Bika betsa betsapa Davidin tenejaidanikiaki, na nawati janchadan
Davidin kanta kenenikiaki
69
En Diosuun, jene anu kai en ma jasa kemaki.Ea mekekin nexediwe.
2 Ian seuku nua medan en ma jikikainaii.
Jawa kushipaki en paitidumaki.
Ma jene nuajaida medan en pesea ja jene kushibidankin
ea bukin ea taxpi taxpi abainikiki.
3 Ea jaska waiwen taea en bis ichakayamai en jui menui tedis ika
en texu xui en isiaiin.
Jaska nixun en Dios manajaidai en bedu chadishxun
uinbiai en ma babuaii.
4 Eska tibiwen taeadan, en jawa jatu chakabuwamabia
jamen ea danankin en bu ichapa binumai eki sinatakanikiki.
Tsuabuda eki sinataibu ana ichapajaida jayaki.
En jatu jawa wamajaidabia ea yamawakatsis ikanikiki.
Jatun jamapai en jatu yumetsuinsmabia
jamenmens ea yunuchakakin: “Ea ana inanwen”, amisbuki.
5 En Diosuun, jaskatimabiaken ibubis en patapaima min unaiin.
En jaskaima jani en chakabu min uinyamanun en junetidumaki.
6 Jehová Dios kushipa binuatuun, tsuabunda mia ikunwanmisbudan,
en kanei chakabuimawen taea ¡ekidi shinain jau ewen dakeyamanunbunwen!
Israelin mekenika Diosuun, jabun mia chibankatsis ikin mia benaibudan,
¡jau en chakabuima shinain jau jabu bextekeyamanunbunwen!
7 Ea chite paepawabu besu xanabidi ikin
dake paepakin miwen taexun en tenekubainaii.
8 Eadan, tsuan ea unanbuma nawa betsa keska wakin
en betsa kayabibun ea danankanikiki.
9 Janu miki nukuti jiwe bechipaikin en shinan chakayamaii.
Ja inun, tsuabuda mikidi jancha chakabukin ja ikin mia chiteaibu ean en mia tenexunkubainaii.
10 Janu en kaxaitian inun janu en samakeaitian jabu eki kaxemisbuki.
11 Jaya kaxati tadi sawea en nikaunai dasibibun ea uinkin ea usan keyumisbuki.
12 Nukun maewan beputi kexa icha mania tsaubauna ea chitei janchamisbuki.
Ja inun, jabu paentan ekidi kaxei kantamisbuki.
13 Jakia Jehováan, en mia ea akaii.
En Diosuun, ¡na jabiatian ea medabewawe!
¡Min nuijaidawen ea kemawe!
¡Min ea putama ea medabewakubainmiswen taexun ea piskumadiwe!
14 ¡Ian seuku anu en jikikainyamanun ea jeneyamawe!
¡Jabun ea danainbu anua inun jene nuajaida medanua ea mekekin ea nexediwe!
15 ¡Jene kushibidankin jau ea taxpibainyamanun ea nemaxunwen!
¡Jene shubi buspu tsaubidankin jau uke medan
ea jasakin ea bepubainyamanun ea nemaxunwen!
16 Jehová Diosuun, miadan, min pepa inun min dasibi nuikipaki.
¡Min duapajaidawen ewen nuikin ea shinankin menan ea kemadiwe!
17 ¡Na en min tsuma kayabidan, ea dananyamawe!
Natian en ana pemajaidaki. ¡Menan jawaida ea kemadiwe!
18 ¡Eki sinataibu ea putamai ea dapi juxun ea paxawadiwe!
19 Jaska ibubis en mikidi chakabuima en jawen dakeai inun
yudabun ana ea bechipaiama en bika teneaidan, min unanjaidaii.
Ja dikabi jatida eki sinataibu min unandiaii.
20 En chakabukidi tsuanda ea yuikin ea juinti metexmiski.
Ea jaska wabu benima jayama en punu nukajaidaki.
Ewen nuikin tsuan ea daewakin benimawatidubu jamen en benakubainaii.
21 Ea danankin en pitiki ea daunun ixun dau kapainmabuki.
En unpax manui en tetsusinaya vino chakabu bunkash ea amaimabuki.
22 Beyuskin jatun piti pepa jatun tapuki ichawakinan,
jaibunanbiakin janubi bidun keska watan jawen taea jau bika tenenunbunwen.
23 ¡Jatu bexux wakin uinmamatan
jatun kishi babu wakin jatu saki saki imakubainwen!
24 Min sinata pae jatukidi taxnimakin jatu uinmawe.
¡Min jatuki sinatajaidai kunyan ikai kainkainkin jau jatu achi keyununwen!
25 Janu jiwebianibu anu jau ana tsua jiweyamanunbunwen.
Janu bua jatun tadi jiwe medan jau ana tsua jiwetaskayamanunbunwen.
26 Mian tsuada min jatu bika tenema kai ja juni chakabun ana jatu chibanbainkin bika jatu tenemamisbuki.
Mian tsuada min isin tenema kai ja isin betsa teneaiki jabu jaki kaxemisbuki.
27 Chakabuaibu jabias jatun chakabuwen jabiaskadi wakin jatu manakukubainwen,
min nuiwen jatun chakabu jatu buaxunamadan.
28 ¡Jabu jiweabu jatun kena min jatu kenemis ja una medanua tede awe!
¡Juni pepabu min jatu tanakin kenemis anu ja juni chakabun kena kenekin netanyamawe!
29 Jakia eadan, isin tenei en bika teneaii.
En Diosuun, menan ea benitan ea piskumadiwe.
30 Kantakin Diosun kena kushipa en kenwaiin.
Jawada pepa uinkin Dios en kenwankubainaii.
31 En Dios jaska waya ewen benimawaxanikiki,
en ina awa bene ewapa kasmai
ina awa bene jatiuma jawen maxun inun jawen taeyabi
en menu keyuxuntidu binumakinan.
32 Jaska wakin Dios en uinmaiwen taexun ja bika teneaibu benimaxankanikiki.
Tsuanda Dios benakubainaibu jatun juinti medan ana shinan chankanxankanikiki.
33 Tsuada nuitapaibu Diosun jatu ninkamiski.
Ja inun, jawenabu ichakawakin bichiti jiwe medan jatu bichinbiabu jawa jatu danainsmaki.
34 Dasibi nai inun, mai inun, ianenwan inun,
dasibi jabu tibi anu dami wakin Diosun jiwemani jiwebaunabun
jabun jau kenwankubainunbunwen.
35-36 Diosun ja maewan Sión ana meketan
Judán mai pakea anu jatun maewan tibi ana jatu benawamakin benimaxanikiki.
Diosun tsumapan bakebun ja maewan ibu watan ja medan jiwekin jatuna wanunbadikanikiki.
Jabun Diosun kena bechipaimisbu ja medan jiwepakexankanikiki.