Jiweti pepa Dios anu besti jayakiaki, na nawati janchadan
Davidin kanta kenenikiaki
16
Jehová Diosuun, ea mekekubainwen,mia besti kenwankin en mia chibainan.
2 “Min en Xanen Ibun ea duawakin
min ea pepa wamiswen taea en benimaii.
Tsua mia keska jayama min jatu binu keyua kenwankin en mia yuimiski.”
3 Ja enabu jatidi medibi mia jiwexunkin jabun mia besti kenwanmisbudan,
jatuwen benimai en shinan chankankunkainmiski.
4 Jakia ja jabun dami betsa dios waxun kenwanmisbudan,
min jaska tenetiduma tenei yumanjaidaxankanikiki.
¡Jamen eanan, jaska wakin jatun dami kenwainbudan,
yuinaka tesenxun en jatu inainsmajaidaki!
Ja inun, ja dami betsa betsapa kenwanmisbu jamenken
jatun kena en yuismajaidadiki.
5 Jaska en jaya jawa shinanma
min en Dios mekenan besti en shinankubainaii.
Ea duawakin en jiwea ea inankin pe besti min ea mekekubainmiski.
6 Na mai pakea min ea yunukin xanen ibu wani
jawenduajaidawen taexun en mia kenwaiin.
7 Jehová Diosuun, min ea mekekin pe yusinmiswen taexun
duawakin en mia kenwaiin.
En uxabiaken ea jancha wakin min ea tapinmamiski.
8 Ean en mia jawa paxkamaken min ebedi nikunkainaya
tsuanda ea kanemakin ea chakabu amatidumaki.
9 Jaskawen taexun en juinti ukemedan shinan chankanjaidai en benimajaidaii.
Jawa dateama en mia jiwexunkunkainaii.
10 En mawa ea maiwabu janu min ea jeneama ixanaii.
Janu mawa bumisbu anu min tsuma chintuinsma
jadi min ea bashiama ixanaii,
jau jadia en yumankunkainyamanunan.
11 Min jiwekuian kati bai min ea unanmakubainaii.
Mibe nia en benimajaidaya min ea duawakubainaii.