Pepabu Jehováki chiti ikabukiaki, na nawati janchadan
Davidin kanta kenenikiaki
37
1-2 Basi yumei pebiatan jawaida chushimiski.Ni maxu ewai pebiatan jawaida xanadiamiski.
Jaska keskadiai juni chakabubu jaskaxankanikiki.
Jatuki sinatayamakubainkanwen.
Ja dikabi jawada chakabuwakin kaneaibu
jatun jamapaiwen kemui nuiyamakubainkanwen.
3 Na mai anu man jiweadan,
Jehová ikunwain jaki chiti ikin
pepa besti aki chintuanma chibankubainwen.
4 Jehová min bechipaiaidan, nuikipakin ja besti shinankubainwen.
Min jaska waiwen taexun jaska uke medan pe shinankin min bikatsis ikai
unankin jawa yaushiama Jehován mia inanxanikiki.
5 Dasibi min jiwea Jehová Dios mekematan
ja besti min ikunjaidawai jaki chiti iken
mia duawakin mia medabewai juxanikiki.
6 Min kaneama inun min pe jiwekunkainaidan,
badi manananbi badi pexea chaxamis keska mia waxanikiki.
7 Jawada Jehová Dios anua min manakaidan,
jin jin ikin jawa yuiama min shinanen besti Dioski chanitan manakubainwen.
Jatun mia medabewaxanikiki.
Jakia juni betsa chakabu atimapa akatsi yubakamisbudan,
jaskawen jiwekainkin tsuabuda maematidubumaki.
Jaskawen taea jatuki sinatayamakunkainwen.
8 Min sinatamis inun min pubenmisdan, jenekin putakubainwen.
Min sinatawenan, dasibi min jamapai tibi min ana pikukunkainaii.
9 Tsuabuda chakabubudan, matun mai pakea anua Jehován jatu nichinxanikiki.
Jakia tsuabuda Jehová Dioski chiti imisbudan, ja mai jatu yubani jabun ibuwaxanikiki.
10 Ana jatixuinda juni chakabubu jayama ixankanikiki.
Jaska jabu chakabumisbu jayamenkain, ixun
jatu benabidanbidani ana jawa jatuki nukukin bechiama ixankanikiki.
11 Jamen jabu juni keinsbumadan,
jabun mai jidabi ibuwatan jawa bika ana teneama
unanuma benimapakexankanikiki.
12 Juni chakabun juni pepa ichakawanun ika
jaki sinatajaidai xeta yenx yenx amiski,
danan paepa wakin jatu chakabuwakatsis ikinan.
13 Juni chakabu jawen kupiti ma janu ikai unankin
Jehován usanmiski.
14 Tsuabuda chakabubun jatun machatu chaipa kenu bitan kasmai
jatun pia bitan juni keinsbuma inun nuitapaibu
jabun shinan pewaibu jatu tsakakin tenankatsis imisbuki.
15 Jakia ja junibu chakabun jaska shinainbudan,
ibubis jatun machatu kenujaidawen jatun juinti chachitidubuki.
Ja inun, jatun pia teke teke iki yamatiduki.
16 Ja juni pepa mabu eskadabesya jiweadan, jaska peki,
jaska juni mabuwanyantun shinain chakabumisbu keskamadan.
Janua juni pepa mabu eskadabes jaya jawa jawen mabu shinanma
ja mabuwanyan binuaki.
17 Jabu chakabuaibu Jehová Diosun jatu keyukin nishmawaxanikiki.
Jakia jabun Jehová ninkakubainmisbu jatu putama mekekubainxanikiki.
18 Jabun kaneama pepai jiwekubainmisbu Diosun jatu pe mekemiski.
Jaska dayakin pepa akubainmisbu jatu jenexunbaina bitan jawen jiwepakenunbadikanikiki.
19 Badi betsatian betsabun bika tenei buniaibun
tsuabunda Dios duawamisdan,
jawa dakeama inun jatun piti jayakubainxankanikiki.
20 Juni chakabubu mawaidan,
basi chushi ketikainai keskaxankanikiki.
Tsuanda Dios danain jaki sinatamisdan,
chi kuin juxumayabaini yamamis keskaxankanikiki.
21 Juni chakabun tsuada ea akin jawen jawada bianyutanan,
jawa ana inankin pakanun, iwanan, shinainsmaki.
Jakia juni pepatunan, nuikin jawen jamapai yaushiama ja jaya jatu inanmiski.
22 Tsuabuda Diosun pepawakin duawamisdan,
jabun mai jidabi ibu waxankanikiki.
Jakia jabu Jehován yupuadan, jabu yamai keyuxankanikiki.
23 Jehovánan, jaska bechipaiai keska jau axununbun
jawen shinan pepa junibu chibanmamiski.
24 Pepabiakin kaneaibu Diosun jatu jeneama
ana jatu medabewakin jawen chakabu buatan jatu mekekubainmiski.
25 En bedunantun uini inun natian mestebukin en uinkubainaidan,
juni pepabu Jehován jenebainai en uinsmaki.
Janua jatun bakebudi jawa ea iki daketapai mapuaibu en jatu uinsmajaidaki.
26 Tsuada jatuwen dabanan ikin jawen jawada yaushiama xaba tibi jatu inanyumisdan,
jaskawen taexun jawen bakebuwen Diosun duawamiski.
27 Chakabu betsa betsapa jenetan pepa besti akubainwen.
Tsuada jaska jiweaidan, jawen jiwea pepa ma jayaki, janu ipaxanaidan.
28 Jehová Diosunan, jamapai pepabu bechipaimiski.
Jabu jaki chiti ika chintuanbumadan,
jawa jatu jeneismaki.
Jamen tsuabuda chakabubudan,
jatu yamawaken jatun bababudi jayama waxankanikiki.
29 Ja inun, juni pepabudan, mai jidabi ibuwatan
janu jiwepakexankanikiki, niti ikamadan.
30 Ja inun, juni pepabu janchaidan, jancha unanepawen imisbuki.
Ja dikabi yunuti jancha kushipawen padanananma pe besti janchamiski.
31 Ja juni janchai jaskamisbudan,
jawen meketi Diosun yusian jawen juinti medan jaya mapuabuwen taea
kanei jawa chakabuisbumaki.
32 Juni pepa jawada jaya juni chakabun uinkin
jaki sinatakin detekatsis ikin shinanbiaya
33 Jehován jawenabu jatu pe mekeawen taea
jaska juni chakabubun jatukidi shinan chakabiaibun jatu nemaxunmiski.
Ja dikabi tsuabunda jatu metukin unanti wabiaibun
jawa chakabu jabukidi jayama ixankanikiki.
34 Tsuanda Diosun yunuti ninkakin man axuin jaki chiti ikadan,
jatun matu duawakin na mai matu ibu wamaken
jawa keyuama man janu jiwepakexanaii.
Janua ja chakabui jiwekubainaibu Diosun jatu kupikin yamawai
ibubis man uinxanaii.
35 Juni chakabu en uinmisdan,
jamapai unan keyuaikidi kenkin jatu benimawabiamis
ji yumei datan jawendua besti keskabuki.
36 Uatian ni pea en uintanima jabianudi ana kawankin en uian
ana ja ji jaki nukukin en bechiamaki.
37 Juni jakidi chakabu yuikin metuisbumadan,
jaskakidi uinkin shinankanwen.
Ja juni pepadan, unanuma jiwenunbadikiki.
38 Jakia juni sinatapabudan, jatun jiwea yamai keyuxankanikiki.
Ja juni chakabudan, jatun jiwea ikibi ikadan, keyui yamaxankanikiki.
39 Tsuada juni pepabu jabun medabe juidan,
Jehová Dios anua jumiski.
Jehovánan, jatu adukin kebeanki,
jawada bika teneaibu mekekinan.
40 Tsuabuda pepabun janida idukatsi benaibudan,
Jehován jatu medabewakin paxawamiski,
chakabubube jusia jiwebiaken jatu kainmabainkinan.