Jehovádan, en xaba inun en mekenikaki, na nawati janchadan
Davidin kanta kenenikiaki
27
Jehová Dios en xaba keska jatun ea mekemiswen taeaana jamapai betsaki en dateamaki.
En jiwea Diosun ea kexekubainmiswen taea
ana tsuki en dateamaki.
2 Juni chakabubu eki sinatabidan ea achixun yamawanun ika ibiabidanaibu
jabu juti itan tin iki di imisbuki.
3 Detenamenikabu ichatan ea kexebiabaunabun
juinti bene bene iki en jawa jatuwen dateamaki.
Ea detenun itan ekidi detenamenikabu benibiabidanaibun
en xanen ibuki chiti ika babuama en unanuma jiwekunkainaii.
4 Jehováan, eska bestikidi en mia yukaii, jaska en bechipaiaidan.
Jehováan, badi tibi en jiweawen min jiwe medanxun
min kushipa jawendua shinankin en mia kenwankatsis ikaii.
5 Xaba betsatian bika shadabu en teneaya
min jiwe medan ea junekin adutan
min ea mekekubainxanaii.
Janua tsuan ea metidumanu mistutan min ea paxawatiduki.
6 Eki sinataibu min kushipawen ma min ea jatu binuma
janua taxnikauan jas shinanma
min jiwe medanxun inankuin mia kua keyuxunkin
mia kenwain benimajaidai kantakin en mia nawaxunxanaii.
7 Jehová Diosuun, en mia kenai ea ninkawe.
Ewen dabanan ikin ea kemawe.
8 En juintinin mikidi ea yuikin:
“Jehová Dios benai jaki nukuwe”, ea wa
jaskawen taexun miki nukunun, iwanan, min en Dios en mia benaii.
9 Miadan, jabia mia besti min en Dios mekenanwen taexun ea jeneyamawe.
Eki dakei junei iduyamawe.
Ja inun, eki sinatakin ea dananyamawe,
mian besti min ea medabewamiswen taexunan.
10 En ibubun ea putabiabainabun Jehová Diosuun,
ea jawa jeneama min ea mekekubainxanaii.
11-12 Jehováan, natian eki sinataibu
jamen ekidi chanichakai itimaskabidan ea achikatsis ikaibu
jaska shinainbu keska ea jatu yunuyamawe.
Jakia min bai pepa ea unanmakin jawen ea iyuwe, en jawen kanunan.
13 Ea en jiwekunkainmiswen taexun
jaska Jehován jawenabu jawen duapa jatu uinmakubainmis
en jaki nukuxanai en unaiin.
14 Jehová Dioski mestentan jawen kushipai punu nukama
jawen shinan bechipaikin jawa chintuanma jaki mestenkubainkanwen.