Diosun bakebun kati bai pepakiaki, na nawati janchadan
Asafin kanta kenenikiaki.
73
Israelbun Dios pepajaidaki,jabu juinti jawa chakabuuma jatu medabewamisdan.
2 Jamen eadan, unudi ana jatun chakabuki en kematanadan,
en benukeanshinaki,
en shinan atimapan ea achia daxkibaini tin ikeanidan.
3 Jabun chakabuwaibu inun jabu keainbu jatun jamapai ewawabainaibu
jatu uin ea en jaskatiduma shinain en jatuwen kemuimaki.
4 Jabudan, jatun yuda jawa isin teneama
jatun mawawen jawa nuiabumaki.
5 Yudabun jamapai bika tenemisbu keska jabun meabumaki.
Betsabu jatun jiwea bika tenei jin jin ikaibun
jabun chakabuwaibun jaska shinainsbumaki.
6 Jaskawen taea jabu keinan, mane teuabu keskabuki.
Jatu detei itimaskaibudan, jatun tadi sawea keskabuki.
7 Jatun yuda xuadanwain jatun bedu dikabi chudumisbuki.
Jatun shinan chakabu ewa wakin mata wakubainkanikiki.
8 Kaxetan usananain inun keinan,
yuda betsaki kaxekenainan, jawen taea jau chakabu betsa betsapanunbun
chachinamekin jatu bedumisbuki.
9 Dioskidi jancha chakabujaidakin
mai jidabi anu jatun jancha jaska pawabaunmisbuki.
10 Jaskawen taexun yudabun jatu kenwanmisbuki,
jaska jiwemisbu pe keska tsuan jatun chakabu bechiamadan.
11 Jabu yuka ikin: “Jaskadan, ¿Diosunan, unan keyuimenkain?
Ja Dios binu keyuatun jaskadan, ¿tana keyukin unanxanimenkain?”
12 ¡Ja juni chakabubu jatu uinkanwen!
Jabu unanuma jiwekainkin jatun mabu tibi ewawabainkanikiki.
13 En juinti jawa chakabumabia ea jawa medabewamaki.
Chakabu betsa betsapa mekin en juinti inun en meken detsismabiaken
14 jaskakin badi tibi jawenchains ea kusha kusha akabu en yumankunkainaii.
Penama tibi ea ichakawakin ea bika tenemakanikiki.
15 Ean jaska shinainbu keska en shinanshinadan,
min bakebu bai betsa jatu yusinkin padankin
en jatu benukeanshinaki.
16 Ja chakabubu jaskabainaibu ean ninkakin tapinun ixun en shinanan,
enadan, bikajaida ikimaki.
17 Atimas Dioski nukuti tadi jiwe anu jikitan
jaskaibu shinain jadixun en tapinshinaki,
jatixun besti niti ixanaibudan.
18 Diosuun, jabu janu butidubudan,
jatun bai mayun keska anuxun min jatu xutua nishmabainxankanikiki.
19 Jawa manama jawaida min jatu yamawaxanaii.
Jabu date betsa betsapaya dasibi keyuxankanikiki.
20 Jehová Diosuun, tsuada uxabia namayabi bestenkidanmis keska
mia benikidan ja padanananmisbu jatun besu uinkatsi ikama
jatuki sinatajaidakin min jatu dananxanaii.
21 Uatian sinatajaidai
jaskai en juinti en isinjaidaimaki.
22 Ean en jawa unanmajaidawen taea en jadakidi shinan pewatiduma ikimaki.
Min mian ea uianan, en yuinaka keska ikimaki.
23 Jabiaskabiaken ean en mia jeneama ikunkainaii.
En meken yusiudi min ea tsumamiski.
24 Min yusian pepawen min ea tapinmakubainmiski.
Chipu min kushipawen nai anu ea benimawakin min ea ixanaii.
25 ¿Nai anudan, en tsua jayamen?
Mia besti en jayaki.
Na mai ana bechipaiama mibe besti en jiwekatsis ikaii.
26 En jiwea dasibi yamaxanikiki.
Jakia min en Diosunan,
jawada min ekidi yubakai tanani ikibi ika
jaya jatun en juinti ea mestenwan en shinan chankankunkainaii.
27 Tsuabunda mia jenebain mawai benuxankanikiki.
Tsuabunda mawaida mia chiban pewaisbuma yamaxankanikiki.
28 Jakia eadan, Dios anu en kemaii.
En jakidi jaskakainaidan, jadan, peki.
Min en xanen ibu Jehová Diosuun, min ea mekekin adumiski.
Min dasibi ea jaska waxunmis mikidi en chanikaunkatsis ikaii.