Chakabu ana juneama xabakabi chaninikiaki, na nawati janchadan
Davidin kanta kenenikiaki
32
Tsuanda chakabu Jehován ma bua keyuxunaana chakabu jayamawen taea benimamisbuki.
2 Tsuada Jehován jawen chakabuwen taexun ana jawen chiteamawen taea
ja juni ana shinan chakai bika teneamawen taea benimakunkainmiski.
3 En chakabu xabakabi chaniama en mekeawen taea
badi tibi tenea en tsekeden ikunkainaiwen taea
en yuda imanai chushi keskakunkainiki.
4 Jua badin kua jawen xanawen chushi chapumis keska wakin
meshu medan inun badidi ea shinanmakin
en chakabuwen jawen ea timakin e imakin min ea tenemakubainiki.
5 Jakia jaska tenekubainkin en chakabu ana junekatsi ikama
shinan pewatan dasibi en chakabu betsa en miki chani keyuniki.
Jaska ninkatan Jehováan, mianan, min ea bua keyuxuniki.
6 Jaskawen taexun tsuanda mia ikunwain chintuanma
bika tenekin mia yukabu min ninkamiski.
Mia yukakin jaska wamisbuwen taea bika teneti itamama
jatu anu jubiai ana jatuki kemama ixanikiki.
7 Miadan, min en mishki kene janu junetiki,
mese juai nemaxunkin min ea mekemisdan.
Jaskawen taea benima paen ea achia ma min ea binumawen taea
jui kushipawen en kantamiski.
8 Xanen ibu Jehován ea yuikin:
“Mikidi shinankin en mia uiain ea uinwen.
En mia tapinmakatsis ikaii,
jancha pewen yusinkinan,
jaska en shinainwen jadatu bai pe ja katutan min jawen kakunkainunan.
9 Ina caballo inun mulon ninkabumawen taexun
jawen jaxpa anu mane jankishkunkin
jawen buxkenbainti dispi nexabukuntan
jawen iyukin ninkamabainkin jawen niti ati jayaki.
Jaska keska iyamawe.
Min ea ninkamadan,
ana jadatu yusian betsawen en mia dapixun medabewatidumaki.”
10 Juni chakabukubainmisbudan, jawa medabe jayama
bika betsa betsapa tenekanikiki.
Jakia tsuanda Jehová ikunwankin chibanbainaibuwen taea
bika tenebiaya jawen nuikipawen mekekin yabukin akawamiski.
11 Man Diosun tsuma matukidi pe janchamisbu pepabuun,
benimajaidakin Dios kantaxunkin kenwankanwen.