Jawen mekenika kayabi Dios benakubainikiaki, na nawati janchadan
Corén baken kanta kenenikiaki
42
Ni chaxun unpax manui jene benai kamis keskaiJehová Diosuun, jaska keskadiakin en mia benakubainaii.
2 Diosun ea jiwea inanmis putakatsi ikama
unpax manuai keskai en jabe nikunkainaii.
¿Jatian ana chintunkidan Dios bebun en nixanai?
3 Badidi inun meshu medan kaxai en beun jene jabamisdan, jadan, en pitiki.
En jaskaitianan, badi tibi jawenchains jabun ea bika wakin yukamisbuki:
“¿Janimen, min mekenika Diosdan?” akinan.
4 Ea jaska tibi yuikin ea shinanmabu ean dasibi en jawen bika teneai en juinti en mia bepenxunmiski.
Min tadi jiwe anu enabu en jatu iyuaya
jabun ekidi shinankin benimakin jatun juinti jidabiwen
jaska mia kenwankubaini nun jaskanidan, en shinaiin.
¡Mikidi besi pepa en jakimamaki!
5 Dios ikunwain jaki chiti itan
jawa jeneama Jehová Dios en mekenan kenwankin en akubainaii.
Ana punu nukai en jawa bexteketidumaki.
Jaskawen taea en jamapai tibiwen en ana nuiamaki.
¡Jabia bestijaida en Dios inun en mekenikaki!
6 Ikis en punu nuka shinan chankanmajaidaki.
Jaska Jene Jordán anu en mibe nikunkaini inun,
Mati Hermón inun Mati Misar anua en jaskakunkaini
jakimama en mikidi shinanjaidaii.
7 Bika betsa betsapa min ea tenemaii.
Manaundia sai iki jawen jui mawa tsakatan taxniai keska
min jancha eki nukuai ninkai en nuitapakunkainaii.
Jenewan shubi kunyan ikai keska mekin en teneaii.
Jene tukax iki buspu tsaubidanai keska
bika betsa betsapa en tenekubainaii.
8 Jaska Dios ewen nuikin ea bechipaiai badidi ea uinmaya
meshu medan kantaxunkin jeneama en jiwea mekenika en Dios en yukakubainaii.
9 Diosun ea mekekin eki sinataibu ea nemaxunmis yuikin:
“¿Jaskakin ana ea shinanma min ea jenebainamen?
Eki sinataibun ea bika tenemaibun
¿jaskai punu nuka en nikunkainai?
¿Min jaskai ekidi jakimamen, ana ea shinanmadan?
10 Jabu eki sinataibun ea ichakajaidawabu
tenei en xau dikabis ea isin tenemakin
hora tibi jabu eki sinataibun jawenchains ea bikawakin yukamisbuki:
‘¿Janimen, min mekenika Diosdan?’ ” akinan.
11 Dios ikunwain jaki chiti itan
jawa jeneama Jehová Dios en mekenan en kenwankubainaii.
Ana punu nukatan en jawa bexteketidumaki.
Jaskai en jamapai tibiwen en ana nuiamaki.
¡Ja bestijaida en Dios inun en mekenikaki!