Dasibi Diosun dami waniwen jawen kushipa nun uintidukiaki, na nawati janchadan
Davidin kanta kenenikiaki
19
Jehová Dios kushipatun damiwani nai manaundiabu xabakabi jawen kushipakidi jabu nukuki chanikanikiki.Naiudia jabu dami pepa wanibun nuku tapinmamisbuki.
2 Xaba taxnikidankidankin Diosun kushipakidi chani janchakin yuikubainmiski.
Meshunan, jabias Diosun kushipakidi chanikin betsa tibi tapinmadiakubainmiski.
3 Jancha kayabi jayama inun jawen jui tsuan ninkamabia
4 mai jidabi anuxun jaska yudabu tapinmai jawen bana ninkamisbuki.
Xukua tibitun Jehová Dioskidi unanmisbuki.
Nai anu jau jaudi dakaxanun Diosun badi duntani
5 janua benimai kauankin mai jidabi dunkekubaunmiski,
juni ainyain kai jawen mae anua benimai kainkainmis keskaidan, ja inun,
juni kushikainkin jatu maemanun ika kushikainmis keskaidan.
6 Nai uke betsaudia badi taxnikidanadan,
dunkebauni uke betsa mexti iki ibukunmiski.
Jawen chaxa xana bakai danain tsua jani paxatidumaki.
7 Jehová Dios yusinananidan, kanema pejaidaki,
Jiwea bena inanananmiski.
Jawen yunua betsa waisma ikun kayabiki.
Yudabun jawa unandiama pepabu unanepa jatu wamiski.
8 Jaska Jehován yusinkin yunumis inun nemamisdan, pepa bestiki,
junibun juinti benimawaidan.
Jawen yunuti jancha jawa chakabumaki,
yudabu jatun beduwen xabakabi jatu uinmaidan.
9 Jehován jawen datemaidan, xunpin besti ipakeikiki.
Jaska yudabu kenemani jawen jancha tibi dasibi chanima pepaski.
10 Jawen yusianan, chanima pejaidaki,
Oro pepa jawen kadu binuaki.
Ja inun, jawen yusianan, buna bata binujaida keskaki.
11 Ja dikabi min yusianwenan, min tsuma ea pewakin min ea nemamiski.
Mia ninkajaidatan mia axuainbudan, pejaidawen min jatu manakumiski.
12 Tsuan ibubis kanetan ¿dasibi jawen chakabu unantidubumen?
Jehováan, jawa shinanma chakabuwakin en kanemisdan,
ea buaxuntan en shinan ea betsa wawe.
13 Min tsuma chakabubia en kenmisdan, ea nemakin ea betsa wawe,
jau jatun ea kenmamistun ea padankin jawenawatan jau ana ea yunuyamaxanunan.
Min ea jaska wa juni jawa chakabu jayama
ana chakabun ea meama en pepa bestikunkainkatsis ikaii.
14 En jancha inun en shinain min jaska bechipaiai besti en mia uinmakin bechipaimakatsis ikaii.
En Jehová Diosuun, min kushipawenan, mishki jiwe keska anu min ea iduma inun min en mekenan piskumanikaki.