Nukun Jehová Dios duapa jakidi besti kenwantikiaki, na nawati janchadan
Davidkidi kanta kenenikiaki
34
Badi betsa tukama Jehová kenwankin duawakinan, en jeneama ikunkainaii.2 En xanen ibu Jehová shinain en keaiin.
Juni keinsbumaan, ebe benimakin ea ninkakanwen.
3 Jehován kena ewapawai jui kushipawen ebetan kenwankanwen.
4 Datekin Jehová en benakin yuka ea ninkakin kemaya
ja jawen en dateai ea jenemakin putamaimaki.
5 Tsuabunda Jehová shinainbu benima paen jatu achia
jawawen dakeabuma benimaxankanikiki.
6 Nuitapakin en Jehová kena ea ninkakin kemakin
en bika teneai dasibi ea putamaniki.
7 Tsuabunda Jehovákidi pe janchakin kenwankubainaibudan,
jawen nai tsuman jatu kexe pewaxun jatu piskumamiski.
8 Ibubis Jehováki chiti ikin unankanwen.
Jehovádan, medabenan pepajaidaki.
Tsuabunda jaska wai jaki chiti ika ja juni benimakunkainmiski.
9 Jehováki chiti ikin duawai jaki mesei ja keskai pepakubainkanwen.
Tsuabuda jaki mesekin duawakin kenwankubainaibudan,
jawada pepa akaibu jatu dananma ninkakin inankubainmiski.
10 Tsuada mabuwanyan jiwemisbudan,
benui keyuaya nuitapai ana jawa jayama buni tenexankanikiki.
Jamen tsuabunda Jehová benakubainmisbudan,
jawa jawen jamapai tibi pepa benuama ikunkainxanikiki.
11 Jehová duawatikidi matu yusinun,
en bakebuun, nenu bexun ea ninkai bekanwen.
12 ¿Man badi ichapa jiwekatsis ikai?
¿Man benimai jiwekatsis ikai?
13 Man jaskai jiwekatsis ikaidan,
matun jancha chakabu nemakubainkanwen,
janchakin chanichakakin yuitaskamadan.
14 Chakabu betsa betsapa danankin pe besti akubainkanwen.
Jadatuda jawen unanuma kati bai bechitan ja chibankubainkanwen.
15 Jehovánan, tsuabunda jawen yusian chibankin duawamisbudan,
jatu mekekubainmiski.
Januxun jabun ea akaibu xabakabi jatu ninkadiamiski.
16 Juni chakabubudan, Jehová jatuki sinatajaidakin
mai anuxun jamapai akubainkin ja shinainbu tede akin
ana jakidi shinantima waxanikiki.
17 Jakia tsuabunda Jehová duawakubainmisbun jawadawen nuikin yukaibudan,
jatu ninkakin bika betsa betsapa teneaibu jatu nemaxunkubainmiski.
18 Jehovádan, nuku mekei nuku dapi niaki.
Tsuabuda bika betsa betsapa tenei juinti nishmai nui jawawen jaskatimabiaken
Jehován jatu mekekin paxawaxanikiki.
19 Tsuabuda juni pepabu medabenain yudabun jatu unanma
betsa betsapawen jatu ichakawamisbuki.
Jakia Jehován jaska teneaibu jatu duawakin
jaska tibi jatu putamakin binumamiski.
20 Juni pepa Jehován jawen xau tibi mekemiski.
Jaskawen taexun jawen xau betsa tekeama ixankanikiki.
21 Jabu juni chakabubu Jehován ibubis jatun chakabuwen tenanxanikiki.
Jamen tsuabunda juni duapabu danankubainmisbudan,
Diosun jatu unanmakin isin tenemakin kupixanikiki.
22 Jakia Jehovánan, jawen dayadubu jaki chiti imisbudan,
jatun jiwea jatu ichakawama jatu mekekubainxanikiki.