Jaska shinankin min bechipaiaiwen en mia benimawakatsis ikaii, inikiaki, na nawati janchadan
(Sal 70)
Davidin kanta kenenikiaki
40
En bika teneaidan, Jehován shinan en manamiski.En kaxayabi yukai Jehová padabeketan ea ninkatan
2 kini atimapa anua ea piskumakin
ian seuku anu en jikikainai ea nexemiski.
En janu paiai anu daish iki en tin iyamanun
mishkiki paimakin ea mestenwanmiski.
3 Nukun mekenika Dios kenwain en kantaya
ea ana benimajaidawakin en juiwen kantati bena ea imaimaki.
En jaskai dasibitun ea uinkin ninkai
benimai shinan chankankin ichapabun Dios shinain jaki chiti ikin ikunwainmabuki.
4 Tsuada ninkaisma jancha binumanikabe niama inun
jabun kenwanti betsa kenwain chanichakaibu anu kaisma
jabu Jehová Dios ikunwain chiti imisbudan,
shinan chankain benimakubainmisbuki.
5 En xanen ibu Jehová Diosuun,
dami betsa betsapa jawendua ichapa min anidan,
nukuwen nuikin duawakin min nuku axunmiski.
¡Tsuan mia binua mia keska betsa jayamaki!
Min pepakidi en chanikauani janchatidubia
jaska waxun en jati jatu yui keyutidumaki.
6 Jau nukun chakabu min nuku buaxunxanun inabu menuti min manamaki.
Jawada inankuin menuti tibi nun mia axunmis inun
xekiwan tibi inankuinkin min jiwe anu nun bemis
jaska dabewen mawaida min jawen benimaismaki.
Jamen jaska binumakinan, min jancha ninkakubainkin
jaska min yununi chibankin en mia menexuntidu
min ea xabakabi ninkamakin yusinmiski.
7 Jaskawen taexun mia jancha wakin:
“En nenuki”, en mia waii,
jaska una sebiki ekidi kenenibu keska wakinan.
8 En xanen ibu Diosuun, ean mia benimawakinan,
jaska shinankin min bechipaiaiwen en mia axunkatsis ikaii.
¡Min jatu yusinidan, en juinti medan en jaya niaki!
9 Minabu midimabu bebunxun jaska jamapai pewakin min kaneisma
xabakabi en jatu unanmamiski.
Mikidi janchai en jawa pes nismaki.
En jaskamisdan, Jehováan, min unanjaidaii.
10 Jaska min yunuti kushipa kanetima min pe unanmiswen taea en jawa yuiama ismaki.
Min ea jenekin putaisma inun min mekenan pepa piskumanikakidi en chanikunkainaii.
Minabu ichapa bebunua janchai jaska min nuikipa inun,
jancha kayabi besti min yuimis
xabakabi jawa juneama en jatu yuipakeaii, jawa jeneamadan.
11 Jehováan, ea bechipaiama ikama ewen nuikunkainwen.
Min nuikipawen inun min shinan kayabi min betsa waismawen
jawa jeneama ea mekekubainwen.
12 Enabun ea jawenchains chakabu betsa betsapa wamisbu
jati tanatan en mia yui keyutidumaki.
Ibubis en chakabu betsa betsapatun ea kebenbauna
jaskatan en ana pe uintidumaki.
En chakabu midimatunan, en bu ichapa binuaki.
Jaskawen taea en benima pae en benua en ana jayamaki.
13 Jehováan, menan ea uinbidan ea putamadiwe.
Jehováan, jawaidakidan ea uintan ea medabewadiwe.
14 Tsuanda en jiwea jabun ea yamawakatsis ikaibu
jau jabuin jatuki kaxeabu jau dakekubainunbunwen.
Jabun ea ichakawakatsis ikaibu dakeyabi jau paxakubainunbunwen.
15 Jabu eki kaxeaibu dakei jau paxadiakubainunbunwen.
16 Jakia tsuabunda mia benakubainaibudan,
jatun benima pae jau bikubainunbunwen.
Min meketi piskuti bitan yuikinan:
“¡Nukun Jehová Dios kushipa binujaidaki!” iki
jau mikidi janchai jeneyamakubainunbunwen.
17 Jamen en nuitapai bika betsa betsapa tenebiaya
Jehováan, ea jakimayamaxanwen.
Jehováan, mian besti min ea medabewamiski.
Jatixuinda ana ea manamama jamapai tibi en tea ea jawaida taxnimadiwe.