Nukun Jehová Dios pepa ja besti kenwantikiaki, na nawati janchadan
33
Man Diosun tsuma pepabuun,Jehová benimawai kantaxunkanwen.
Matun juiwen Jehovákidi kantakin man jawenduawaya
Jehová Diosun bechipaimiski.
2 Jehová Diosun mia axunmis shinankin
kenjaidawakin arpa mawaxuni kantakanwen.
Salterio mimawati 10 dispiya mawai kantaxunkanwen.
3 Nawati benawen kantai
mimawati mawa pejaida wai benima chakayamai kantakanwen.
4 Chanima Jehován jancha ikun kayabiki.
Jaska chanichakaisma jawen dami tibiwen nuku uinmakubainikiki.
5 Junibun kaneisma inun jatun shinan pepabu jaskawen jiweabudan,
Jehován jatu bechipaimiski.
Jehován nuidan, dasibi mai jidabi nati ikaki.
6 Jehován jawen jancha bestiwen yunukin nai damiwaniki.
Jabias jawen janchawendi xun akin badi inun uxe inun bishi damiwaniki.
7 Jene ichawakin ianenwan itamama nuajaidawaniki, janus ichawakinan.
8 Mai jidabi anu jiwebaunabun Jehová jau duawanunbunwen.
Yuda xukuabu tibi jiwebaunabun Jehová kenwankin jau duawanunbunwen.
9 Jawen janchawen Diosun yunua dasibi kain dami keyuniki.
Damiwakin janakin yunuakeakea ninkatan janu ikibi iki mestenibuki.
10 Nawan Dios ikunwanbuma dayakin jaska bechipaikin
jatun mae anu daya ewapa taxnimatan jawen jiwebainaibun
Jehová Diosun jatu bechipaiama nemakin bextekubainmiski.
11 Jakia Diosun jawen daya ewapa jawen jiwekainti jatu taxnimaxunidan,
jawa bextekeama mesten ikibi ika ipaxanikiki.
12 Jehová Diosun jawena wakatsi jatu katunidan,
ja jiweabudan, jabe jiwei benimakubainkanikiki.
13 Nai anuxun Diosun juni dasibibu uinbaunikiki.
14 Janu Dios jiwea anuxun mai anu dasibi jiweabu tanakubainikiki.
15 Jatu jiwea inankin jatun juinti tibi damiwanixun
jaska dasibi akubainmisbu jawa jeneama jatu uinkubaunikiki.
16 Mai anu xanen ibujaida jawen detenamenikabu midimajaida jayabia
jabuwen jiwei paxatidumaki.
Detenamenikabu jatun kushipajaida jayabia
jawen jiwei paxatidubumadiki.
17 Caballowen kushibiabainmisbudan, jawen jiwei tsua paxatidubumajaidaki.
Caballo kushipajaidabia jaki chiti ibiamisbu jawen jiwei tsua paxatidumaki.
18 Jakia tsuabunda jaki mesei inun jakidi pe janchakin
nun yuimis Dios nukuwen nuimis nun ikunwainbu
nuku putama nuku mekekubainmiski,
19 jatun jiwea benui jau mawayamanunbun inun
bunitianbiaken jau debuama jiweyukubainunbunan.
20 Nukubun nun Jehová ikunwain nun jaki chiti ikabuki.
Jatun nuku medabewakubainmiski, nuku mekesukinan.
21 Jehován kena medibi kushipa ikunjaidawai nun jaki chiti ikaya
nukun juinti benimajaidamiski.
22 Jehová Diosuun, min nuiwenan,
min nuku jawa putaismaki.
Jaska min nuikipa mia anua juai besti nun manakubainaii.