.
21 Jehován, jabu miki sinatakin mia dananmisbu inun
jabun min jancha ninkama mia dananmisbudan,
¿eanan, en jatu dananmadimen?
22 Chanima en juinti jidabiwen jabuki sinatakin en jatu dananmiski.
Jabudan, en jatuki sinatatai jenetidumaki.
23 Diosuun, en juinti uke medan ea unanti wakin keyuwe.
En shinan dasibi jaska en pemenkain, ea unanti wakin keyuwe.
24 Jadatu baiwen en kai uinkin en bai chakabuwen kai unantan
ea pekidi iyukin min jiwea bai ikibi ikakidi en jawen kanun ea mekekubainwen.