Jehován xanen ibujaida wakin jawen kushipa inanxanikiaki, na kantati janchadan
Davidin kanta kenenikiaki.
110
Dios kushipa dasibi binuatun en xanen ibu yuikin:“Miki sinataibu en jatu maemadiama manai
en yusiudi tsauyuwe, min tae janakin jatuki kenyantanan.”
2 Sión anuxun Jehován jawen xanen ibu unanmati mane mestenti
min jawen kushipaxanai mia inanxanikiki.
¡Bitan miki sinataibu maemakin jatu yunukubainwen!
3 Ja xabatian jatube detenamekin min jatu maemaxanun
minabun mia medabewai mia anu bexankanikiki.
Min mati medibijaida jatu dami wanidan,
jabun nibi inun penaya jawenduajaida pexekidanmis keska badi tibi pei
min benaskunkainxanaii, bedunansi kushipaidan.
4 Jehová mikidi janchai yubakaniwen taeadan,
Jehovánan, jawa shinan betsa wama ipakexanikiki,
eska janchaniwen taeadan:
“Miadan, minabu ebe janchaxunika niti ikama min ipakexanaii,
Melquisedec ipauni keskaidan.”
5 Jehová Diosunan, min yusiudixun mia medabewaikiki.
Janu sinatajaidakauanaitianan,
xanen ibujaidabu kupikin jatu yamawaxanikiki.
6 Nawa xukua tibibu jatu unanti watan jatun kupiti yunubaunxanikiki.
Jatu jaska watan mawa manibainabu jatu ichawaxanikiki.
Mai jidabi anu textekea manibainxankanikiki.
7 Ja bai namaki unpax jabai akaidan,
ja unpaxanan, ana jawen kushipa bena inanxanikiki.