Jau Diosun medabewanun jawen kushipa yukanikiaki, na nawati janchadan
Davidin kanta kenenikiaki
20
Tsuanda bika tenekin Jehová min yukai jau mia ninkanunwen.Jacobun Jehová Dios ikunkaini jabiatuns jau mia medabewakin
miki sinataibu mia nemaxununwen.
2 Jawen kenwanti jiwe Sión Jerusalén anuxun
jawen medabenantiwen jau mia medabewanunwen.
3 Duawakin min inankuin tibi min inankubainmis inun
inabun xeni menukin min benimawamis
shinain jau matuwen benimakunkainunwen.
4 Jaska bechipaikin min akatsis ikai jau mia menexunkubainunwen.
Jaska min yubakaidan, jau dasibi Jehován mia amadiakubainunwen.
5 Nukun Jehován kena kushipawen ma nuku jatu maemamawen taexun
benimakin jawen unanmati tadi pusteya bandera jawendua
sanan sanan akin nun jakidi shinain besixanaii.
Dasibi min Jehová yukai menekin jau mia axunkubainunwen.
6 Jehovábe janchakin nun yuka
jawen mae medibi naiudixun jawen kushipa itamamawen
nuku medabewakin nuku binumamis en unaiin, jawa shinan betsa wamadan.
Jaskaken xanen ibu katunixun jatu maemamamis en ikunwaiin.
7 Nawa betsabun jatun detenameti tadanbainti ichapa tanamisbuki.
Januxun betsabun jatun caballo ichapa tanadiamisbuki.
Jakia nukubunan, nukun Jehová Dioski chiti ikin ja besti nun yuimiski.
8 Ja yuda betsabu babutan nidi ikaibun
jakia nukubudan, babuama mestentan nun kakunkainmiski.
9 Jehováan, nun mia yukakin kenai nuku kemawe,
nukun xanen ibu kushipa inantan nukuki sinataibu maemamakinan.